ޕެރިހުގައި މިހާރު ކުރިއަށްދާ އޮލިމްޕިކްސްގެ ބެޑްމިންޓަން އިވެންޓްގައި، ރާއްޖޭގެ ފާތިމަތު ނަބާހާ (ނަބާ) އަތުން އިންޑިއާގެ ތަރި، ޕީވީ ސިންދޫ މޮޅުވެއްޖެ އެވެ.
މި ވަގުުތު ބެޑްމިންޓަންގެ ވިމެންސް ސިންގަލްސް ރޭންކިން ދުނިޔޭގެ 13 ވަނައިގައި އޮތް، ސިންދޫ ސެޓުތައް ގެންދިޔައީ، 21-09، 21-06 އިންނެވެ. ނަބާ އަކީ އަންހެން ސިންގަލްސް އިން މި ވަގުތު ދުނިޔޭގެ 111 ވަނަ އެވެ.
ނަބާ، 25، މެޗު ފަށައިގެން ފުރަތަމަ ސެޓުގައި، ސިންދޫއާ ރަނގަޅު ވާދައެއްކުރި އެވެ. އެ ގޮތުން، ފުރަތަމަ ހަތަރު ޕޮއިންޓްގައި ދާދި ހަމަހަމަކޮށް، 4-4 އިން އޮތެވެ. އެކަމަކު، ސެޓު ކުރިއަށްދާ ވަރަކަށް ރެލީތަކުގައި، ސިންދޫ އެޑްވާންޓޭޖް ނަގައި، ނަބާ އަތުން ފުލުފުލުގައި ޕޮއިންޓްތައް ހޯދީ އެވެ. އެ ގޮތުން، މި ސެޓުގައި، ސިންދޫ، 14-04 އިން ވެސް ކުރީގައި އޮތެވެ. ސެޓުގެ ފަހުކޮޅުގައި، ނަބާ އަށް ކޮންމެ ވެސް ވަރަކަށް ޕޮއިންޓްތަކެއް އެއްކުރެވުނުއިރު، ސިންދޫ މޮޅުވީ، 21-09 އިންނެވެ.
ސިންދޫއާ ދެކޮޅަށް މިއަދު ނަބާ ކުޅުނު މެޗުގެ ތެރެއިން.--- ފޮޓޯ: ގެޓީއިމޭޖަސް.
ދެ ވަނަ ސެޓު ފަށައިގެން، ސިންދޫ 3-0 އިން ކުރީގައި އޮތެވެ. އެ އަށް ފަހު، ނަބާ މަޑުމަޑުން މެޗުގެ ތެރެއަށް ވަންނަން ޕޮއިންޓެއް ސްކޯކުރިއިރު، އަމްޕަޔަރުގެ ނިންމުމަށް، ސިންދޫ ޗެލެންޖް ކުރި ބޯޅައެއް ބޭރުވެ، ނަބާ އަށް ޕޮއިންޓް ލިބުނެވެ. އެހެން ނަމަވެސް، މަތީ ލެވަލްގައި ގިނަ މެޗުތަކެއް ކުޅެފައި ހުރުމުގެ ތަޖުރިބާގެ ބޭނުންހިފައި، ސިންދޫ މި ސެޓުގައި ޕޮއިންޓުގެ ފަރަގުބޮޑުކުރަން ފެށި އެވެ. އަދި ނަތީޖާ އަކަށްވީ، 21-06 އިން ދެ ވަނަ ސެޓު ގެންގޮސް މެޗުން މޮޅުވުމެވެ.
މިއީ، ނަބާ އާއި ސިންދޫގެ ދެ ވަނަ ކުރިމަތިލުމެވެ. މި ދެ ކުޅުންތެރިން ވަނީ، 2022 ވަނަ އަަހަރު ބާމިންހަމްގައި ކުރިއަށްދިޔަ ކޮމަންވެލްތު ގޭމްސްގައި ވެސް ބައްދަލުކޮށްފަ އެވެ. އެ ގޮތުން، 2018 ގައި ބޭއްވި ކޮމަންވެލްތު ގޭމްސްގެ ސިންގަލްސް އިން ރިހި މެޑަލް ހޯދައި، 2022 ވަނަ އަަހަރުގެ މުބާރާތުން ރަން މެޑަލް ހޯދި، ސިންދޫ ވަނީ ނަބާހާ ކައިރިން 21-04، 21-11 ސެޓުތައް ގެންގޮސް މެޗުން މޮޅުވެފަ އެވެ.
ނަބާ އަށް ގްރޫޕް ސްޓޭޖުގައި ދެން އޮތީ އެސްޓޯނިއާގެ ކްރިސްޓިން ކޫބާއާ ކުޅޭ މެޗެވެ. ކޫބާ އޮތީ އަންހެން ސިންގަލްސް އިން ދުނިޔޭގެ 73 ވަނައިގަ އެވެ.
މިއީ، ނަބާ އޮޮލިމްޕިކްސްގައި ވާދަކުރާ ދެ ވަނަ ފަހަރެވެ. ޓްރައިޕާޓައިޓް ފުރުސަތެއްގައި ޖެހިޖެހިގެން ދެ ވަނަ އޮލިމްޕިކްސްގައި ނަބާ ފެނިގެންދާއިރު، އޭނާ އަކީ ދެ އޮލިމްޕިކްސްއެއްގައި ރާއްޖެ ތަމްސީލްކުރާ ފުރަތަމަ ބެޑްމިންޓަން ކުޅުންތެރިޔާ އެވެ.
