މިދިޔަ މަސް ނިމުނުއިރު، ދައުލަތުގެ ރަސްމީ ޑޮލަރު ރިޒާވުގައި މަހެއްގެ ޒަރޫރީ އިމްޕޯޓުތަކަށް ހަރަދުކުރާނެ ވަރަށް ވެސް ފައިސާ ނެތް ކަން މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތަފާސްހިސާބުތަކުން ދައްކައިފި އެވެ.
އެމްއެމްއޭގެ އެންމެ ފަހުގެ ތަފާސްހިސާބުތަކުން ދައްކާ ގޮތުގައި، މިދިޔަ މަސް (ޖޫން) ނިމުނުއިރު ޖުމްލަ ރިޒާވު (ގްރޮސް އިންޓަނޭޝަނަލް ރިޒާވު) ގައި ހުރީ 509.21 ޑޮލަރެވެ. މިއީ އޭގެ ކުރީ މަހަށް ވުރެ 17 މިލިއަން ޑޮލަރު އިތުރު އަދަދެކެވެ.
ނަމަވެސް ރިޒާވުން ބޭރުވާނެ ފައިސާ (ޕްރީ ޑިޓާމިންޑް ޝޯޓް ޓާމް ޑްރެއިންސް) ކެނޑުމުން، މެއި މަހަށް ވުރެ މިދިޔަ މަސް ނިމުނުއިރު ރިޒާވުގައި ހުރި ފައިސާގެ އަދަދު މަދެވެ. އެއީ ޖުމްލަ ރިޒާވާއެކީ ކަނޑަން ޖެހޭ މިންވަރު ވެސް އިތުރުވުމުންނެވެ.
އެކި ގޮތްގޮތުން ލިބެން ހުރި ތަފާސްހިސާބުތައް ބަލައި ހިސާބުކުރުމުން ލަފާކުރެވެނީ ޒަރޫރީ އިމްޕޯޓުތަކަށް މަހެއްގެ މައްޗަށް 75 މިލިއަން ޑޮލަރު ބޭނުންވާ ކަމަށެވެ. އެކަމަކު މިދިޔަ މަސް ނިމުނުއިރު ރިޒާވުގައި ހުރީ 66.9 މިލިއަން ޑޮލަރެވެ.
މާލީ ދާއިރާގެ އިތުބާރު ހުރި ބައެއް މަސްދަރުތަކުން މައުލޫމާތު ލިބުނު ގޮތުގައި ބޭނުންކުރެވޭ ރިޒާވު މިފަހުން 20 މިލިއަން ޑޮލަރަށް ވެސް ވެއްޓުނެވެ. މި މައުލޫމާތު "އަދަދު" އިން ބެލީ، ކުރީގެ ރައީސް އަބްދުﷲ ޔާމީން، ބޭނުންކުރެވޭ ރިޒާވުގައި ހުރީ އެންމެ 18 މިލިއަން ޑޮލަރު ކަމަށް މިފަހުން ވިދާޅުވުމާ ގުޅިގެންނެވެ.
"ދުވަހަކު ވެސް ދިވެހިރާއްޖޭ ޔޫޒަބަލް ރިޒާވް މިހާ ހިސާބަކަށް ނުދޭ. ދުވަހަކު ވެސް ދިވެހިރާއްޖޭގެ ޔޫޒަބަލް ރިޒާވް މިހާ ހިސާބަކަށް ނުދާނެ، 18 މިލިއަން ޑޮލަރު ޔޫޒަބަލް ރިޒާވަކަށް އެ ހުރީ،" ބުރާސްފަތި ދުވަހު ބޭއްވި ޕީއެންއެފްގެ ޖަލްސާއެއްގައި، އެމަނިކުފާނު ވިދާޅުވި އެވެ.
ޔާމީން މިހެން ވިދާޅުވުމާ ގުޅިގެން މި ނޫހުން ހޯދި މައުލޫމާތުން އެނގުނު ގޮތުގައި، ބޭނުންކުރެވޭ ރިޒާވު އެހާ ބޮޑަށް ވެއްޓުނީ ތެޔޮ އިމްޕޯޓަށާއި އެސްއޯއީތަކަށް ބޭނުންވާ ޑޮލަރު ހަމަޖައްސަން ރިޒާވު ބޭނުންކުރުމާ ގުޅިގެންނެވެ.
އެކަމަކު އެފަހުން ލިބުނު ޑޮލަރު އާމްދަނީއާއެކީ ބޭނުންކުރެވޭ ރިޒާވުގެ ހާލަތު މިހާރު އެހާ ގޯސް ނޫން ކަމަށް، ނަން ނުޖަހާ ގޮތަށް "އަދަދު" އާ ވާހަކަ ދެއްކި އިތުބާރުކުރެވޭ މަސްދަރަކުން ކަށަވަރުކޮށްދިނެވެ.
ބޭނުންކުރެވޭ ރިޒާވުގެ ހާލަތު މިހާ ގޯސްވީ ނަމަވެސް، މިއަދާ ހަމައަށް ސަރުކާރުން މިކަމާ ގުޅޭ ގޮތުން އެއްވެސް އެއްޗެއް ނުބުނެ އެވެ. އަދި، މާލިއްޔަތާ ގުޅޭ ގޮތުން ސަރުކާރުގެ ވެރިން ވާހަކަދައްކާ ކޮންމެ ފަހަރެއްގައި ބުނަމުން ދަނީ ކަންކަން ހަމައަކަށް އެޅެމުން އަންނަ ކަމަށާއި ކަންބޮޑުވުމެއް ނެތް ކަމަށެވެ.
ރިޒާވު މި ހާލަތަށް ވެއްޓުނު ސަބަބުތަކުގެ ތެރޭގައި، އާމްދަނީއާ ނުބައްދަލު ހަރަދުތައް ކުރަން ނެގި ދަރަނި އަދާކުރަން ޖެހުމާއި ދުނިޔޭގެ ބާޒާރުގައި އިންތިހާއަށް ތެލުގެ އަގު މަތިވެގެން ދިޔުމާއި އިގުތިސޯދަށާއި އުމްރާނީ ތަރައްގީއަށް ކުރާ ބޮޑެތި އިންވެސްޓުމަންޓުތަކުން ފައިދާއެއް ނުވުން ހިމެނެ އެވެ.
