މެޑްރިޑް (ޖުލައި 17) - ރެއާލް މެޑްރިޑަށް ބަދަލުވުމާ އެކު ފްރާންސްގެ ކެޕްޓަން، ކީލިއަން އެމްބާޕޭ ދެކުނު އެންމެ ބޮޑު ހުވަފެން ހަގީގަތަކަށްވެފައިވާ ކަމަށް ރެއާލްގެ ރައީސް ފްލޮރެންޓީނޯ ޕެރޭޒް ވިދާޅުވެއްޖެ އެެވެ.
ޖުމްލަ އެކު، 80،000 ސަޕޯޓަރުން ކުރިމަތީގައި، ރެއާލްގެ ނުވަ ނަމްބަރު ޖޯޒީގައި ދެން ފެންނާނެ އެމްބާޕޭ ތައާރަފްކުރިއިރު، މިއީ މިހާތަނަށް ރެއާލާ ގުޅުނު އާ ކުޅުންތެރިއެއް ބަލާލަން އެންމެ ގިނަ މީހުން ހާޒިރުވި އިވެންޓެވެ.
މީގެ ކުރިން، މި ރެކޯޑް އޮތީ، 2009 ވަނަ އަހަރު ރެއާލާ ގުޅުނު ކްރިސްޓިއާނޯ ރޮނާލްޑޯގެ އިވެންޓަށެވެ.
މި އިވެންޓްގައި ވާހަކަދައްކަވަމުން ޕެރޭޒް ވިދާޅުވީ، މީގެ ބާރަ ވަރަކަށް އަހަރު ކުރިން ވެސް އެމްބާޕޭ އަކީ ރެއާލްގެ މެހެމާނެއް ކަމަށެވެ.
އިއްޔެ ބޭއްވި އެމްބާޕޭގެ އިވެންޓްގެ ތެރެއިން، ޒިދާން (ވ) އާއި އެމްބާޕޭ
"މީގެ 12 އަހަރު ކުރިން، ޒިނެދިން ޒިދާންއާ އެކު، 12 އަހަރުގެ ކުޑަކުއްޖެއް ރެއާލް މެޑްރިޑް ސިޓީ އަށް އައި. އެއީ މި އިވެންޓް އެ ކުޅުންތެރިއަކަށް ޓަކައި ހާއްސަ ކުރެވިފައިވާ އެމްބާޕޭ. މި ވަގުތަކީ، ދުނިޔޭގައި ހުރި އެންމެ މޮޅު އެއް ކުޅުންތެރިއަކު އަހަރެމެންނާ އެ ގުޅެނީ، އޭނާގެ ހަޔާތުގެ އެންމެ ބޮޑު ހުވަފެން ހަގީގަތަކަށް ހަދަން، އަހަރެމެން މޮޅު ޓީމެއްގެ ގޮތުގައި ކުރިއަށްގެންދަން އެހީވަން،" ޕެރޭޒް ވިދާޅުވި އެވެ.
އެމްބާޕޭގެ އިވެންޓްގައި އިއްޔެ، ޒިދާން ވެސް ބައިވެރިވި އެވެ.
ރެއާލާ އެކު އެމްބާޕޭ، 24، ހަދާފައިވަނީ ފަސް އަހަރުގެ ކޮންޓްރެކްޓެކެވެ. މިދިޔަ އަހަރުތަކުގައި ވެސް އެމްބާޕޭ ރެއާލާ ގުޅޭނެ ކަމުގެ ވާހަކަތައް ދެކެވުނު ނަމަވެސް އެ ފަހަރުތަކުގައި، ޕީއެސްޖީގައި އެމްބާޕޭގެ ކޮންޓްރެކްޓް އޮތުމުން ޑީލް ނުހިނގި އެވެ. އެމްބާޕޭ، ރެއާލަށް މި ސޮއިކުރީ ޕީއެސްޖީގެ ކޮންޓްރެކްޓް ނިންމާލުމަށް ފަހު އެވެ.
ރެއާލްގެ ރައީސް ޕެރޭޒް (ވ) އާއި އެމްބާޕޭ.
ޕެރޭޒް ވިދާޅުވީ، އެމްބާޕޭ، ރެއާލަށް ގެންނަން ކުރަން ޖެހުނު މަސައްކަތަކީ ޖުމްލަކޮށް ބަލާްއިރު އުނދަގޫ ހާލަތްތަކެއް މީގެ ކުރިން ކުރިމަތިވި ކަމެއް ކަމަށެވެ. އެކަމަކު، ޔަގީންކަން އޮތް ކަމަކީ އަބަދުވެސް އެމްބާޕޭ ހިތުގައި ރެއާލަށް ކުޅުމުގެ ޝައުގުވެރިކަން އޮތް ކަން ކަމުގައި ޕެރޭޒް ފާހަގަކުރެއްވި އެވެ.
"ގިނަ ބަޔަކަށް ގަބޫލުުކުރަން އުނދަގޫވި މަސައްކަތެއް މި ކާމިޔާބުކުރެވުނީ، 15 ފަހަރު ޗެމްޕިއަންސް ލީގު ހޯދާފައިވާ ޓީމެއްގެ ބެޖް ޖަހައިގެން، ދެން އެ ނުކުންނަ ކުޅުންތެރިޔާ (އެމްބާޕޭ)އާ އެކީގައި އަހަރެމެން އިތުރު ހަރުފަތަކަށް ދާނަން،" ޕެރޭޒް ވިދާޅުވި އެވެ.
އެމްބާޕޭގެ ފައުންޑޭޝަން، "އިންޕްޔާޑް ބައި ކޭއެމް" އަށް ރެއާލުން ވެސް އެހީތެރިކަން ފޯރުކޮށްދޭނެ ކަމަށާއި އެއީ އެމްބާޕޭ ލެވަލްގެ ކުޅުންތެރިން ފުޓްބޯޅަ އަށް ނެރެދިނުމުގެ މަގެއް ކޮށައިދިނުމުގެ ވިސްނުމުގައި ކަމަށް ޕެރޭޒް ވަނީ ވިދާޅުވެފަ އެވެ.
