ބަހްރެއިންގެ ފޮރިން މިނިސްޓަރު އަބްދުއްލަތީފް ބިން ރާޝިދު ޒަޔާނީގެ ދައުވަތަކަށް، ފޮރިން މިނިސްޓަރު މޫސާ ޒަމީރު ރޭ އެ ގައުމަށް ފުރާވަޑައިގެންފި އެވެ.
ފޮރިން މިނިސްޓްރީން ބުނީ، މި ދަތުރުގައި ދެ ގައުމުގެ ޒަމާންވީ ގުޅުން އިތުރަށް ބަދަހި ކުރުމަށާއި ދެ ގައުމުގެ މަސްލަހަތު އޮތް ކަންކަމުގައި އެއްބާރުލުން ދިނުމާ ގުޅޭ ގޮތުން މިނިސްޓަރު ޒަމީރު އާއި ބަހްރެއިންގެ ފޮރިން މިނިސްޓަރު މަޝްވަރާ ކުރައްވާނެ ކަމަށެވެ.
މި މަހުގެ 11-15 ކުރައްވާ ދަތުރުގައި ބަހްރެއިންގެ ފިނޭންސް އެންޑް ނޭޝަނަލް އިކޮނޮމީ މިނިސްޓަރާއި، އޮއިލް އެންޑް އެންވަޔަރަންމަންޓް މިނިސްޓަރު އަދި ޓޫރިޒަމް މިނިސްޓަރާ ވެސް ބައްދަލު ކުރައްވައި، އެ ދާއިރާތަކުން ގުޅުން ބަދަހި ކުރުމާ ގުޅޭ ގޮތުން މަޝްވަރާ ކުރައްވާނެ އެވެ.
މިއީ ރާއްޖެއިން ބަހްރެއިންއާއެކު ސިޔާސީ ގުޅުން ގާއިމު ކުރިތާ 44 އަހަރު ފުރޭ އަހަރެވެ.
މިނިސްޓަރު ޒަމީރުގެ އަރިހުގައި އެމްބަސަޑާ އެޓް-ލާޖު އަހުމަދު ނަސީރާއި ބައިލެޓްރަލް ސެކްރެޓަރީ ހާލާ ހަމީދާއި ޖޮއިންޓު ސެކްރެޓަރީ މަރިޔަމް ރީޝާގެ އަދި އެސިސްޓެންޓް ޑިރެކްޓަރު މިޒްނާ ވަހީދު ބައިވެރިވެވަޑައިގަންނަވަ އެވެ.
