ނޭޕާލުގައި އަންނަ އާދިއްތަ ދުވަހު ފަށާ 20 އަހަރުން ދަށުގެ ސާފް ޗެމްޕިއަންޝިޕަށް ޒުވާން ގައުމީ ޓީމުގެ ކުޅުންތެރިން ކަނޑައަޅާފައިވާ ޓާގެޓަކީ ތަށި ހޯދުން ކަމަށް ޒުވާން ގައުމީ ޓީމުގެ މުހިންމު ކުޅުންތެރިއެއް ކަމަށްވާ ޝަނާން ރަޝާދު ބުނެފި އެވެ.
ސާފް 20 އަހަރުން ދަށުގެ މުބާރާތް އޮތީ އޮގަސްޓް މަހު، 18-28 އަށް ނޭޕާލުގެ ކަތުމަންޑޫގަ އެވެ. މުބާރާތުގެ ގްރޫޕް ސްޓޭޖުގެ ފުރަތަމަ މެޗުގައި، މި މަހު 21 ގައި ބޫޓާނާ ދެކޮޅަށް ކުޅުމަށް ފަހު، އޭގެ އެއް ދުވަސް ފަހުން އިންޑިއާއާ ބައްދަލުކުރާނެ އެވެ.
މި މުބާރާތައް ނެގި ސްކޮޑުގައި މީގެ ކުރިން ސާފް އާއި އޭޝިއަން ކަޕް ކޮލިފައިންގައި ކުޅުނު ކުޅުންތެރިން ހިމެނެ އެވެ.
އޭގެ ތެރެއިން، ޝަނާން އަކީ، އެންމެ ފަހުން މި ޓީމުގައި ހިމެނި ކެޕްޓަންކަން ވެސް ކުރި ކުޅުންތެރިޔާ އެވެ.
ޒުވާން ގައުމީ ޓީމު ފުރުމުގެ ކުރިން އެ ޓީމުގައި ހިމެނޭ އެންމެ މުހިންމު އެއް ކުޅުންތެރިޔާ ޝަނާން, "އަދަދު ސްޕޯޓްސް" އާ ވާހަކަ ދައްކަމުން ބުނީ، ގައުމީ ޓީމުން މުބާރާތައް ދާއިރު، ކުޅުންތެރިންގެ ޓާގެޓެއްގެ ގޮތުގައި ތަށި ހޯދުން ހަދައި އެކަމަށް މަސައްކަތް ކުރާނެ ކަމަށެވެ.
އިރާދަ ކުރެއްވިއްޔާ ތަށި ރާއްޖެ އަށް ގެނައުން އެއީ ޓީމުގެ ޓާގެޓަކީ އެއަށް މަސައްކަތް ކުރަނީ ހަމަ -- ޝަނާން
މި ފަހަރުގެ މުބާރާތައް ތައްޔާރުވުމުގެ ގޮތުން ޒުވާން ގައުމީ ޓީމުގެ ސްކޮޑް އެކުލަވާލާ މަހެއްހާ ދުވަހު ވަނީ ފަރިތަކުރުންތައް ކުރިއަށް ގެންގޮސްފަ އެވެ.
ޝަނާން ބުނީ ފަރިތަކުރުންތައް ދިޔަ ގޮތާމެދު ހިތްހަމަ ޖެހޭ ކަމަށާއި، ސްކޮޑަށް ބަލާއިރު، ޓީމުގެ ސްކޮޑާ މެދު ވެސް ހިތްހަމަޖެހޭ ކަމަށެވެ. އެ ގޮތުން، ކުޅުންތެރިންގެ މެދުގައި، ޓީމްވޯކް ރަނގަޅު ކަމަށް ޝަނާން ފާހަގަކުރި އެވެ.
ފުރަތަމަ ޑިވިޝަނުގައި ޔުނައިޓެޑް ވިކްޓަރީ (ޔޫވީ) އަށް ކުޅެމުން އަންނަ ޝަނާން ވަނީ މީގެ ކުރިން ސާފް އާއި އޭޝިއަން ކަޕްގެ ކޮލިފައިންގައި ޒުވާން ގައުމީ ޓީމަށް ކުޅެ، ތަޖުރިބާ ހާސިލްކޮށްފަ އެވެ.
ވިހި އަހަރުން ދަށުގެ ގައުމީ ޓީމުގެ ކޯޗު، އަހުމަދު ޝާކިރު (ޝާކިއްޓެ) ވަނީ، މީގެ ކުރިން މި ލެވަލްގައި ކުޅެފައި ތިބި ކުޅުންތެރިން ތިބުމަކީ، ކޮންމެ ވެސް ވަރެއްގެ ރަނގަޅު އަސަރުތަކެއް ޓީމަށް ކުރާނެ ކަމެއް ކަމުގައި ފާހަގަކޮށްފަ އެވެ.
