ރާއްޖޭގެ ބީޗްވޮލީބޯޅަ ޓީމުތައް ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ބީޗް މުބާރާތައް ރޭ ފުރައިފި އެވެ.
ފަސް ގައުމަކުން ވާދަކުރާ މި މުބާރާތް ބޫޓާނުގައި ފަށާނީ އަންނަ އޮގަސްޓު މަހުގެ އެއް ވަނަ ދުވަހު އެވެ. ރާއްޖޭގެ އިތުރުން މި މުބާރާތުގައި ވާދަކުރާނީ ބޫޓާން, ނޭޕާލް, އިރާން, އިންޑިއާ އަދި ސްރީ ލަންކާ އެވެ.
މި މުބާރާތް މީގެ ކުރިން ރާއްޖޭގެ އެއް ނަމްބަރު ބީޗް ޕެއާ, އިސްމާއިލް ސާޖިދު (ކުޑަކާއްޓޭ) އަދި އާދަމް ނަސީމް (އެޑަމާ) ގެ ޕެއާއިން ވަނީ ކާމިޔާބު ކޮށްފަ އެވެ. މި ޕެއާ މި ފަހަރުގެ މުބާރާތުގައި ވެސް ވާދަކުރާނެ އެވެ.
މީގެ އިތުރުން، ދެން ވާދަކުރާނީ މުހައްމަދު އަލީ (ޑެންޒޯ) އާއި އަހުމަދު މުހައްމަދު (ކޯކޭ) ގެ ޕެއާ އެވެ.
އެންމެ ފަހުން ބަންގްލަދޭޝްގައި ބޭއްވި މުބާރާތުގައި ޑެންޒޯގެ އާއެކު ވާދަކުރަނީ ޝަމާއިލް ހުސެއިން އެވެ. އެކަމަކު، މި ފަހަރު ގައުމީ ޓީމު ޕްރެކްޓިސް އަށް ވެސް އޭނާ އަށް ނުކިޔަ އެވެ.
މީގެ އިތުރުން މި ފަހަރު ވަނީ މި މުބާރާތުގައި އަންހެން ބީޗް ޓީމު ވެސް ވާދަކުރާނެ އެވެ. އަންހެން އެއް ނަމްބަރު ޕެއާ އަކީ ހައްވާ ރާޝިދާ (ހައްވަ) އާއި އައިޝަތު މާޖިދާ (މާޖީ) އެވެ. ދެން ވާދަކުރަނީ އާމިނަތު އަރީޝާ އާއި ޒީނިޔާ ޕެއާ އެވެ.
