ބިންވެރިޔާ ސްކީމުގެ ދަށުން މާލޭ މީހުންނަށް ގޯތި ދޫކޮށްފައިވާ ގިރާވަރު ފަޅުގެ ބިން ހިއްކުމުގެ މަސައްކަތް ނިންމުމަށް ސަރުކާރުން އެ މަސައްކަތް ކުރާ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ) އަށް 46 މިލިއަން ރުފިޔާ ދީފި އެވެ.
"އަދަދު" އަށް ކަށަވަރުވެފައިވާ ގޮތުގައި ފިނޭންސް މިނިސްޓްރީން މި ފައިސާ ދޫކުރީ ގިރާވަރު ތަރައްގީކުރަން ހަވާލުކޮށްފައިވާ ފަންޑު މެނޭޖުމަންޓު ކޯޕަރޭޝަނާ އެވެ. އެ ކުންފުނިން ޖުލައި 23، ގައި ވަނީ އެ ފައިސާ ބިން ހިއްކުމުގެ މަސައްކަތް ކުރާ ސީއެމްސީސީއަށް ދީފަ އެވެ.
ގިރާވަރު ފަޅު ހިއްކުމުގެ އަމަލީ މަސައްކަތް ކުރަނީ ނެދަލޭންޑްސްގެ ބޮސްކާލިސް އިންނެވެ. އެ މަޝްރޫއު ހިންގަނީ ސީއެމްސީސީ އަދި ބޮސްކާލިސް އިން އެކުގައި ހަދާފައިވާ ޖޮއިންޓް ވެންޗާ އަކުންނެވެ.
މި ސަރުކާރުން ހިންގާ އެންމެ ބޮޑު ތަރައްގީގެ މަޝްރޫއު ކަމަށްވާ ފުށިދިއްގަރު ހިއްކުމުގެ މަސައްކަތްވެސް ސަރުކާރުން ފުރަތަމަ ހަވާލުކުރީ ސީއެމްސީސީއާ އެވެ. ނަމަވެސް އެ އެއްބަސްވުން މިހާރު ވަނީ ބާތިލުކޮށްފަ އެވެ. އަށް މަހުން ނިންމާނެ ކަމަށް ބުނެ ފެށި އެ މަޝްރޫއަށް ހަތް މަސްވީއުރު ހިއްކަން ނިންމި ބިމުގެ ތިން ޕަސެންޓުވެސް ނުނިމެ އެވެ.
ގިރާވަރުފަޅު ހިއްކުމުގެ މަސައްކަތް ކުރިއަށް ގޮސްފައިވާ މިންވަރު އަންގައިދޭ ސެޓެލައިޓް ފޮޓޯތަކެއް؛ ކަނާތް ފަޅީގައި އެންމެ ފަހުން ލިބެންހުރި ސެޓެލައިޓް ފޮޓޮއާ ހަމައަށް ހިއްކާ ނިމުނު ވަރު އަދި ވާތް ފަޅީގައި މިދިޔަ އަހަރުގެ އޮކްޓޫބަރުގައި ހިއްކާފައިވާ މިންވަރު --- ފޮޓޯ: މެކްސާ ޓެކްނޮލޮޖީސް
ފައިސާ ދޫކުރުމާއެކު ބޮސްކާލިސް އިން ރާއްޖޭގައި ބިން ހިއްކުމަށް ގެންގުޅޭ ޑްރެޖަރު "ވިލަމް ވެން އޮރެންޖު" ގިރާވަރު ފަޅު ކައިރިއަށް ގޮސްފައިވެ އެވެ. ނަމަވެސް ކަނޑު އުޅަނދުތަކުގެ ހަރަކާތްތައް ޓްރެކް ކުރާ ސައިޓުތަކުން ދައްކާ ގޮތުން އެ ޑްރެޖަރުން ގިރާވަރުފަޅު ހިއްކުމުގެ މަސައްކަތް އަދި ނުފަށަ އެވެ.
ތިން ފިޔަވައްސަކަށް ބަހާލައިގެން ހިއްކާ ގިރާވަރު ފަޅުގެ ފުރަތަމަ ދެ ފިޔަވަހީގެ މަސައްކަތް ނިންމުމަށް މިހާރު ކުރިއަށް ދަނީ ތިންވަނަ ފިޔަވަހީގެ ދަށުން ހިއްކަން ޖެހޭ 90 ހެކްޓަރު ހިއްކުމުގެ މަސައްކަތެވެ.
ސަރުކާރުން މި މަޝްރޫއުގެ ތަފުސީލެއް ހާމަނުކުރި ނަމަވެސް، ސެޓްލައިޓު ފޮޓޯތައް ދައްކާ ގޮތުން މަޝްރޫއުގެ 80 ޕަސެންޓު ވަރު ހިއްކާ ނިމިއްޖެ ކަމަށް އަންދާޒާކުރެވެ އެވެ.
އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) އިން ދޫކޮށްފައިވާ ބިން ހިއްކުމުގެ ހުއްދަ ހަމަވަނީ އަންނަ މަހުގެ 12 ގަ އެވެ. އެހެންކަމުން ކުރިއަށް އޮތް 22 ދުވަހުގެ ތެރޭގައި ގިރާވަރު ފަޅު އެއްކޮށް ހިއްކައި ނިންމަން ޖެހޭނެ އެވެ. ނޫނީ އީޕީއޭގައި އެދިގެން ހުއްދައިގެ މުއްދަތު އިތުރުކުރަން ޖެހޭނެ އެވެ.
ބިންވެރިޔާ ސްކީމުގެ ދަށުން ގިރާވަރުފަޅުން ވެސް ގިނަ އަދަދެއްގެ ގޯތިތަކެއް ދޫކޮށްފައިވާއިރު، މި ސަރުކާރުން ވަނީ އެތަނުން ގޯތިތަން ގުޅީފަޅަށް ބަދަލުކުރުމުގެ ފުރުސަތު ހުޅުވާލާފަ އެވެ. މި ފުރުސަތުގައި 2210 މީހުން އެ ކަމަށް އެދި ފޯމު ހުށަހެޅި އެވެ.
