ވޯސޯ، ޕޮލެންޑް (އޮގަސްޓް 15) - ކީލިއަން އެމްބާޕޭގެ ގޯލާ އެކު، 2-0 އިން އެޓަލަންޓާ ބަލިކޮށް، ރެއާލް މެޑްރިޑުން ހަ ވަނަ ފަހަރަށް ޔުއެފާ ސުޕަ ކަޕް ކާމިޔާބުކޮށްފި އެވެ.
ޗެމްޕިއަންސް ލީގުގެ ތަށި 15 ފަހަރު އުފުލާލައި އެ މުބާރާތުގެ އެންމެ ކާމިޔާބު ޓީމުގެ ޝަރަފް ހޯދާފައިވާ ރެއާލުން ހަ ވަަނަ ފަހަރަށް ސުޕަ ކަޕް ކާމިޔާބުކޮށް، މި ތަށި އެންމެ ގިނަ ފަހަރު ހޯދުމުގެ ރެކޯޑް ވެސް ގާއިމްކުރީ އެވެ. ކުރިން މި ރެކޯޑް އޮތީ ފަސް ތަށި ހޯދި ބާސެލޯނާ އަތުގަ އެވެ.
މުޅި މެޗު ކަހަލަ ގޮތަކަށް ރެއާލް މެޑްރިޑުން ކޮންޓްރޯލްކޮށް ކުޅުނު މި މެޗުގެ ފުރަތަމަ ހާފުގައި ރެއާލަށް ގޯލެއް ޖަހަން މާކަ ރަނގަޅު ފުރުސަތެއް ނުލިބެ އެވެ. ފުރަތަމަ ހާފުގައި ރެއާލަށް ގޯލު ޖަހަން އެންމެ ރަނގަޅު ފުރުސަތެއް ލިބުނީ ރޮޑްރީގޯ އަށެވެ. ވާތުފައިން އޭނާ ފޮނުވާލި ބާރު ހަމަލާ އަމާޒުވީ ގޯލުގެ ދަނޑިއަށެވެ.
މެޗުގެ 60 ވަނަ މިނެޓުގައި ރެއާލް މެޑްރިޑަށް ލީޑު ނަގާދިނީ, ފެޑެރީކޯ ވަލްވާޑޭ ޖަހާދިން ގޯލުންނެވެ. މިއީ އޭރިއާ ތެރެއިން، މުޅިން ހުސްކޮށްލާފައި ވިނީޝިއުސް ޖޫނިއާ ވަލްވާޑޭ އަށް ހުސްކޮށްލި ބޯޅައަކުން ޖެހި ގޯލެކެވެ.
އޭގެ މިނެޓެއް ފަހުން, ވިނީޝިއުސް އަށް ވަނީ ގޯލު ޖަހަން މުޅިން ހުސް ފުރުސަތެއް ލިބި ބޭކާރުވެފަ އެވެ. މުޅިން ހުހަށްހުރެ ވިނީޝިއުސް ފޮނުވާލި ބާރު ހަމަލާގެ ހުރަހަކަށްވީ އެޓަލަންޓާގެ ކީޕަރު ހުވާން މޫސޯ އެވެ.
ރެއާލްގެ ދެވަނަ ގޯލު މެޗުގެ 68 ވަނަ މިނެޓުގައި ޖަހާދިނީ ކީލިއަން އެމްބާޕޭ އެވެ. މިއީ ރެއާލްގެ ޖާޒީގައި ރަސްމީ މެޗެއްގައި އެމްބާޕޭ ކާމިޔާބުކޮށްދިން ފުރަތަމަ ގޯލެވެ.
މެޗުގެ 81 ވަނަ މިނެޓުގައި ރެއާލަށް ލީޑު ފުޅާކުރަން އިތުރު ފުރުސަތެއް ލިބުނެވެ. ވިނީޝިއުސް ނަގާދިން ހުރަސް އެޓަލަންޓާ ޑިފެންޑަރެއްގެ ފައިގައި ޖެހިފައި ގޯލު ކުރިމައްޗަށް ހުސްވިއިރު, ވަލްވާޑޭ އަށް ހުރެވުނީ ތަންކޮޅެއް ފަހަތުގަ އެވެ.
ރެއާލުން ސުޕަ ކަޕް ކާމިޔާބުކޮށްފައިވަނީ، 2002، 2014، 2016، 2017، 2022 އަދި 2024 ވަނަ އަހަރު އެވެ.
