އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގާ ލާއިންސާނީ ގަތުލުއާންމާ ދެކޮޅަށް ޖިހާދުކުރާ ހަމާސްގެ އާ ލީޑަރަކަށް ޔަހްޔާ ސިންވާ, 61، ހަމަޖައްސައިފި އެވެ.
އެ ޖަމާއަތުގެ އާ ލީޑަރަކަށް ސިންވާ ހަމަޖެއްސީ، ކުރީގެ ލީޑަރު އިސްމާއިލް ހަނިއްޔާ އިރާނުގައި ހުންނަވަނިކޮށް ޖުލައި، 31، ގައި އިޒްރޭލުން ހަމަލާދީ އަވަހާރަކޮށްލުމާ ގުޅިގެންނެވެ.
"ހަމާސްގެ ޕޮލިޓިކަލް ބިއުރޯގެ އިސްވެރިޔަކަށް ޔަހްޔާ ސިންވާ ހަމަޖެއްސުމަށް ވަނީ ނިންމާފައި. އެގޮތަށް ނިންމީ ކުރިން އެ މަގާމު ފުރުއްވި ހަނިއްޔާ އަވަހާރަކޮށްލުމުން،" ހަމާސްއިން ބުންޏެވެ.
އިޒްރޭލަށް އަރައި މިދިޔަ އަހަރުގެ އޮކްޓޯބަރު 7، ގައި ހަމާސްއިން ދިން ހަމަލާ ރޭވުމުގައި އިސްކޮށް ހަރަކާތްތެރިވި ސިންވާއަށް ލުބުނާނުގެ ހިޒްބުއްލާގެ އިތުރުން އެކި ޖަމާއަތްތަކުން އަންނަނީ މަރުހަބާ ކިޔަމުންނެވެ.
ހަނިއްޔާ އަވަހާރަކޮށްލުމާ ގުޅިގެން އިރާނުން ރައްދުގައި ވަރުގަދަ ހަމަލާތަކެއް ދިނުމަށް ތައްޔާރުވަމުންދާ ކަމަށް މީޑިއާތަކުން ރިޕޯޓު ކުރި ނަމަވެސް، އިރާނުން ހަމަލާދޭނީ ކޮން އިރަކު ކަމެއް ކަށަވަރެއް ނުވެ އެވެ.
އިޒްރޭލުން ފަލަސްތީނުގައި ހިންގަމުންދާ ގަތުލްއާންމުގައި މިހާތަނަށް 40،000 އާ ގާތްކުރާ އަދަދަކަށް މީހުން ވަނީ މަރާލައިފަ އެވެ. އޭގެ ތެރޭގައި އެންމެ ގިނައީ ކަމާ ނުބެހޭ ކުޑަކުދިންނާއި އަންހެނުންނެވެ.
ހަމަލާތަކުގައި 2.3 މިލިއަން މީހުންގެ އާބާދީއެއް އޮންނަ ފަލަސްތީނުގެ ހުރިހާ އެންމެން ކހަލަ ގޮތަކަށް ވަނީ ހާލުގައި ޖެހިފަ އެވެ.
