ކުރީގެ އެޑިއުކޭޝަން މިނިސްޓަރު ޑރ. އައިޝަތު އަލީގެ ރަސްމީ އީމެއިލްތަކެއް ޑިލީޓުކޮށްފައިވާ ކަމަށް ބުނެ ފުލުހުން މައްސަލައެއް ބަލަން ފަށައިފި އެވެ.
ކުރީގެ މިނިސްޓަރަށް ހަމަޖައްސާފައިވާ އެޑިއުކޭޝަންގެ ރަސްމީ މެއިލަށް ބަޔަކު ވަންނަން މަސައްކަތް ކޮށްފައިވާ ކަން އަންގައި، ފޭސްބުކްގައި އޭނާ މިއަދު ޕޯސްޓެއް ކުރެއްވި އެވެ.
"އެއީ 17 ނޮވެމްބަރު 2023 ގައި ޑީއެކްޓިވޭޓުކޮށްފައިވާ އެކައުންޓެއް، އޭގެ ފަހުން އެ އެކައުންޓުން އެއްވެސް މީހަކަށް މެއިލެއް ގޮސްފައިވާ ނަމަ އެއީ އަޅުގަނޑު ފޮނުވި މެއިލެއް ނޫން ކަން އަންގައިދެން،" އައިޝަތު އަލީ ލިޔުއްވާފައިވެ އެވެ.
އެކަމާ ގުޅޭ ގޮތުން ނޫސްވެރިން ސުވާލު ކުރުމުން ފުލުހުން ބުނީ ކުރީގެ އެޑިއުކޭޝަން މިނިސްޓަރު އައިޝަތު ބޭނުން ކުރައްވަމުން ގެންދެވި ރަސްމީ އީމެއިލްގައިވާ ހުރިހާ މެއިލެއް 2023 ވަނަ އަހަރުގެ ތެރޭގައި ޑިލީޓުކޮށްފައިވާ މައްސަލައެއް ތަހުގީގު ކުރަމުންދާ ކަމަށެވެ.
އެ މައްސަލަ ތަހުގީގު ކޮށްދިނުމަށް އެދި ފުލުހުންގެ ހިދުމަތަށް ހުށަހެޅީ އެޑިއުކޭޝަން މިނިސްޓްރީންނެވެ. ފުލުހުން ބުނި ގޮތުގައި މައްސަލަ ހުށަހަޅާފައިވަނީ މި މަހު 25، ގަ އެވެ.
