އެއް ލީޓަރާއި އެއް ލީޓަރަށް ވުރެ ކުދި ޕްލާސްޓިކު ފުޅި އުފެއްދުމާއި އެތެރެކުރުމާއި ބާޒާރަށް ނެރުން މަނާކުރާ ތާރީހު ދެވަނަ ފަހަރަށް ފަސްކުރަން ސަރުކާރުން ނިންމައިފި އެވެ.
ސިންގަލް-ޔޫސް ޕްލާސްޓިކުގެ ބާވަތްތަކުގެ ލިސްޓު ކަނޑައެޅުމުގެ ގަރާރުގައި ކުރިން އޮތީ އަންނަ ނޮވެމްބަރުން ފެށިގެން މަނާކުރާ ގޮތަށެވެ. އެއީ ރައީސް ޑރ. މުހައްމަދު މުއިއްޒު މިދިޔަ ނޮވެމްބަރުގައި އެ ގަރާރަށް ގެނައި އިސްލާހެއްގެ ދަށުންނެވެ.
ނަމަވެސް އެ ގަރާރަށް އިއްޔަ ގެނައި އިސްލާހެއްގެ ދަށުން، އެއް ލީޓަރު ސައިޒުގެ ފެން ފުޅި މަނާކުރާ ތާރީހު ވަނީ މާޗު 2026 އަށް ފަސްކޮށްފަ އެވެ. މީގެ ކުރިން ވެސް މި ގަރާރުގައި ހުރި ބައެއް ތާރީހުތަކަށް އަމަލުކުރުން އެކި ސަބަބުތަކާ ހުރެ ފަސްކޮށްފައިވެ އެވެ.
މި ފަހަރު ފަސްކުރި ސަބަބު ސާފުކުރަން އެންވަޔަރަމަންޓު މިނިސްޓަރު ޑރ. ތޯރިގު އިބްރާހިމްއަށް ގުޅުމުން، އޭނާ ފޯނަށް ޖަވާބު ނުދެއްވާތީ މިހާ ދިގު މުއްދަތަކަށް ފަސްކުރަން ނިންމި ސަބަބު ސާފެއް ނުވި އެވެ.
ޕްލާސްޓިކު ފޭސް އައުޓް ކުރުން ނުވަތަ މަނާކުރުމުގެ ޕްރޮގްރާމް ހިންގަނީ ކުނި މެނޭޖް ކުރުމުގެ ގާނޫނުގެ ދަށުންނެވެ. އެ ގާނޫނުގައި އޮންނަ ގޮތުން މަނާވާނެ ޕްލާސްޓިކުގެ ބާވަތްތަކާއި ތާރީހުތައް ކަނޑައަޅަންޖެހެނީ ރައީސުލްޖުމްހޫރިއްޔާ އެވެ.
ޕްލާސްޓިކް މަނާކުރުމުގެ ގަރާރުގެ ދަށުން މިހާތަނަށް ބޭނުންކުރުން ހުއްޓާލާފައިވާ ބާވަތްތަކުގެ ތެރޭގައި ކުދި ކޮތަޅާއި، ސުޕާރީ، އެންމެ ކުދި ފެން ފުޅީގެ އިތުރުން ކާތައްޓާއީ ޖޫސް ޕެޓީ ކޮތަޅު ފަދަ އެއްޗެހި ހިމެނެ އެވެ.
