މާލޭގެ ގެސްޓް ހައުސްއަކަށް ދެ މީހަކު ވަދެ، ވަޅިން ބިރު ދައްކައި އެތަނުގައި ހުރި ފައިސާ އާއި ފޯނުތައް ފޭރިގެންފި އެވެ.
މުއިވެޔޮ މަގުގައި ހުންނަ އެ ގެސްޓުގެ ވެރިމީހާ "އަދަދު" ނޫހަށް ބުނީ ފޭރިގަތް ދެ ފިރިހެނުން ގެސްޓު ހައުސް އަށް ވަނީ ހުސް ކޮޓަރި ހުރިތޯ ބެލުމަށް ކަމަށް ބުނެފައި ކަމަށެވެ.
ކޮޓަރި އެ ވަގުތު ނެތް ކަމަށް ބުނުމުން ވެސް ތަން ދޫކޮށް ނުގޮސް، ކައުންޓަރުގައި އިން އަންހެން ކުއްޖާ އަށް ވަޅިން ބިރު ދައްކައި، އެ ކުއްޖާގެ މޯބައިލް ފޯނާއި ގެސްޓު ހައުސްގެ މޯބައިލް ފޯނު އަދި ވަތްގަނޑުގައި ހުރި 2،400 ގެންދިޔަ ކަމަށް އޭނާ ބުންޏެވެ.
"އެކަން ހިނގީ ރޭ 9:30 ހާއިރު. ފޭރިގަތް ތަކެތި ހިފައިގެން އެ މީހުން ފިލީ. އެ ވަގުތު ގެސްޓު ހައުސްގައި ހުރީ ވެސް ކައުންޓަރުގައި އިން އަންހެން ކުއްޖާ އެކަނި،" ގެސްޓު ހައުސްގެ ވެރިޔާ ބުންޏެވެ.
ސީސީޓީވީގެ ފުޓޭޖުތަކުން ފެންނަ ގޮތުގައި ގެސްޓު ހައުސްއިން ފޭރުގަތް ދެ މީހުން ވެސް ތިބީ ވާރޭ ކޯޓު ލައިގެންނެވެ. އެކަކެއްގެ ބޮލުގައި ތޮއްޕެއް އަޅާފައި ހުރުމުން، ފުޓޭޖުން އޭނާގެ މޫނު ސާފެއް ނުވެ އެވެ. ދެވަނަ މީހާ މޫނު ނިވައިކޮށްގެން ހުރީ ވާރޭ ކޯޓުގައި ހުންނަ ބޮލަށް މަހާލާ ބައިންނެވެ.
މި މައްސަލައާ ބެހޭ މައުލޫމާތު އަދި ފުލުހުން ހާމަނުކުރެ އެވެ. ގެސްޓު ހައުސްއިން މި މައްސަލަ ޕޮލިހަށް ހުށަހެޅި އެވެ.
