ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ހިންގުން ނޯމަލައިޒިން ކޮމިޓީ އަކާ ހަވާލުކުރަން ދުނިޔޭގެ މައި ފުޓްބޯޅަ އިދާރާ، ފީފާ އިން ނިންމާފައިވާއިރު، އެ ކޮމިޓީގެ އިސް ފަރާތަކަށް، ވިޔަފާރިވެރިޔާ، މުހައްމަދު އަލީ ޖަނާ (ޖަނާ) ހަމަޖައްސަން ނިންމާފައިވާ ކަމަށް މައުލޫމާތު ލިބިއްޖެ އެވެ.
މީގެ ހަތަރު ދުވަސް ކުރިން، ފީފާ އިން ވަނީ ނޯމަލައިިޒިން ކޮމިޓީއެއްގެ ދަށަށް އެފްއޭއެމް ހިންގުން ބަދަލުކުރަން ނިންމައިފަ އެވެ. އަދި އެ ކޮމިޓީ އަށް މެމްބަރުން ކަނޑައެޅުމުގެ މަސައްކަތް ކުރަމުން އަންނަ ކަމަށް ވެސް ފީފާގެ އެ ނިންމުން ހިއްސާކުރި ބަޔާނުގައިވެ އެެވެ.
ފީފާގެ ނިންމުން އެންގުމަށް، އެފްއޭއެމް އިން ނެރުނު ބަޔާނުގައި ބުނެފައިވަނީ، ފީފާ އިން އަންގާފައިވަނީ، ނޯމަލައިޒިން ކޮމިޓީ އެކުލެވިގެންދާނީ ވަކިން ހާއްސަކޮށް ގާނޫނީ، މާލީ އަދި ފުޓްބޯޅައާ ގުޅުންހުރި އެކަށީގެންވާ ތަޖުރިބާ ލިބިފައިވާ މެމްބަރުންގެ މައްޗަށް ކަމަށެވެ. އެ ގޮތުން، ނޯމަލައިޒިން ކޮމިޓީ ތިބޭނެ މެމްބަރުންގެ އަދަދު ކަނޑައަޅައި، މެމްބަރުންގެ ނަންތައް ފައިނަލްކުރަން ނިންމާފައިވަނީ ފީފާ އާއި އޭއެފްސީ ގުޅިގެންނެވެ.
"އަދަދު" އަށް އެނގިފައިވާ ގޮތުގައި، ވިޔަފާރީގެ ކަންކަމުގައި ރައީސް ޑރ. މުހައްމަދު މުއިއްޒު އަށް ލަފާ އަރުވާ އިސް އެޑްވައިޒަރު، ޖަނާހުގެ ނަން ވަނީ ނޯމަލައިިޒިން ކޮމިޓީގައި ހިމަނައިފަ އެވެ. އަދި ފީފާގެ ރައީސް ޖިއާނީ އިންފަންޓީނޯއާ ގާތްގުޅުމެއް އޮންނަ ޖަނާހު އަކީ، އަންނަ އަހަރުގެ ޖުލައި 31 އާ ހަމައަށް މުއްދަތު ދީފައިވާ ނޯމަލައިިޒިން ކޮމިޓީ ލީޑުކުރައްވާނެ ފަރާތެވެ.
ފީފާ އިން މި ކަންކަން ނިންމަމުން ދަނީ، މި ކަމާ ބެހޭ އެކިއެކި ފަރާތްތަކުގެ ލަފާ ހޯދުމަށް ފަހު އެވެ.
އިންފަންޓީނޯއާ ބަަައްދަލުކުރެއްވުމަށް ފަހު، ޖަނާހު އެކްސް (ކުރިން ޓްވިޓާ)ގައި ކުރައްވާފައިވާ ޕޯސްޓް.
މިދިޔަ މަހު، ގަތަރުގެ ދޯހާގައި ޖަނާހު ވަނީ ފީފާގެ ރައީސް، އިންފަންޓީނޯއާ ބައްދަލުކުރައްވައިފަ އެވެ. އެ ބައްދަލުވުމުގެ ފޮޓޯތައް، ޖަނާހު ވަނީ، އޭނާގެ ރަސްމީ އެކްސް (ކުރިން ޓްވިޓާ) އެކައުންޓްގައި ޕޯސްޓްކުރައްވައިފަ އެވެ. އެ ޕޯސްޓުގައި ޖަނާހު ވަނީ ދުނިޔޭގެ ފުޓްބޯޅަ އަށް ފީފާގެ ރައީސްގެ މަގާމުގައި ހުންނަވައި، އިންފަންޓީނޯ ކުރައްވާ މަސައްކަތަށް ތައުރީފުކޮށްފަ އެވެ.
ޖަނާހު ވިދާޅުވީ، އިންފަންޓީނޯގެ ލީޑަޝިޕްގެ ދަށުން ފީފާ އިން ދުނިޔޭގެ ފުޓްބޯޅަ އަށް ބޮޑެތި ކުރިއެރުންތައް ހޯދައިދެއްވަމުން އަންނަ ކަމަށެވެ. އަދި މުޖުތަމައުގެ ލާބަޔާއި މަންފާގެ އިތުރުން ރަނގަޅަކަށް ކުރާ އެކި ކަންކަމުގައި، އިންފަންޓީނޯ ދެއްވާ ލަފަޔާއި އިރުޝާދަށްޓަކައި އަބަދުވެސް ޝުކުރުވެރިވާ ކަމަށް ޖަނާހު، އެކްސްގައި ކުރި އެ ޕޯސްޓުގައި ވަނީ ލިޔުއްވައިފަ އެވެ.
ފީފާ އިން ކުރިއަށް އޮތް ދުވަސްތަކުގެ ތެރޭގައި، އެފްއޭއެމްގެ ނޯމަލައިިޒިން ކޮމިޓީ އިއުލާނުކުރާނެ ކަމަށް ބެލެވެ އެވެ.
މިއީ، ފީފާ އިން އެފްއޭއެމް ހިންގުން ނޯމަލައިޒިން ކޮމިޓީ އަކާ ހަވާލުކުރާ ތިން ވަނަ ފަހަރެވެ. އެ ގޮތުން، 2008 ވަނަ އަހަރު ނެގި ކޮމިޓީގެ ރައީސަކީ ފުޓްބޯޅައިގެ އެކިއެކި މަސައްކަތުގައި އުޅުއްވާ އަހުމަދު ޝާހިރު އެވެ. އަދި އެ ކޮމިޓީގައި ހިމެނެނީ، ސްޕޯޓްސް މިނިސްޓްރީގެ ސްޓޭޓަކަށް ހުންނެވި ގައުމީ ޓީމުގެ ކުރީގެ މެނޭޖަރު، އިބްރާހީމް އާމިރު (ސަލްސާ)ގެ އިތުރުން، އަހުމަދު ހަފީޒް (ޑިކޭ)، އެފްއޭއެމްގެ ކުރީގެ ޖެނެރަލް ސެކްރެޓަރީ އަދި އެއް ވަނަ ފޯވާޑް، ޝާހު އިސްމާއީލް (ސާޔާ) އަދި އަހުމަދު އިގުބާލް އެވެ.
އޭގެ ފަހުން، 2013 ވަނަ އަހަރު އެފްއޭއެމް ނޯމަލައިޒްކުރިއިރު، އެ ފަހަރު، ފީފާ އިން ވަނީ ފަސް މެމްބަރުންގެ ނޯމަލައިިޒިން ކޮމިޓީ އަކާ އެފްއޭއެމް ހިންގުން ހަވާލުކޮށްފަ އެވެ. އެއީ، ޗެއާމަނެއްގެ ގޮތުގައި، އޮލިމްޕިކް ކޮމިޓީގެ ކުރީގެ ރައީސް، މުހައްމަދު ޝަވީދު، ޑެޕިއުޓީ ޗެއާމަނަކަށް، ތަޖުރިބާކާރު މެޗު ކޮމިޝަނަރު، އަބްދުލްހަމީދު އަބްދުލްގަފޫރު (އައްޑޯ)، މެމްބަރުންގެ ގޮތުގައި، މުހައްމަދު ނިޒާމް، އަލީ އުމަރު އަދި ފަސީހު ޒާހިރު އެވެ.
ފީފާ އިން . މި ފަހަރު، އެފްއޭއެމް ހަވާލުކުރާނެ ކަމަށް ވެސް ބެލެވެނީ ފަސް މެމްބަރުންގެ ނޯމަލައިޒިން ކޮމިޓީއަކާ އެވެ.
