ދައުލަތުގެ މީޑިއާ ޕަބްލިކް ސާވިސް މީޑިއާ (ޕީއެއެސްއެމް) ގެ ކުރީގެ މެނޭޖިން ޑިރެކްޓަރު އިބްރާހިމް ހަލީލް އެ މަގާމުގައި ހުންނެވިއިރު އެމްޑީގެ އޮފީސް (ބިއުރޯ) ހެދުމަށް ހަރަދުވި ފައިސާ އާޓިޝަން ޕްރައިވެޓް ލިމިޓެޑަށް ނުދީގެން، އެތާ ކުރިމަތީގައި މީހަކު އިހުތިޖާޖު ކުރަން ފަށައިފި އެވެ.
ހއ. ހޯރަފުއްޓަށް ނިސްބަތްވާ އަހުމަދު ރަޝީދު "އަދަދު" އާ ވާހަކަ ދައްކަމުން ބުނީ އިހުތިޖާޖު ކުރަމުންދަނީ ކުރީގެ ރައީސް އަބްދުﷲ ޔާމީންގެ ދައުރު ނިމެނިކޮށް ހަލީލްގެ ބިއުރޯ ހެދުމަށް ހަރަދުވި ފައިސާ ހޯދުމަށް މިއަދާ ހަމައަށް ވެސް ކުރި މަސައްކަތަށް ކުރިއެރުމެއް ލިބިފައި ނުވާތީ ކަމަށެވެ.
އެ ފައިސާ ނުލިބިގެން ސިވިލް ކޯޓަށް ދިޔުމުން، އެ ފައިސާއަކީ ދޭން ޖެހޭ ފައިސާ ކަމަށް ޕީއެސްއެމްއިން އެއްބަސްވި ކަމަށާއި ނަމަވެސް ފައިސާ ދޭން ކޯޓުން ހުކުމް ކުރުމުން އެ ހުކުމް ޕީއެސްއެމްއިން އިސްތިއުނާފު ކުރި ކަމަށް އޭނާ ބުންޏެވެ.
"ސިވިލް ކޯޓަށް ވަނީމަ، ސިވިލް ކޯޓަށް މި ބޭފުޅުން ހުށަހަޅާފައިވާ ބަޔާނުގައި އިންނަނީ އަޅުގަނޑު އާޓިޝަން ފަރާތުން ދޮގު ދައުވާއެއް ކުރާ ކަމާއި ދުނިޔޭގައި ނެތް ތަނެއްގެ ވާހަކަ ދައްކާ ކަމާއި ވަގު ލިޔުންތަކެއް ހަދައިގެން އުޅޭ ކަމަށް. ދެން އަޅުގަނޑުމެން ހުށަހެޅީ 250 ފޮޓޯއާއި 700 އަށްވުރެ ގިނަ ބިލާއި 13 ހެކިންނާއި. ފުރަތަމަ ދުވަހު ދެ ހެކިންގެ ހެކިބަސް ނެގިއިރަށް ޕީއެސްއެމްގެ ލޯޔަރު ތެދުވެ މި ބުނަނީ މިހާރު ތިމަންނަމެން ގަބޫލުކުރަމޭ ތިއީ އާޓިޝަންއިން ކޮށްފައި ހުރި ކަމެއް ކަމަށް،" އަހުމަދު ރަޝީދު ބުންޏެވެ.
އޭނާ ބުނީ އިސްތިއުނާފް މަރުހަލާ ނިމުނުތާ ދެ އަހަރު ފަހުން، ސިވިލް ކޯޓުން އަމުރެއް ނެރުނީ ސިވިލް ކޯޓުގެ އަމުރާ އެއްގޮތަށް ޕީއެސްއެމްއިން ކޯޓަށް ފައިސާ ދެއްކުމަށް ކަމަށާއި ނަމަވެސް މިއަދާ ހިސާބަށް ވެސް އަމުރާ އެއްގޮތަށް ޕީއެސްއެމްއިން ފައިސާ ދައްކާފައި ނުވާ ކަމަށެވެ.
ފައިސާ ނުދައްކާ ހަ އަހަރު ފާއިތުވެދިޔުމުން ބޮޑެތި ގެއްލުންތަކެއް ވެފައިވާކަން ފާހަގަކުރައްވާ އަހުމަދު ރަޝީދު ބުނީ ޕީއެސްއެމްގެ މިހާރުގެ މެނޭޖްމަންޓާ މިކަމާ ގުޅިގެން ބައްދަލުކުރަން ދިޔުމުން ބައްދަލު ނުކޮށް ފިލާފައިވާ ކަމަށާއި ކިރިއާ ވެސް ކޮޅަށް ހުރެވޭނަމަ ހުންނާނީ ފައިސާ ހޯދަން ޕީއެސްއެމް ދޮށުގައި ކަމަށެވެ.
އެ ތަނުގައި ރަޝީދު ހުއްޓައި ޕީއެސްއެމްގެ އެމްޑީ ޒީނާ ޒާހިރު އޭނާއާ ބައްދަލުކޮށް ވާހަކަ ދެއްކި އެވެ. ނަމަވެސް, ދެއްކީ ކޮން ވާހަކައެއް ކަމެއް, މި މައްސަލައަށް ހޯދައިދިނީ ކޮން ހައްލެއް ކަމެއް ނޭނގެ އެވެ.
ޕީއެސްއެމްގެ މައްޗަށް އެޕްރިލް، 29، 2021 ގައި ސިވިލް ކޯޓުން ހުކުމްކުރީ 4،516،694.10ރ. އާޓިޝަންއަށް ފައިސާ ދެއްކުމަށެވެ. ނަމަވެސް ލިބުނު ގެއްލުމުގެ ބަދަލު ނުދެވޭނެ ކަމަށް އޭރު ހުކުމް ކުރި އެވެ. އެ ފައިސާ ސިވިލް ކޯޓުގެ ހުކުމާ އެއްގޮތަށް ދައްކާނެ ކަމަށް ޕީއެސްއެމްއިން އެއްބަސްވެސްވި އެވެ.
ޕީއެސްއެމް މައްސަލަތަކުން ފުރިފައި
ކޯޓުގައި ހިނގަމުންދާ މައްސަލަތަކެއްގައި ހިމެނޭ ފައިސާތަކެއް ދޫނުކޮށްގެން ޕަބްލިކް ސާވިސް މީޑިއާގެ ފައިނޭންސް ހެޑު އަހުމަދު ހަނީފް ސަސްޕެންޑު ވެސް ކުރި އެވެ. ހަނީފަށް އެންގީ ކުރީގެ ރައީސް އަބްދުﷲ ޔާމީންގެ ވެރިކަމުގައި އެ ކުންފުނިން ކުރުވި މަސައްކަތްތަކެއްގެ ފައިސާ ދޫކުރާށެވެ. މިހާތަނަށް ފައިސާ ދޫކޮށްފައި ނުވަނީ އިންވޮއިސް އަދި ބިލު ފަދަ ތަކެތި ހަމަނުވެގެންނެވެ. އެ މައްސަލަތައް މިހާރު އޮތީ ކޯޓުގަ އެވެ.
ނަމަވެސް ޕީއެސްއެމްއިން ހަނީފަށް އެންގީ ކޯޓުގައި ހިނގަމުންދާ މައްސަލަތަކުގައި ހިމެނޭ ފައިސާތައް ދޫކުރުމަށެވެ. އެކަމަށް އޭނާ އިންކާރު ކުރުމުން މިހާރު ވަނީ މައްސަލައެއް ބަލަމުންދާ ކަމަށް ބުނެ ސަސްޕެންޑުކުރި އެވެ.
އޭގެ އިތުރުން، ހަނީފުގެ މައްސަލަ ބަލައި ނިމެންދެން އޭނާއަށް ކުންފުނީގެ ފަރާތުން ދީފައިވާ ހުރިހާ އެކްސެސްތަކެއް ބްލޮކް ކުރުމަށް މެނޭޖިން ޑައިރެކްޓަރު ޒީނާ ޒާހިރު އެންގި އެވެ.
ޕީއެސްއެމްގެ މެނޭޖިން ޑިރެކްޓަރުގެ މަގާމުގައި ރައީސް އޮފީހުގެ މިހާރުގެ ކޮމިއުނިކޭޝަން މިނިސްޓަރު ހަލީލު ހުންނެވިއިރު ލިޔެކިޔުން ނެތި އެ ކުންފުނިން ކުރުވި ބައެއް މަސައްކަތްތަކަށް އެއް މިލިއަނަށް ވުރެ ގިނަ ރުފިޔާ ވެސް ދޫކުރި އެވެ.
ޕީއެސްއެމްއިން އެ ފައިސާ ދޫކުރީ މިދިޔަ މެއި އަދި ޖޫން މަހުގެ ތެރޭގަ އެވެ. އެގޮތުން ޖުމުލަ 1،153،992ރ. ޕީއެސްއެމް އިން ދޫކުރި އެވެ. އެއީ ޖޭއެމްޖޭ އިންވެސްޓްމަންޓަށް ދޫކުރި 1،113،992ރ. އާއި އަބްދުﷲ އަޒްމީނަށް ދޫކުރި 40،000ރ. އެވެ.
ޖޭއެމްޖޭ އިންވެސްޓްމަންޓަށް ދޫކުރި 1.1 މިލިއަން ރުފިޔާގެ ތެރެއިން ހަތަރު ލައްކަ ރުފިޔާ ފޮނުވާފައި އޮތީ އެ ކުންފުނީގެ ވެރިޔާ ޔާސިރާ ޔޫސުފްގެ އެކައުންޓަށެވެ. ބާކީ ހަތް ލައްކަ ފޮނުވީ ކުންފުނީގެ އެކައުންޓަށެވެ. އެއީ މަރާމާތް ކުރުން، ކުލަ ލުން ފަދަ މަސައްކަތްތަކަށް ދައްކަންޖެހި ނުދައްކާ އޮތް ފައިސާ އެވެ.
ފުޓުބޯޅަ ކޮމެންޓޭޓަރު އަބްދުﷲ އަޒްމީނަށް ދޫކުރި ފައިސާއަކީ ވޯލްޑް ކަޕް 2018 އަށް މެގަޒިނެއް ތައްޔާރު ކުރުމަށްފަހު ދޭންޖެހޭ ފައިސާ އެވެ. އެ މެގަޒިން ޕްރިންޓު ކުރި ފަރާތަށް ވެސް ޕީއެސްއެމްއިން އޮތީ ފައިސާ ނުދީ އެވެ. ކޯޓުން އެ ފައިސާ ދޫކުރަން ހުކުމް ކުރުމުން މިހާރު ފައިސާ ނުދައްކާ ކަމެއް ނޭނގެ އެވެ.
އެ ހުރިހާ މަސައްކަތެއް ޕީއެސްއެމްއިން ކުރުވާފައި އޮތީ އެ ކުންފުނީގެ ޕްރޮކިއުމެންޓް އުސޫލާ ހިލާފަށެވެ. އަދި މަސައްކަތް ހަވާލު ކުރިކަމުގެ އަދި ނިންމިކަމުގެ ލިޔެކިޔުމެއް ވެސް ޕީއެސްއެމްއަކު ނެތެވެ.
ޕީއެސްއެމްއާ ދެކޮޅަށް މިހާރު ވެސް ކޯޓުގައި ގިނަ މައްސަލަތަކެއް އެބަ ހިނގަ އެވެ. އޭގެ ތެރެއިން ގިނައީ ކުންފުންޏާ ހަލީލު ހަވާލުވެ ހުންނެވިއިރު ކުރުވާފައިވާ މަސައްކަތްތަކަށް ނުދައްކާ އޮތް ފައިސާ އެވެ.
ޕީއެސްއެމްގެ މެނޭޖިން ޑިރެކްޓަރު ކަމާ ޒީނާ ނޮވެމްބަރު 14، 2023، ގައި ހަވާލުވި ދުވަހުން ފެށިގެން މިއަދާ ހަމައަށް ޒީޓައިމްސްގެ ނަމުގައި ހިންގާ ނޫސް ވެބްސައިޓުގައި ޒީނާގެ ބައިލައިނުގައި އަށް އާޓިކަލެއް ޕަބްލިޝް ކޮށްފައިވެ އެވެ.
ޕީއެސްއެމްގެ ބައެއް އެހެން ސީނިއާ މުވައްޒަފުން ވެސް ބައެއް އަމިއްލަ މީޑިއާތައް ހިންގުމުގައި އިސްކޮށް މަސައްކަތް ކުރާކަން މި ނޫހަށް ވަނީ އެނގިފަ އެވެ. އަދި އެފަދަ މައްސަލައެއްގައި މީގެ ކުރިން ބަޔަކަށް ފިޔަވަޅު އަޅާފައިވާކަން ވެސް އެނގިފައިވެ އެވެ.
