ޝާލޮޓް، ޔުނައިޓެޑް ސްޓޭޓްސް (ޖުލައި 11) - ކޮޕަ އެމެރިކާ ފުޓްބޯޅަ މުބާރާތުގެ ސެމީ ފައިނަލުގައި ރޭ އުރުގުއޭ 1-0 އިން ބަލިކޮށް އެ ޓީމު ކަޓުވާލުމަށް ފަހު ކޮލަމްބިއާ އިން ފައިނަލަށް ދަތުރުކޮށްފި އެވެ.
ފައިނަލުގައި އަންނަ އާދިއްތަ ދުވަހު، ކޮލަމްބިއާ ކުޅޭނީ އެންމެ ފަހުގެ ޗެމްޕިއަން، އާޖެންޓީނާއާ ދެކޮޅަށެވެ.
ކޮލަމްބިއާ އިން ރޭގެ މެޗުގައި ޖެހި ހަމައެކަނި ލަނޑު ކާމިޔާބުކުރީ މެޗުގެ 39 ވަަނަ މިނިޓްގަ އެވެ. މި ލަނޑު ޖެހީ ހަމޭސް ރޮޑްރިގޭޒް ނެގި ކޯނަރަކުން ޖެފަަސަން ލޭމާ އެވެ. މިއީ, މި ފަހަރުގެ މުބާރާުތުގައި ހަމޭސް ރޮޑްރިގޭޒް ތަަނަވަަސްކޮށްދިން ފުރުސަތަކުން ކޮލަމްބިއާ އިން ޖެހި ހަ ވަނަ ލަނޑެެވެ.
މެޗުގެ ނަތީޖާ ނެރެން ކޮލަމްބިއާ އިން ކުރަން ޖެހުނީ އުނދަގޫ މަސައްކަތެކެވެ. އެއީ, ފުރަތަަމަ ހާފުގެ އިތުރު ވަގުތުގައި އެ ޓީމުގެ ޑަނިއަލް މުނޯޒް އަށް ރަތެއް ދެއްކުމުންނެވެ. މުނޯޒް އަށް ރަތެއް ދެއްކީ އުރުގުއޭގެ މެނުއަލް އުގާޓޭ އަށް އުޅަބޮށިން ހަމަލާ ދިނުމުންނެވެ.
އެއް ކުޅުންތެރިއަކު މަދުކޮށް ކުޅުނު ކޮލަމްބިއާ ކޮޅަށް ލަނޑު ޖަހަން ދެ ވަނަ ހާފުގައި އުރުގުއޭ އިން ގިނަ ފުރުސަތުތަކެއް ތަނަަވަސްކުރި އެވެ. އެކަމަކު، ކޮލަމްބިއާ އިން ވަނީ ރަނގަޅަށް ޑިފެންސްކޮށް މެޗުގެ ނަތީޖާ އެ ގޮތުގައި ނިންމާލައި، ފައިނަލުން ޖާގަ ހޯދައިފަ އެވެ.
މިއީ 2001 ވަނަ އަހަރު ކޮޕަ އެމެރިކާގެ ޗެމްޕިއަންކަން ހޯދި ފަހުން، ކޮލަމްބިއާ އިން ކުޅޭ ފުރަަތަމަ ފައިނަލެވެ. މި ފަހަރުގެ ފައިނަލަށް ނުކުންނައިރު، ކޮލަމްބިއާ އަށް ބޮޑު ހިތްހަަމަޖެހުމެއް އެބައޮތެވެ. އެއީ އެ ޓީމު އެންމެ ފަހުން ކުޅުނު، 28 މެޗުން ވެސް ބަލިވެފައިނުވެ އެވެ.
