އެއް ލީޓަރަށް ވުރެ ކުދި ޕްލާސްޓިކް ފެން ފުޅި މަނާކުރުން ފަސްކުރީ އަތޮޅުތެރޭގައި ފެނުގެ ނިޒާމު ތަރައްގީކުރަން ވަގުތު ދިނުމުގެ ބޭނުމުގައި ކަމަށް އެންވަޔަރަމަންޓު މިނިސްޓަރު ޑރ. ތޯރިގު އިބްރާހިމް ވިދާޅުވެއްޖެ އެވެ.
ސިންގަލް ޔޫޒް ޕްލާސްޓިކް މަނާކުރުމުގެ ގަރާރުގައި ކުރިން އޮތީ މި އަހަރުގެ ނޮވެމްބަރުން ފެށިގެން މި ސައިޒުގެ ފެން ފުޅި މަނާކުރާ ގޮތަށެވެ. ނަމަވެސް ނިމުނު ހަފުތާގެ ތެރޭގައި މި ގަރާރު އިސްލާހުކޮށް ސަރުކާރުން ވަނީ އެ ތާރީހު މާޗު، 2026 އަށް ފަސްކޮށްފަ އެވެ.
މިއީ މި ތާރީހު ފަސްކުރި ދެވަނަ ފަހަރެވެ. މިކަން ކުރި ސަބަބާ ގުޅޭ ގޮތުން "އަދަދު" އިން ސުވާލުކުރުމުން ލިޔުމުން ދެއްވި ޖަވާބުގައި ތޯރިގު ވިދާޅުވީ، އެއް ފަހަރު ބޭނުންކޮށްފައި އުކާލާ ބާވަތުގެ ޕްލާސްޓިކު މަނާކުރަން މި ސަރުކާރުން ވެސް ބޭނުންވާ ކަމަށެވެ.
"މި ބާވަތުގެ ޕްލާސްޓިކުތަކުން ތިމާވެއްޓަށް، ހާއްސަކޮށް ކަނޑުގެ ވެއްޓަށާއި ދިރުންތަކަށް, ގެއްލުންވާކަން ގަބޫލުކުރަން" އޭނާ ވިދާޅުވި އެވެ.
ނަމަވެސް މި ވަގުތަށް 500 މިލިލީޓަރާއި އެއް ލީޓަރުގެ ފެން ފުޅި މަނާކުރެވެން ނެތީ ބައެއް ރަށްރަށުގައި ސާފު ބޯފެން ލިބޭނެ ގޮތެއް ނެތުމުން ކަމަށް ތޯރިގު ވިދާޅުވި އެވެ. އަދި މިހާރު މިކަން ކޮށްފި ނަމަ އެ ތަކުލީފު އުފުލަން ޖެހޭނީ ރައްޔިތުން ކަމަށް ވެސް އޭނާ ވިދާޅުވި އެވެ.
"ގިނަ ރަށްރަށުގައި ފެން ފޯރުކޮށްދެވޭނެ އެކަށީގެންވާ ނިޒާމެއް ނެތް. މި މަސައްކަތް ކުރަން ކޮންޓްރެކްޓުތައް އެވޯޑުކުރެވި، އެކި މަޝްރޫއުތައް އެކި މަރުހަލާތަކުގައި ހުރުމުން، މިހާރު ޕްލާސްޓިކު ފުޅިތައް މަނާކޮށްފި ނަމަ އެ ބުރަ އުފުލަން ޖެހޭނީ ރައްޔިތުން" ތޯރިގު ވިދާޅުވި އެވެ.
ސިންގަލް ޔޫސް ޕްލާސްޓިކު މަނާކުރުމުގެ އިތުރުން، މި ބާވަތުގެ ޕްލާސްޓިކު މަދުކުރަން ސަރުކާރުން ވިސްނާ އެހެން ދެ ކަމެއް ވެސް ތޯރިގު ހިއްސާ ކުރެއްވި އެވެ.
އެއް ކަމަކީ ޕްލާސްޓިކު އުފައްދާ މީހުން ޒިންމާދާރުކުރުވަން "އެކްސްޓެންޑަޑް ޕްރޮޑިއުސާ ރެސްޕޮންސިބިލިޓީ" (އީޕީއާރު) ގެ ގާނޫނީ އޮނިގަނޑެއް އެކުލަވާލުމެވެ. ދެވަނަ ކަމަކީ އަމިއްލަ ވިޔަފާރިތަކާއި މަދަނީ ޖަމިއްޔާތަކަށް މަންފާތަކެއް ދީގެން ރީސައިކަލް ކުރަން (އަލުން ބޭނުން ކުރަން) ބާރު އެޅުމެވެ.
ޕްލާސްޓިކު ފޭސް އައުޓް ކުރުން ނުވަތަ މަނާކުރުމުގެ ޕްރޮގްރާމް ހިންގަނީ ކުނި މެނޭޖް ކުރުމުގެ ގާނޫނުގެ ދަށުންނެވެ. އެ ގާނޫނުގައި އޮންނަ ގޮތުން މަނާވާނެ ޕްލާސްޓިކުގެ ބާވަތްތަކާއި ތާރީހުތައް ކަނޑައަޅަންޖެހެނީ ރައީސެވެ.
ޕްލާސްޓިކް މަނާކުރުމުގެ ގަރާރުގެ ދަށުން މިހާތަނަށް ބޭނުންކުރުން ހުއްޓާލާފައިވާ ބާވަތްތަކުގެ ތެރޭގައި ކުދި ކޮތަޅާއި، ސުޕާރީ، އެންމެ ކުދި ފެން ފުޅީގެ އިތުރުން ޕްލާސްޓިކު ކާތައްޓާއީ ޖޫސް ޕެޓީ ކޮތަޅު ފަދަ އެއްޗެހި ހިމެނެ އެވެ.
