ޕެރިހުގައި މިހާރު ކުރިއަށްދާ އޮލިމްޕިކްސްގެ ބެޑްމިންޓަން އިވެންޓްގައި، މިއަދު ކުޅުނު މެޗުން، ރާއްޖޭގެ ފާތިމަތު ނަބާހާ (ނަބާ) އަތުން އެސްޓޯނިއާގެ ކްރިސްޓިން ކޫބާ މޮޅުވެއްޖެ އެވެ.
ދުނިޔޭގެ ރޭންކިންގެ 73 ގައި އޮތް ކޫބާ ސެޓުތައް ގެންދިޔައީ 21-07، 21-09 އިންނެވެ. ނަބާ، އަކީ ދުނިޔޭގެ ރޭންކިންގެ އަންހެން ސިންގަލްސް 111 ވަނަ އެވެ.
ފުރަތަމަ ސެޓު ފަށައިގެން، ނަބާހާ ފުރަތަމަ ޕޮއިންޓް ހޯދި ނަމަވެސް، ކޫބާ ވަނީ ނަތީޖާ އަނބުރާލައި، ކޮންޓްރޯލެއް ހޯދަން މަސައްކަތް ފަށައިފަ އެެވެ. އެކަމަކު، އޭގެ ފަހުން ވެސް ނަބާހާ ދެ ފަަހަރެއްގެ މަތިން އެއް ޕޮއިންޓުގެ ލީޑެއް ނެގި އެވެ. ކޫބާ އަށް ސެޓުގެ ކޮންޓްރޯލް ލިބުނީ، 5-5 އިން އެއްވަރުވި ފަހުންނެވެ. އޭގެ ފަހުން، ލީޑުފުޅާކޮށް، ރެލީތަކުގައި ނަބާހާ އަށް ޕްރެޝަރު ބޮޑުކޮށް ކުޅެ، ރަނގަޅު ފަރަގަކާ އެކު، 21-07 އިން ސެޓު ގެންދިޔަ އެވެ.
ކޫބާ ވަނީ ފުރަތަމަ ސެޓު ނިންމާލި ހިސާބުން އެ ކޮންފިޑެންސާ އެކު، ދެ ވަނަ ސެޓުގައި ކުޅެން ފަށައި، ތިން ޕޮއިންޓުގެ ލީޑެއް ނަގައިފަ އެެވެ. ނަބާހާ ވަނީ މި ސެޓުގައި، ދެ ފަހަރެއްގެ މަތިން ކޫބާއާ އެއްވަރުކޮށްފަ އެވެ. އެއީ، 3-3 އާއި 4-4 އިންނެވެ. އޭގެ ފަހުން، ކޫބާ ވަނީ އޭނާ ބޭނުންވާ ޓެމްޕޯ އަށް މެޗު ސެޓުކޮށް، ނަބާހާ އަތުން ފުލުފުލުގައި ޕޮއިންޓް ހޯދައި، ސެޓުގެ ކޮންޓްރޯލް ނަގައިފަ އެވެ. ސެޓުގެ ފަހުކޮޅުގައި، ނަބާހާ ހިތްވަރުކޮށް، ފުރަތަމަ ސެޓަށް ވުރެ އިތުރަށް މި ސެޓުގައި ޕޮއިންޓް ހޯދައިފަ އެވެ. ކޫބާ، މި ސެޓު ގެންދިޔައީ، 21-09 އިންނެވެ.
ނަބާހާ ވަނީ މި ފަހަރު އޮލިމްޕިކްސްގައި ކުޅުނު ފުރަތަމަ މެޗުން އިންޑިއާގެ ޕީވީ ސިންދޫ އަތުން ބަލިވެފަ އެވެ. ތަޖުރިބާކާރު ކުޅުންތެރިޔާ، ސިންދޫ ސެޓުތައް ގެންދިޔައީ، 21-09، 21-06 އިންނެވެ.
މިއީ، ނަބާހާ އޮޮލިމްޕިކްސްގައި ވާދަކުރާ ދެ ވަނަ ފަހަރެވެ. ޓްރައިޕާޓައިޓް ފުރުސަތެއްގައި ޖެހިޖެހިގެން ދެ ވަނަ އޮލިމްޕިކްސްގައި ނަބާ ފެނިގެންދާއިރު، އޭނާ އަކީ ދެ އޮލިމްޕިކްސްއެއްގައި ރާއްޖެ ތަމްސީލްކުރާ ފުރަތަމަ ބެޑްމިންޓަން ކުޅުންތެރިޔާ އެވެ. އެކަމަކު، މި ފަހަރުގެ އޮލިމްޕިކްސް އަށް ތައްޔާރުވާން ނަބާހާ އަށް ރާއްޖޭން ބޭރުން އެކަށީގެންވާ ތަމްރީންތަކެއް ލިބޭގޮތެއްނުވި އެވެ. އެއީ، ބެޑްމިންޓަން އެސޯސިއޭޝަނަށް، ނަބާހާގެ ވިސާ ކަންތައް ހަމަޖައްސައިނުދެވިގެން ކުރިމަތިވި ކަމެކެވެ.
