މިއުނިކް (ޖުލައި 13) - މި ފަހަރުގެ ޔޫރޯ ފުޓްބޯޅަ މުބާރާތުގައި ފެނުނީ ޕޯޗުގަލްގެ އަސްލު ފެންވަރުގެ ކުޅުމެއް ނޫން ކަމަށް މަޝްހޫރު ކޯޗު ހޯސޭ މޮރީނިއޯ ބުނެފި އެވެ.
ދާދި ފަހުން ތުރުކީގެ ފެނަބާޗޭއާ ހަވާލުވި، މޮރީނިއޯ ވަނީ، ޖަރުމަނުގައި މި ފަހަރުގެ ޔޫރޯ ފެށުމުގެ ކުރިން، ޕޯޗުގަލް އަކީ މުބާރާތުގެ އެއް ފޭވަރިޓް ކަމަށް ބުނެފަ އެވެ. އެކަމަކު، އެ ޓީމަށް އެކަށީގެންވާ ވަރަށް ނުކުޅެވުނު ކަމަށް އޭނާ ހާމަކުރި އެވެ.
"ހިތްނުތަނަވަސްކަމެއް ހުންނާނެ ރަނގަޅަށް ކުޅެވޭނެ ކަމަށް ބެލެވޭ ޓީމެއް ދަށްކޮށް ފެނުނިއްޔާ. ޕޯޗުގަލްގައި އެ އޮތް ޓީމުގެ ފެންވަރު ވަރަށް ބޮޑަށް ވެސް ރަނގަޅު. އަހަރެން އެހެންވެ، ބުނީ ވެސް ޕޯޗުގަލް އަކީ ފޭވަރިޓެއް ކަމަށް، ހަމަ އެ ގޮތަށް ފްރާންސް ވެސް އިންގްލެންޑް ވެސް އެއީ ފޭވަރިޓުން،" މޮރީނިއޯ ބުންޏެވެ.
"ޕޯޗުގަލް މީގެ އެންމެ ދަށް ގޮތަކަށް އަހަންނަށް މި ފެނުނީ،"
މި ފަހަރުގެ ޔޫރޯގައި ޕޯޗުގަލް ކެޓީ، ކުއާޓާ ފައިނަލުގައި ފްރާންސް އަތުން ޕެނަލްޓީ ޖަަހައިގެންނެވެ. ޕޯޗުގަލް ވަނީ މި ފަަހަރު ޔޫރޯގައި ހައިރާންކުރަނިވި ގޮތަކަށް، ގްރޫޕް ސްޓޭޖުގެ ފަހު މެޗުން، ޖޯޖިއާ އަތުން ވެސް ބަލިވެފަ އެވެ.
މޮރީނިއޯ ވަނީ މީގެ ކުރިން އެކި ފަހަރު މަތިން، ޕޯޗުގަލް ގައުމީ ޓީމަށް ކޯޗުކޮށްދިނުމުގެ ޝައުގުވެރިކަން ހުރި ކަމަށް ބުނެފަ އެވެ. ތުރުކީގެ މީޑިއާ ރިޕޯޓްތައް ބުނާގޮތުން، މޮރީނިއޯ ފެނަބާޗޭއާ ހަވާލުވި ކޮންޓްރެކްޓްގެ އެއް މާއްދާގައިވާ ގޮތުން، އެއް ސީޒަނަށް ފަހު، މޮރީނިއޯ ބޭނުންވާ އެއް ޓީމެއްގެ ހުށަހެޅުން އަތުވެއްޖެނަމަ، ކޮންޓްރެކްޓް ކެންސަލްކުރެވޭ ގޮތަށް ވަނީ ހިމަަނައިފަ އެވެ. ރިޕޯޓްތައް ބުނާގޮތުން، އެއީ ޕޯޗުގަލް ގައުމީ ޓީމުގެ އޮފާ އެވެ.
މި ފަހަރުގެ ޔޫރޯ ފުޓްބޯޅަ މުބާރާތުގައި މޮރީނިއޯ އަށް އެންމެ ސަޕްރައިޒިން ޓީމަކީ ސްޕެއިން އެވެ. މޮރީނިއޯ ބުނީ، މުބާރާތް ކުރިއަށްދިޔަ ވަރަކަށް ސްޕެއިން ވީ އިތުރަށް ވަރުގަދަ ކަމަށާއި ވަރަށް ބޮޑު ޓީމު ޑިވެލޮޕްމަންޓެއް ފެނިގެންދިޔަ ކަމަށެވެ.
