ރައްޔިތުންގެ މަޖިލީހުގެ ޕެޓިޝަން ކޮމިޓީގެ މިއަދުގެ ބައްދަލުވުމަށް އެންމެ ފަހު ވަގުތު ހާޒިރު ނުވެވޭނެ ކަމަށް ހައުސިން މިނިސްޓަރު ޑރ. އަލީ ހައިދަރު އަހުމަދު އެންގެވުމުން ކޮމިޓީގެ ބައްދަލުވުން ކުރިއަށްނުގެންދެވި އޭނާއާ މެދު މެންބަރުން ނުރުހުމާއި ކަންބޮޑުވުން ފާޅުކޮށްފި އެވެ.
ޕެޓިޝަން ކޮމިޓީގައި މިއަދު އޮތީ ގެދޮރުވެރިޔާ ސްކީމްގެ ދަށުން ފްލެޓް ލިބޭނެ ކަމަށް ގެޒެޓު ކޮށްފައިވާ އެންމެހާ ފަރާތްތަކަށް އަދި އެކަމުގެ މަސްލަހަތު އޮތް ފަރާތްތަކުގެ ފްލެޓް ބާތިލު ނުކުރުމަށް އެދި ހުށަހަޅާފައިވާ ޕެޓިޝަނާ ގުޅޭގޮތުން ހައުސިން މިނިސްޓްރީގެ އިސް ބޭފުޅުންނާ ބައްދަލުކުރުމެވެ.
އެ ކޮމިޓީއަށް ހާޒިރުވެވަޑައިގަންނަވާނެ ކަމަށް ހައިދަރު ވެސް އޮތީ އަންގަވާފަ އެވެ. ނަމަވެސް, ބައްދަލުވުން ފެށުމުން މުގައްރިރު, ގައްދޫ ދާއިރާގެ މެންބަރު މުހައްމަދު އަލީ ވަނީ މިއަދު އެ ބޭފުޅުންނަށް ހާޒިރު ނުވެވޭނެ ކަމަށް އަންގަވާފައިވާތީ އެހެން ދުވަހަކަށް އެޖެންޑާ ކުރާނެ ކަމަށް ވިދާޅުވެފަ އެވެ. ހައިދަރު ހާޒިރު ނުވީ މިއަދު ކެބިނެޓް ބައްދަލުވުމެއް އޮތް ކަމަށް ވިދާޅުވެ އެވެ.
މި މައްސަލައަކީ މީގެ ދެ ދުވަސް ކުރިން އެޖެންޑާ ކޮށްފައިވާ މައްސަލައެއް ކަމަށާއި ހާޒިރު ނުވެވޭނެކަން އަންގަން ޖެހެނީ އެންމެ ފަހު ވަގުތުގައި ނޫން ކަމަށް ކޮމިޓީގައި އިންނަވާ އެމްޑީޕީގެ ހަމައެކަނި މެންބަރު ހުސައިން ޒިޔާދު (ފިއްޓޭ) ވިދާޅުވި އެވެ. އަދި, ކެބިނެޓް ބައްދަލުވުން މިއަދު އޮންނަކަން ކުރިން ވެސް އެންގޭނެ ކަމަށް އޭނާ ވިދާޅުވި އެވެ.
ދިއްދޫ ދާއިރާގެ ގޮނޑީގައި ޕީއެންސީ ތަމްސީލު ކުރައްވާ މެންބަރު އަބްދުއްލަތީފް މުހައްމަދު ވެސް ވަނީ ކޮމިޓީއަށް ހާޒިރު ނުވެ އެންމެ ފަހު ވަގުތު އެކަން ދެންނެވުމަކީ ގަބޫލުކުރަން ފަސޭހަކަމެއް ނޫން ކަމަށް ވިދާާޅުވެފަ އެވެ.
"އެހާ އީޒީކޮށް މިކަންކަން ނުނެގޭނެ މިކަންކަމެއް. މިއަށްވުރެ ފުރިހަމައަށް މިކަންކަން ކުރެވެން ވާނެ. ޕީއެންސީގެ މެޖޯރިޓީއެއް އޮތް ކަމުގައި ވިޔަސް އަޅުގަނޑުމެން ގަބޫލެއް ނުކުރަން މިހާ މުހިންމު މައްސަލައެއްގައި މިނިސްޓަރު މިހާ ޒިންމާދާރުކަން ކުޑަކޮށް އަމަލު ބައްޓަން ކުރެވޭނެ ކަމަށް," ލަތީފް ވިދާާޅުވި އެވެ.
ހައުސިން މިނިސްޓްރީން މިއަދު އަމަލުކުރީ މަޖިލީހަށް އިހުތިރާމް ކުޑަވާ ގޮތަށް ކަމަށާއި އެކަން ހަރުކަށި އިބާރާތުން ކުށްވެރި ކުރާ ކަމަށް ސަރުކާރު ކޯލިޝަނުގައި ހިމެނޭ މޯލްޑިވްސް ޑިވެލޮޕްމަންޓު އެލަޔަންސް (އެމްޑީއޭ) ގެ ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވި އެވެ.
"ވަޒީރަށް ވަޑައިނުގަނެވޭނީނަމަ ކޮމިޓީ ކުރިއަށްގެންދެވޭނެ އިންތިޒާމު ވަޒީރު ހަމަޖައްސަން ޖެހޭ. ކޮމިޓީއަށް އަޅުގަނޑުމެން ހާޒިރުވުމަށް ފަހު ދެން ވަޒީރަށް ވަޑައިނުގަންނެވޭކަން އެންގެވުމަކީ ދެން އެއީ ވަޒީރެއްގެ ޒިންމާ ނެތްކަން ހާމަވާ ކަމެއް," ދެވަނަ ފުރުސަތުގައި ފިއްޓޭ ވިދާޅުވި އެވެ.
މިއީ ހައިދަރުގެ ފަރާތުން މިކަހަލަ ކަމެއް ފެނިގެންދިޔަ ފުރަތަމަ ފަހަރު ނޫން ކަމަށާއި ދެން ތިއްބެވި ވަޒީރުން ވެސް އެގޮތަށް އަމަލުކުރެއްވުމުގެ ބިރުވެރިކަން އޮތް ކަމަށް އޭނާ ވިދާޅުވި އެވެ.
"ދެން ތިއްބެވި ބޭފުޅުން ވެސް މިގޮތަށް އަމަލުކުރައްވަފާނޭ އަޅުގަނޑުމެން ފަހަތަށް ޖެހިލައިފިއްޔާ ސަރުކާރުގެ ދިފާއުގައި. ނޫން ނޫން. އަޅުގަނޑުމެންނަކީ ވަޒީރުންނަށް ވުރެ ވަރުގަދަ ބައެއް. ހަގީގަތް މި ބުނަނީ. އަޅުގަނޑުމެން މޭ ފުއްޕާފައި ނުނުކުތަސް ވަޒީރުން ރައްޔިތުންގެ މަޖިލީހަށް ހާޒިރުވާން އަންގައިފިއްޔާ ކޮންމެ ގަޑިއަކު ހާޒިރުވާން ޖެހޭނެ, ޖަވާބު ދޭން ވެސް ޖެހޭނެ," ފިއްޓޭ ކަންބޮޑުވުން ފާޅުކުރައްވަމުން ވިދާޅުވި އެވެ.
"އަޅުގަނޑުމެންނަށް ވެސް ކޮންމެވެސް ވަރެއްގެ އިހުތިރާމެއް ކުރަން ވާނެ. އަޅުގަނޑުމެންނަކީ ރައްޔިތުން އިންތިހާބު ކޮށްގެން މިތަނަށް އައިސް މަސައްކަތް ކުރާ ބައެއް. އައްޔަނު ކުރި ބައެއް ނޫން އަޅުގަނޑުމެންނަކީ."
ކޮމިޓީގެ ނައިބު މުގައްރިރަކަށް އިންނެވި ހެންވޭރު އުތުރު ދާއިރާގެ މެންބަރު މުހައްމަދު އައިފާން ހައިދަރުގެ ދިފާއުގައި ވާހަކަ ދެއްކެވި އެވެ. އެއީ އޭނާ މަޖިލީހުގެ އަގު ވައްޓާލުމަށް ގަސްތުގައި ކުރެއްވި ކަމެއް ކަމަށް ގަބޫލުނުކުރާ ކަމަށް އައިފާން ވިދާޅުވި އެވެ. ނަމަވެސް, ވެލިދޫ މެންބަރު އައްބާސް ވަނީ އެއީ ގަސްތުގައި ހައިދަރު ކުރެއްވި ކަމެއް ކަމަށް އައިފާން ވާހަކަ ދައްކަވަނިކޮށް ފަހަތުން ވިދާޅުވެފަ އެވެ.
"އަޅުގަނޑުމެން އެދެނީ ހައުސިން މިނިސްޓަރު މިއަދު ކަން ކުރެއްވި ގޮތަށް ދެން ތިއްބެވި ވަޒީރުން ކަން ނުކުރައްވާނެ ކަމަށް," އައްބާސް ވިދާޅުވި އެވެ.
ދެން އޮންނަ ކޮމިޓީ ބައްދަލުވުމަކަށް ހައިދަރު ހާޒިރު ކުރުމަށް މިއަދު ނެގި ވޯޓުން ވަނީ ފާސްކޮށްފަ އެވެ. އެ ބައްދަލުވުން އޮންނާނެ ދުވަހެއް އަދި ނޭނގެ އެވެ.
