މޮރިޝަސްގައި މިއަދު ފަށާ ފެލޭޓް މޮރިޝަސް އިންޓަނޭޝަނަލް މުބާރާތުގައި ރިވައިވަލް ސްޕޯޓްސް ކްލަބްގެ ޒަޔާން ޒަކީ އާއި ހަސަން ޒަޔާން ވާދަކުރާ ގޮތަށް ހަަމަޖެހިއްޖެ އެވެ.
މިއަދުން ފެށިގެން އަންނަ އާދިއްތަ ދުވަހުގެ ނިޔަލަށް ކުރިއަށްދާ މޮރިޝަސްގެ މި މުބާރާތުގައި ޒަޔާން ޒަކީ އާއި ހަސަން ޒަޔާން ސިންގަލްސް ބަޔާއި ޑަބަލްސް ބައިގައި ވާދަކުރާނެ އެވެ. އެ ގޮތުން، ހަސަން ޒަޔާން ވާދަކުރާނީ ސިންގަލްސްގެ ކޮލިފައިން ރައުންޑުގަ އެވެ. އަދި ޒަޔާން ޒަކީ ސިންގަލްސްގެ މެއިން ޑްރޯގައި ވާދަކުރާނެ އެވެ.
ފިރިހެން ޑަބަލްސް އިވެންޓްގައި ދެ ޒަޔާންގެ ޕެއާ، ވާދަކުރާނީ މެއިން ޑްރޯގަ އެވެ.
މޮރިޝަސް މުބާރާތުގައި ރިވައިވަލްގެ ކޯޗު، ނަޝްފާން މުހައްމަދު ވެސް ކުޅުންތެރިންނާ އެކު މަސައްކަތްކުރާނެ އެވެ.
މިއީ ރިވައިވަލްއާ އެކު، ހަތަރު އަަހަރުގެ ކޮންޓްރެކްޓެއްގައި ސޮއިކުރި ފަހުން، ހަސަން ޒަޔާން ވާދަކުރާ ބައިނަލްއަގުވާމީ ފުރަތަމަ މުބާރާތެވެ. މި މުބާރާތުގައި ވާދަކުރުމުގެ ކުރިން، ހަސަން ޒަޔާން ވަނީ ރިވައިވަލް އިން ހަމަޖައްސައިދިން ފުރުސަތެއްގައި، މެލޭޝިއާގައި ޓްރެއިނިން ކޭމްޕެއް ވެސް ފުރިހަމަކޮށްފަ އެވެ.
ހަސަން ޒަޔާންގެ އިތުރުން، ގައުމީ ޗެމްޕިއަނެއް ކަމަށްވާ، ނިބާލް އަހުމަދު ވެސް ވަނީ ރިވައިވަލްއާ ގުޅިފަ އެވެ. ނިބާލް، މޮރިޝަސް މުބާރާތުގައި ނުކުޅެނީ، މި ވަގުތު ކުޑަ ބްރޭކެއްގައި ހުރުމުންނެވެ.
