ސިފައިންގެ ވިޔަފާރި ފުޅާކުރުމަށް ކުޑަކުދީންގެ ބަގީޗާގެ ބޮޑުބައެއް ނެގުމަށް ފަހު، އިވެންޓުތައް ބޭއްވުމަށް ހާއްސަ ހޯލެއް ހަދައި، އެތަން ކުއްޔަށް ދީ، އެ ހަފުލާތަކަށް ކޭޓަރިންގެ ހިދުމަތް ވެސް ދޭން ފަށައިފި އެވެ.

ކުރީގެ ރައީސް މައުމޫނު އަބްދުލްގައްޔޫމުގެ ވެރިކަމުގައި ހެދި ކުޑަކުދީންގެ ބަގީޗާ ބަލަހައްޓަމުން ދަނީ ސިފައިންނެވެ. މީގެ ކުރިން ބޮޑު ވިޔަފާރިއެއްގެ ގޮތުގައި އެތަން ބޭނުން ކުރަމުން ނުގެންދެ އެވެ.

ނަމަވެސް، ސިފައިންގެ ކޯޕަރޭޓިވް (ސިފްކޯ) އިން ކުޑަކުދީންގެ ބަގީޗާގެ ހުޅަނގު އުތުރު ކަންމަތީގައި (ސްޓެލްކޯ އާ ވީ ކަންމަތި) ދެ ބުރި އިމާރާތެއް ހަދައި، އިވެންޓުތައް ބޭއްވުމަށް އެ ތަނާއި، ބަގީޗާގެ އެތެރެއިން ބައެއް ކުއްޔަށް ދީ، ބޮޑު އާމްދަނީއެއް ހޯދަމުންދާތާ މަސްތަކެއް ވެއްޖެ އެވެ.

ސިފްކޯގެ މި އިވެންޓު ހޯލަކީ މިހާރު މާލޭގައި އެންމެ މަގުބޫލް އެއް ތަނެވެ. އެތަން ގިނައިން ކުއްޔަށް ނަގަނީ ކައިވެނި ހަފުލާތަކާއި ޕާޓީތައް ބޭއްވުމަށެވެ. މިދިޔަ އާދީއްތަ ދުވަހު އަދަދު ނޫހުން ސިފްކޯ އަށް ގުޅިއިރު، މިފެށޭ އޯގަސްޓު މަހުގެ ނިޔަލަށް ގާތްގަނޑަށް އެތަން ވަނީ އެއްކޮށް ބުކްވެފަ އެވެ.

ކުޑަކުދިންގެ ބަގީޗާގެ ހުޅަނގު ފަޅި އެއްކޮށް ކަހަލަ ގޮތަކަށް ސިފައިން ނަގާފައިވަނީ ވިޔަފާރި ބޭނުމަށް. އާންމުންނާއި ކުޑަކުދިންނަށް އެ ސަރަހައްދަށް ނުވެސް ވަދެވޭ. -- ފޮޓޯ: އަދަދު

ކުޑަކުދީންގެ ބަގީޗާގެ އިވެންޓު ހޯލްގެ އަގުތައް

• މުޅި ހޯލް 12 ގަޑިއިރަށް (ގްރައުންޑް ފްލޯ، ފުރަތަމަ ފްލޯ، ޕޭންޓްރީ) - 10،000ރ.
• މުޅި ހޯލް އަދި އައުޓްޑޯ (އަނބު ގަހާ ހިސާބަށް) - 15،000ރ.
• ހަތަރު ފޫޓުގެ ކާ މޭޒެއް (ވަށް) - 25ރ.
• ތިން ފޫޓުގެ ކާ މޭޒެ (ވަށް) - 20ރ.
• މޭޒުގައި އަޅާ ފޮތިގަނޑެއް - 10ރ.
• ހަތަރު ފޫޓުގެ ބުފޭ މޭޒެއް - 35ރ.
• ބުފޭ މޭޒު ވަށާ ޖަހައި ފޮތިގަނޑެއް - 15ރ.
• ބުފޭ މޭޒު މަތީ އަޅާ ފޮތިގަނޑެއް - 10ރ.
• އެއް ގޮނޑި - 12ރ.
• ހެދިކާ މެނޫ - 110ރ. ބޮލަކަށް
• ކެއުން - 160ރ. ބޮލަކަށް

މި އަގުތަކުން، ސިފައިންނާއި ސިފައިންގެ ދަރިންނާއި އާއިލާ މީހުންނަށް ވިއްކަނީ 20 ޕަސަންޓު ޑިސްކައުންޓެއް ލިބޭނެ އެވެ. އަދި އެމްއެންޑީއެފް އާއި ޑިފެންސް މިނިސްޓްރީ އަދި ސިފްކޯގެ މަދަނީ މުވައްޒަފުންނަށް 10 ޕަސަންޓުގެ ޑިސްކައުންޓެއް ލިބެ އެވެ.

ކުޑަކުދީންގެ ބަގީޗާއިން ސިފައިން ވިޔަފާރި ބޭނުމަށް ނަގާފައިވާ ތަނުގައި އިމާރާތެއް ހަދަމުން ދަނީ. -- ފޮޓޯ: އަދަދު

ވިޔަފާރިވެރިންގެ ކަންބޮޑުވުން

ތޮއްޖެހިފައިވާ މާލޭގައި ކުޑަކުދިން ގޮވައިގެން އާއިލާތައް ހިތްހަމަޖެހިލަން ދާ އެއް ތަނަކީ ކުޑަކުދީންގެ ބަގީޗާ އެވެ. އެ ބަގީޗާގެ ހުޅަނގުފަޅީގެ ބޮޑުބައެއް ސިފައިންގެ ވިޔަފާރިއަށް ނަގައިގެން ހިންގަމުން ދަނީ ކޮން އުސޫލަކުން، އަދި ކޮން އަގެއްގައި ކަމެއް ނޭނގެ އެވެ.

ކުޑަކުދީންގެ ބަގީޗާގެ އެ ސަރަހައްދުގައި ކުރިން ހުރި ތަކެތި ނަގައި، އިވެންޓު ބޭއްވުމަށް ކުއްޔަށް ދޭން ފަށާފައިވާއިރު، ބަގީޗާއަށް ދާ މީހުންނަށް ވެސް އެ ސަރަހައްދަށް ނުވަދެވޭ ގޮތަށް ވަނީ ބަންދުކޮށްފަ އެވެ.

ސިފައިން އިވެންޓު ހޯލް ކުއްޔަށް ދިނުމާއި ކޭޓަރިންގެ ހިދުމަތަށް ވަނުމުން، އެ ދާއިރާގައި ތިބި އަމިއްލަ ކުންފުނިތަކުގެ ހިތްހަމަ ނުޖެހުން އެބަ އޮތެވެ.

"ސިފައިން މި ވިޔަފާރީގެ ތެރެއަށް ވަންނަން ނުޖެހޭ. އެ މީހުން އަމިއްލަ އަށް އިވެންޓު ހޯލް ހަދައި، އެތަން ކުއްޔަށް ދީ، އަދި ކޭޓަރިންގެ ހިދުމަތް ދިނުމަކީ އަމިއްލަ ވިޔަފާރިތަކަށް ގެއްލުން ވާނެ ކަމެއް. އަދި ސިފައިން ކޮށްގެން ވާނެ ކަމެއް ވެސް ނޫން،" މާލޭގައި ފުޅާ ދާއިރާއެއްގައި އިވެންޓުތައް ބާއްވައި، ކޭޓަރިންގެ ހިދުމަތް ދޭ ކުންފުންޏެއްގެ ވެރިޔަކު ބުންޏެވެ.

ކައިވެނި ހަފުލާތައް ބާއްވައިދީ، ކޭޓަރިންގެ ހިދުމަތް ދޭ އެހެން ކުންފުންޏެއްގެ ވެރިޔަކު ބުނީ ސިފައިން ވިޔަފާރި ފުޅާކުރަމުން ދިޔުމަކީ އަމިއްލަ ވިޔަފާރިތަކަށް ހުރި ގެއްލުމެއް، ބިރެއް ކަމަށެވެ.

"އެހެން އެކަން ހުއްޓުވަންޖެހޭ،" އޭނާ ބުންޏެވެ.

މިކަމާ ގުޅޭ ގޮތުން ސިފްކޯއިން ވާހަކަ ނުދެއްކި އެވެ. އަދި އެއްވެސް މައުލޫމާތެއް ވެސް ނުދިނެވެ.

titledesc