މެންޗެސްޓާ (ޖުލައި 19) - ފްރާންސްގެ ލޮސްކް ލިލް އަށް ކުޅެމުން އައި 18 އަހަރުގެ ޑިފެންޑަރު، ލެނީ ޔޯރޯ، 62 މިލިއަން ޑޮލަރުގެ ޑީލެއްގެ ދަށުން މެންޗެސްޓާ ޔުނައިޓެޑަށް ބަދަލުވެއްޖެ އެވެ.
މިއީ، މި ފަހަރުގެ ޓްރާންސްފާގައި ޔުނައިޓެޑުން ސޮއިކުރި ދެ ވަނަ ކުޅުންތެރިޔާ އެވެ. ޔުނައިޓެޑުން ވަނީ 42 މިލިއަން ޑޮލަރަށް ބޮލޯނިއާގެ ފޯވާޑް، ޔޯސުއާ ކާކްޒީގެ ސޮއި ވެސް ހޯދައިފަ އެވެ. ޔުނައިޓެޑުން ޔޯރޯގެ ސޮއި ހޯދީ، ޕީއެސްޖީ އާއި ރެއާލް މެޑްރިޑުން ވެސް މަސައްކަތް ކުރަމުން އަންނަނިކޮށެވެ.
ލިލް އަށް އުމުރުން 16 އަހަރުގައި ކުޅެން ފެށި ޔޯރޯ، ޔުނައިޓެޑާ އެކު، ފަސް އަހަރުގެ ކޮންޓްރެކްޓެއްގައި ސޮއިކުރިއިރު، އެ އެއްބަސްވުމުގައި އިތުރު އެއް އަހަރަށް އާ ކުރެވޭ ގޮތަށް ވަނީ ހިމަނައިފަ އެވެ.
މިދިޔަ ސީޒަނުގެ ފްރެންޗް ލީގުގައި، ލިލް އަށް 32 މެޗުގައި ކުޅެދިން ޔޯރޯ ވަނީ ފްރެންޗް ލީގުގެ ހަތަރު ވަނައިގައި އެ ޓީމު ނިންމާލުމުގައި މުހިންމު ރޯލެއް ކުޅެފަ އެވެ. ފަހަތަށް ކުޅެމުން ވެސް އެޓޭކްގައި ބައިވެރިވާ ޔޯރޯ ވަނީ މިދިޔަ ސީޒަނުގައި ދެ ގޯލު ޖަހައިފަ އެވެ. އަދި ފްރެންޗް ލީގުގެ ޓީމް އޮފް ދި ސީޒަންގައި ހިމެނުނެވެ.
ޔޯރޯ، ޔުނައިޓެޑަށް ސޮއިކުރުމަށް ފަހު އެ ޓީމުގެ ކޯޗު ޓެން ހާގްއާ އެކު.
"ކެރިއަރުގެ މިހާ ކުރީކޮޅުގައި ޔުނައިޓެޑް ކަހަލަ ޓީމަކަށް ސޮއިކުރެވުމަކީ، ވަރަށް އާދަޔާހިލާފު ޝަރަފެއް، މި ކްލަބާ ވާހަކަ ފެށި ހިސާބުން ވެސް މި ޓީމުގެ މުސްތަގުބަލުގެ ޕްރޮޖެކްޓްގެ ބައިވެރިއަކަށްވާން ބޭނުންވި، ޔުނައިޓެޑްގައި ޒުވާން ކުޅުންތެރިންގެ ތާރީހެއް އެބައޮތް. އަހަރެން ކުރިއަރައިގެންދާން މިއީ ރަނގަޅު ޓީމެއް،" ޔޯރޯ ބުންޏެވެ.
މުޅި ސީޒަނަށް ބަލާއިރު، މިދިޔަ ސީޒަނުގެ ހުރިހާ މުބާރާތެއްގައި ޔޯރޯ ވަނީ ލިލް އަށް 44 މެޗު ކުޅެދީފަ އެެވެ. އެ ޓީމު ޔުއެފާ ކޮންފަރެންސްގެ ކުއާޓާ ފައިނަލުން ކެޓީ އެސްޓަން ވިލާ އަތުން ޕެނަލްޓީ ޖަހައިގެންނެވެ.
ޔޯރޯ ގަތުމުގެ ކުރިން ޔުނައިޓެޑުން އެވަޓަންގެ ޑިފެންޑަރު، ޖަރަޑް ބްރަންތުވެއިޓަށް ދެ ބިޑެއް ކުރި އެވެ. ދެ ވަނަ ބިޑް، 85 މިލިއަން ޑޮލަރަށް އެރި ނަމަވެސް، އެވަޓަން އިން އެ އަގަށް ވެސް އެއްބަހެއްނުވި އެެވެ.
ޔުނައިޓެޑަށް މިދިޔަ ސީޒަނުގައި ކުޅުނު ޑިފެންޑަރުންނަށް ބަލާއިރު، ރަފައެލް ވަރާން ވަނީ ކޮންޓްރެކްޓް ހަމަވެ، ޓީމު ދޫކޮށްލައިފަ އެވެ. ވިކްޓަ ލިންޑެލޯފްގެ ކޮންޓްރެކްޓް އަންނަ ސީޒަނުގެ ނިޔަލަށް އޮތްއިރު، ހެރީ މެގުއާ އަށް ރަނގަޅު ބިޑެއް އަތުވެއްޖެނަމަ ދޫކޮށްލާނެ އެވެ.
މީގެ އިތުރުން ޔުނައިޓެޑުން ވަނީ ޖޯނީ އެވާންސްގެ ކޮންޓްރެކްޓް އާ ކޮށްފަ އެވެ. އަދިވެސް ޔުނައިޓެޑުން ބްރަންތުވެއިޓަށް ފާރަލަަމުން އަންނައިރު، އެ ޓީމުން އަންނަނީ ބަޔާން މިއުނިކަށް ކުޅޭ ނެދަލެންޑްސްގެ ޑިފެންޑަރު، މަަތައިސް ޑި ލިޓްއާ ވާހަކަދައްކަމުންނެވެ.
ޔުނައިޓެޑަށް ކުޅޭ ފްރާންސްގެ ޑިފެންޑަރު، ވިލީ ކަމްބްވާލާ ވަނީ ސްޕެއިނުގެ ވިޔަރެއާލަށް ބަދަލުވެފަ އެވެ.
