ޓޭބަލް ޓެނިސް އެސޯސިއޭޝަން (ޓީޓީއޭއެމް)ގެ ރައީސްގެ މަގާމަށް ތިން ވަނަ ދައުރަކަށް އަލީ ރަޝީދު (އައްޔަ) އިންތިހާބުވެވަޑައިގެންފި އެވެ.
މިއަދު ކުރިއަށްދިޔަ އިންތިހާބީ ކޮންގްރެސްގައި ވާދަކުރެއްވީ އައްޔަ އެކަނި ކަމަށްވާތީ، ކުރިއަށްދިޔައީ ފެންނަ ނުފެންނަ ވޯޓެކެވެ.
އެންމެ ފުރަތަމަ ރައީސަކަށް އިންތިހާބުވީ، ވާދަވެރިއަކު ނެތި، 2016 ވަނަ އަހަރު ބޭއްވި އިންތިހާބު ކާމިޔާބު ކުރައްވައިގެންނެވެ. އެކަމަކު، އެންމެ ފަހުން، 2020 ވަނަ އަހަރު ބޭއްވި އިންތިހާބު ވާދަވެރިކޮށް ދިޔައިރު، އައްޔަ، ވަނީ ދެ ވަނަ ދައުރަކަށް އިންތިހާބުވެވަޑައިގެންފަ އެވެ. އައްޔަ ދެ ވަނަ ދައުރަކަށް އިންތިހާބުވީ، ބޮޑު ތަފާތަކުން ތޯހާ ސަލީމް ބަލިކޮށެވެ.
ޓީޓީ އެސޯސިއޭޝަން ކަޕުގެ ސިންގަލްސް ޗެމްޕިއަންކަމާއި ގައުމީ މުބާރާތުގެ ޑަބަލްސް އާއި ޓީމް ޗެމްޕިއަންކަން ހޯދާފައިވާ އައްޔަ އަންނަނީ 2006 ވަނަ އަހަރުން ކުޅުމުން ރިޓާޔަކުރި ފަހުން، އެސޯސިއޭޝަނަށް އެކި ގޮތްގޮތުން ހިދުމަތް ކުރަމުންނެވެ. އެ ގޮތުން، 2006 އިން 2008 އަށް އެސޯސިއޭޝަންގެ އިދާރީ މަސައްކަތްތައް ކުރިއިރު، 2008 ވަނަ އަހަރުން ފެށިގެން އޭނާ އަކީ ޓީޓީގެ ނައިބް ރައީސް އެވެ.
އައްޔަ އަކީ މޯލްޑިވްސް އޮލިމްޕިކް ކޮމިޓީގެ ހިންގާ ކޮމިޓީގެ ވެސް މެމްބަރެކެެވެ.
މޯލްޑިވްސް ސްޕޯޓްސް އެވޯޑްސް އިން އެންމެ ފުރަތަމަ ހޮވި އެންމެ މޮޅު އެސޯސިއޭޝަންގެ މަގާމު ޓީޓީ އެސޯސިއޭޝަނަށް ލިބުނުއިރު، މިދިޔަ އަށް ވަރަކަށް އަހަރަށް ބަލާއިރު، ކާމިޔާބީގެ ގޮތުން ޓީޓީ އޮތީ އެންމެ މަތީ ފަނޑީގަ އެވެ.
އައްޔަ، މީގެ ކުރިން، "އަދަދު" އަށް ދެއްވި އިންޓަވިއުއެއްގައި ވަނީ މިދިޔަ ދައުރަށް ޓާގެޓްކުރި ގިނަ ކަންތައްތަކެއް ހާސިލްވެފައިވާ ކަމަށް ވިދާޅުވެފަ އެވެ. އެ ގޮތުން، މިދިޔަ ހަަަތަރު އަހަރު ތެރޭ، ހަތަރު ރަން މެޑަލް، އަށް ރިހި މެޑަލް، ދެން 13 ލޯ މެޑަލް ލިބުނުކަން އައްޔަ ފާހަގަކުރެއްވި އެވެ.
މިއަދު އިންތިހާބުކުރި ޓީޓީ އެސޯސިއޭޝަންގެ އެހެން މަގާމުތަކަށް ބަލާއިރު، ނައިބު ރައީސްގެ މަގާމަށް އިންތިހާބުވީ ދާދި ފަހުން، މޯލްޑިވްސް މާކެޓިން އެންޑް ޕަބްލިކް ރިލޭޝަންސް (އެމްއެމްޕީއާރުސީ) ގެ މެނޭޖިން ޑިރެކްޓަރުގެ މަގާމަށް އައްޔަނުކުރި ޝިއުރީ އެވެ. ކުރީގެ ކުުޅުންތެރިޔާ، ޝިއުރީ އަކީ މިދިޔަ ދައުރުގެ ވެސް ނައިބު ރައީސް އެވެ.
އެހެން މަގާމުތަކަށް ބަލާއިރު، ހަޒާންދާރަކަށް އަހުމަދު ޝާޒިލް، ހިންގާ ކޮމިޓީގައި ފުރިހަމަ މެމްބަރުން ތަމްސީލްކުރާ އަންހެން މެމްބަރަކަށް އައިޝަތު ފަދުވާ ރަޝީދު، ހިންގާ ކޮމިޓީގައި ފުރިހަމަ މެމްބަރުން ތަމްސީލްކުރާ ފިރިހެން މެމްބަރަކަށް، އަމްޕަޔަރު، އައްޒާމް އިބްރާހިމް، ހިންގާ ކޮމިޓީގައި ކްލަބް ޖަމިއްޔާތައް ތަމްސީލްކުރާ މެމްބަރު ކަމަށް ޖާދުﷲ ހަސަން އަދި ހިންގާ ކޮމިޓީގައި އެސޯސިއޭޓް މެމްބަރުން ތަމްސީލްކުރާ މެމްބަރު ކަމަށް އިސްމާއިލް ސުޖާއު ވަނީ އިންތިހާބުވެފަ އެެވެ.
ރާއްޖޭގެ ތިން އެސޯސިއޭޝަނަކުން މި އަަހަރު ބޭއްވި އިންތިހާބުތަކުގައި، މަގާމުުތަކަށް އެންމެ ފަރާތަކުން ކުރިމަތިލާފައިވާތީ، ނެގީ ފެންނަ ނުފެންނަ ވޯޓެކެވެ. އެއީ، ސްވިިމިން އެސޯސިއޭޝަނާއި އެތުލެޓިކްސް އެސޯސިއޭޝަން އެވެ.
