ވެރިކަންކުރާ ޕީއެންސީގެ ޕާލިމަންޓަރީ ގްރޫޕުގެ ނައިބު ލީޑަރު ކަމުން މަހިބަދޫ ދާއިރާގެ މެންބަރު އަހުމަދު ތޯރިގު އިސްތިއުފާ ދެއްވައިފި އެވެ.
އެ މަގާމުން ތޯރިގު އިސްތިއުފާ ދެއްވިކަން ޕީއެންސީގެ އިސް ބައެއް ބޭފުޅުން ވަނީ "އަދަދު" އަށް ކަށަވަރުކޮށްދީފަ އެވެ. އޭނާ އިސްތިއުފާ ދިނީ މިއަދު އެވެ. މިކަމާ ގުޅިގެން ތޯރިގުގެ ބަހެއް ހޯދުމަށް މަސައްކަތް ކުރި ނަމަވެސް ފޯނަށް ޖަވާބު ނުދެއްވާތީ ބަހެއް ނުލިބެ އެވެ.
"އަޅުގަނޑު އިސްތިއުފާ ދިނީ، މިވަގުތު އަމިއްލަ ކަންކަން ހުރިގޮތުން އެ މަސްއޫލިއްޔަތު އަދާކުރުމަށް ވަގުތު ދެވެން ނެތުމުގެ ސަބަބުން," މި ހަބަރު ޝާއިއުކުރި ފަހުން އެކްސްގައި ތޯރިގު ވިދާޅުވި އެވެ.
މަޖިލީހުގެ ރިޔާސަތު ބަލަހައްޓަވާ މެންބަރުންގެ ތެރޭގައި ވެސް އޭނާ ހިމެނިވަޑައިގަންނަވަ އެވެ. އެއީ, މަޖިލީހުގެ މެންބަރުކަން ކުރައްވާތާ އެންމެ ފަސްވަނައަށް އެންމެ ގިނަ މެންބަރުގެ ހައިސިއްޔަތުންނެވެ. އޭނާ މަހިބަދޫ ދާއިރާގެ މެންބަރުކަމަށް ފުރަތަމަ ހޮވުނީ އި 28، 2014 ގައި 17 ވަނަ މަޖިލީހަށެވެ.
ޕީއެންސީގެ ޑެޕިއުޓީ ޕީޖީ ލީޑަރުގެ މަގާމަށް ތޯރިގު އައްޔަންކުރައްވަން ނިންމެވީ ރައީސް ޑރ. މުހައްމަދު މުއިއްޒު، މެއި 22، ގައި އެ ޕާޓީގެ ޕީޖީ ގްރޫޕާއެކު ބޭއްވި ބައްދަލުވުމެއްގައި އެމަނިކުފާނެވެ. އޭނާގެ އިތުރުންވެސް ތިން ޑެޕިއުޓީން އައްޔަންކުރެއްވި އެވެ.
ޕީއެންސީގެ މަގާމުން ތޯރިގު އިސްތިއުފާ ދެއްވި ސީދާ ސަބަބެއް ޔަގީން ނުވި ނަމަވެސް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސްގެ މަގާމަށް އައުމަށް އޭނާ ކެމްޕޭން ކުރަމުންދާތާ ގިނަ ދުވަސްތަކެއް ވެފައިވާކަން ވަނީ އެނގިފަ އެވެ.
އެ މަގާމުގައި ކުރިން ހުންނެވި ބައްސާމް އަދީލް ޖަލީލް މަގާމުން ދުރުކޮށް، ހިންގުން ނޯމަލައިޒިން ކޮމިޓީ އަކާ ހަވާލުކުރަން ދުނިޔޭގެ މައި ފުޓްބޯޅަ އިދާރާ، ފުޓްބޯޅައިގެ މައި އިދާރާ ފީފާއިން ވަނީ ނިންމާފަ އެވެ. އަދި، އެ އެ ކޮމިޓީގެ އިސް ފަރާތަކަށް، ވިޔަފާރިވެރިޔާ، މުހައްމަދު އަލީ ޖަނާ (ޖަނާ) ހަމަޖައްސަން ނިންމާފައިވާ ކަމަށް މައުލޫމާތު ލިބިފައިވެ އެވެ.
ޖަނާހު އަކީ ވިޔަފާރިއާއި އިންވެސްޓްމަންޓުގެ ދާއިރާއިން ރައީސް މުއިއްޒު އަށް ލަފާ އަރުވާ އިސް އެޑްވައިޒަރެވެ.
އެފްއޭއެމްގެ ހާލަތާ ގުޅޭގޮތުން ޖުލައި 23، ގައި ސޯޝަލް މީޑިއާގައި ކުރެއްވި ޕޯސްޓެއްގައި ތޯރިގު ވަނީ ދިވެހި ފުޓްބޯޅަ ސަލާމަތްކުރުމުގެ އެއް މަސައްކަތް ނިމުނީ ކަމަށާއި މޫލާފައިވާ ވަކިތަކުން ފުޓްބޯޅަ ސަލާމަތްކުރަން އިތުރު މަސައްކަތްކުރަން ޖެހޭ ކަމަށްވެސް ވިދާޅުވެފަ އެވެ.
