ޓެކްސީ ލައިނެއްގެ ހިދުމަތް ދިނުމަށް ސަރުކާރުން މަސައްކަތް ކުރަމުން ދާތީ އެކަމާ ދެކޮޅަށް ޓެކްސީ ޑުރައިވަރުން އިހުތިޖާޖު ކުރަން ނުކުމެއްޖެ އެވެ.
ޓެކްސީ ޑުރައިވަރުން އިހުތިޖާޖު ކުރަމުން ދަނީ ހުޅުމާލެ ރުއްގަނޑު އެކެއްގަ އެވެ. އެ އިހުތިޖާޖުގައި މިހާރު ވެސް 70 ވަރަކަށް ކާރު ޑުރައިވަރުން ބައިވެރިވާ ކަމަށް އިހުތިޖާޖުގައި ބައިވެރިވާ މިސްބާހު ޝަރީފް ބުންޏެވެ.
"މިހާރު ވެސް 70 ވަރަކަށް ކާރު ޑުރައިވަރުން މިތަނުގައި އެބަ ތިބި، އަދި އިތުރު ޑުރައިވަރުން ވެސް ބައިވެރިވުމަށް އެބަ އާދޭ، މިއަދު މިކަން ކޮޅެއްގައި ޖައްސާނަން،" މިސްބާހު ބުންޏެވެ.
މާލެ ސަރަހައްދުގައި ޓެކްސީ ލައިނެއްގެ ހިދުމަތް ފަށަން ނިންމާފައިވާކަން ސަރުކާރުން އިއުލާނު ކުރީ މާލެފަހި ޕްރޮގުރާމު އިފުތިތާހު ކުރުމަށް ޖުލައި 25، ގައި ބޭއްވި ޖަލްސާގަ އެވެ.
މާލެފަހި ޕްރޮގުރާމުގެ ކަރުދާހުގައި ހިމަނާފައިވާ މައުލޫމާތުގައި ވަނީ ސަރުކާރުން ޓެކްސީ ލައިނެއް ތައާރަފު ކުރަނީ ޒަމާނީ އަދި ރައްކާތެރި ޓެކްސީ ލައިނެއް ތައާރަފު ކުރުމުގެ މަގުސަދުގައި ކަމަށެވެ. އަދި އެ ލައިނުގެ ކާރުތައް ފްރީލާންސް އުސޫލުން ވަކި އެޕްލިކޭޝަނަކުން ކޮންޓްރޯލުކޮށްގެން ދުއްވުމުގެ ޝައުގުވެރިކަން ހުރި ދިވެހީންނަށް ހުޅުވައިލުމަށް ނިންމާފައިވާ ކަމަށް ވެސް އެ ކަރުދާހުގައި ލިޔެފައިވެ އެވެ.
ސަރުކާރުގެ އެ ނިންމުމާ ދެކޮޅު ހަދައި އިހުތިޖާޖު ކުރަމުންދާ ޓެކްސީ ޑުރައިވަރުންގެ ކަންބޮޑުވުން ގުޅިފައި އޮތީ ދިވެހި އެތައް އާއިލާއަކާ ކަމަށް މިސްބާހު ބުންޏެވެ.
"ސަރުކާރުން ޓެކްސީގެ ހިދުމަތް ފަށައިފިއްޔާ ޓެކްސީ ދުއްވާ އެތައް ބަޔަކަށް ގެއްލުން ލިބޭނެ، ބޮޑެތި ލޯނުތައް ނަގައިގެން ކާރުތައް ގަނެގެން ދުއްވާ ޑުރައިވަރުން އެބަތިބި، ވާހަކައަކީ 3500 ޓެކްސީ ޑުރައިވަރުންގެ އާއިލާތަކަށް ގެއްލުން ވާނެޔޭ އެ ނިންމުމުގެ ސަބަބުން،" މިސްބާހު ބުންޏެވެ.
އޭނާ ބުނީ ސަރުކާރުން ޓެކްސީ ލައިނެއްގެ ހިދުމަތް ދޭން ފަށަން ތައްޔާރުވަމުން ދާއިރު، މިހާރު ވެސް މާލޭގައި ދުއްވާ ކާރުތައް ޕާކު ކުރެވޭނެ ޖާގައެއް މާލޭގައި ނެތް ކަމަށެވެ.
"ޕާކިން ޒޯނެއް ސަރުކާރަކަށް ނުދެއްކޭ، އެކަމަކު ޓޯ ކޮށްފައި ކާރުތައް ބަހައްޓަން ވީމާ ޖާގަ އެބަ އޮވޭ، ޓޯ ކުރާ ކާރުތަކަށް ބޮޑެތި ގެއްލުން ވެސް ލިބިފައި އެބަހުރި ފޯކުލިފްޓުގެ ދަތްގަނޑު ޖަހާތީ، މި ހުރިހާ ކަމަކަށް ހައްލެއް ހޯދުމަށް އިހުތިޖާޖު މިކުރަނީ،" މިސްބާހު ބުންޏެވެ.
ޓެކްސީ ޑުރައިވަރުންގެ ހުރި ކަންބޮޑުވުންތައް ޓްރާންސްޕޯޓު މިނިސްޓަރު، މުހައްމަދު އަމީން އާ ބައްދަލު ކުރުމަށް އެދުމުން އެކަމަށް އިޖާބަ ދީފައި ނުވާކަމަށް މިސްބާހު ބުންޏެވެ.
ސަރުކާރުން ޓެކްސީ ހިދުމަތް ދިނުމަށް ނިންމާފައިވާއިރު، ޓެކްސީގެ ހިދުމަތް މިހާރު ދޭ އަމިއްލަ ފަރާތްތަކުން ކަން ކުރާ ގޮތާ މެދު އާންމުންގެ ހިތްހަމަނުޖެހުން އަބަދުވެސް އޮވެ އެވެ.
އެ މައްސަލަތަކަށް ހައްލެއް ހޯދައިދިނުމަށް ކޮންމެ ސަރުކާރަކުން ވެސް މަސައްކަތް ކުރެ އެވެ.
