އިޒްރޭލުން ފަލަސްތީނުގައި ހިންގަމުންދާ ގަތުލްއާންމުގައި ގާޒާއަށް އެއް ގަޑިއިރު ތެރޭގައި ދިން ތިން ހަމަލާގައި 48 މީހުން މަރުވެއްޖެ އެވެ.
ގާޒާގެ ސިވިލް ޑިފެންސް އެޖެންސީއާ ހަވާލާދީ "އަލްޖަޒީރާ" އިން ބުނީ އެ ހަމަލާތައް އަމާޒުވި ނުސައިރަތު ސަރަހައްދުގައި އދ އިން ހިންގާ ސްކޫލަކުން 25 މީހުން، ހާން ޔޫނިސް ސަރަހައްދުން 18 މީހުން އަދި އުތުރު ގާޒާއިން ފަސް މީހުން މަރުވެފައިވާ ކަމަށެވެ.
އިޒްރޭލުން ފަލަސްތީނަށް ފާއިތުވެދިޔަ 10 ދުވަހުގެ ތެރޭގައި ހަ ސްކޫލަކަށް އަމާޒުކޮށް ދިން ހަމަލާގައި 100 އެއްހާ މީހުން ވަނީ މަރުވެފައި ކަމަށް އަލްޖަޒީރާއިން ބުނެ އެވެ.
އިޒްރޭލުން ހަމާއަސްއާ ދެކޮޅަށް ކުރަމުން އަންނަ ހަނގުރާމައެއް ކަމަށް ބުނެ، ފަލަސްތީނުގެ ބޮޑު ބައެއް ވަނީ ސުންނާފަތި ކޮށްލާފަ އެވެ. ނަމަވެސް އިޒްރޭލުން ދޭ ހަމަލާތަކުގައި ގިނައިން މަރުވަނީ ކަމާ ނުބެހޭ އަންހެނުންނާއި ކުޑަކުދިންނެވެ.
އޮކްޓޯބަރު 7، އިން ފެށިގެން އިޒްރޭލުން ގާޒާގައި ހިންގަމުންދާ ގަތުލްއާންމުގައި މިހާތަނަށް 38،700 އަށްވުރެ ގިނަ ފަލަސްތީން މީހުން ވަނީ މަރާލައިފަ އެވެ.
އޭގެއިތުރުން، ހަމަލާތަކުގައި ފަލަސްތީނުގެ 89،000 އަށްވުރެ ގިނަ މީހުން ޒަހަމްވި އެވެ. އަދި އިޒްރޭލުން ވަނީ ފަލަސްތީނުގެ ގިނަ އަދަދެއްގެ މީހުން ރަހީނު ވެސް ކޮށްފަ އެވެ.
