ފަލަސްތީނުގެ ގާޒާގައި ގަތުލްއާންމު ހިންގަމުންދާ އިޒްރޭލަށް 20 ބިލިއަން ޑޮލަރުގެ ހަތިޔާރު ދޭން އެމެރިކާއިން ނިންމައިފި އެވެ.
އެމެރިކާގެ ސްޓޭޓް ޑިޕާޓްމަންޓުން ބުނީ އެ ގައުމުން އިޒްރޭލުގެ ސަލާމަތާއި ރައްކާތެރިކަމަށް އެހީތެރިކަން ފޯރުކޮށްދޭނެ ކަމަށާއި ހަތިޔާރު ފޯރުކޮށްދެނީ އެހެންވެ ކަމަށެވެ.
"އެމެރިކާއިން އިޒްރޭލުގެ ސަލާމަތާއި ރައްކާތެރިކަމަށް އެހީވާނެ. އެމެރިކާއިން އަބަދުވެސް އިޒްރޭލަށް ދިފާއު ހަމާލާތަކުން ދިފާއުވެވޭނެ މަގު ތަނަސްކޮށްދޭނެ. ހަތިޔާރު ފޯރުކޮށްދެނީ އެކަމަށް،" ސްޓޭޓް ޑިޕާޓްމަންޓުން ބުންޏެވެ.
ރިޕޯޓްތައް ބުނާ ގޮތުން އެމެރިކާއިން އިޒްރޭލަށް އަސްކަރީ 50 ފައިޓާ ޖެޓް ފޯރުކޮށްދޭނެ އެވެ. އަދި އަސްކަރީ 25 އެއާ ކްރާފްޓްގެ މެއިންޓެއިން ކޮށްދޭން ވެސް ވަނީ ނިންމާފަ އެވެ.
މީގެ އިތުރުން އިޒްރޭލުން އަންނަނީ އެމެރިކާގެ އެހީތެރިކަމާއެކު ޖެޓަށް ބޭނުންވާ މިސައިލާއި އެކި ވެހިކަލްތައް ވެސް ގަންނަން މަސައްކަތް ކުރަމުންނެވެ.
އެމެރިކާއިން އިޒްރޭލަށް ހަތިޔާރު ފޯރުކޮށްދޭތީ އެކަމަށް ގިނަ ބަައެއްގެ ފާޑު ކިޔުން އަންނަނީ އަމާޒުވަމުންނެވެ. އެއީ އެ ގައުމުން އެމެރިކާގެ ހަތިޔާރު ބޭނުން ކޮށްގެން ގާޒާގައި ގަތުލްއާންމާ ހިންގާތީ އެވެ.
އިޒްރޭލުން ގާޒާގައި ހިންގާ ގަތުލްއާންމުގައި މިހާތަނަށް 40،000 އާ ގާތް ކުރާ އަދަދަކަށް މީހުން ވަނީ މަރާލައިފަ އެވެ. އޭގެ ތެރޭގައި ގިނައީ ކަމާ ނުބެހޭ ކުޑަކުދިންނާއި އަންހެނުންނެވެ.
އިޒްރޭލުން ހިންގާ ގަތުލްއާންމު ހުއްޓުވަން މުޅި ދުނިޔެ ވަނީ ހުއްޓިފަ އެވެ. އެމެރިކާއިން އެކަން ހުއްޓުވަން މަސައްކަތް ކުރާ ކަމަށް ބުނި ނަމަވެސް އިޒްރޭލާއެކު އެއްބަސްވުމަކަށް އާދެވިފައެއް ނުވެ އެވެ.
