ވ. ބޮޑުފިނޮޅު ވިއްކާލުމާ ގުޅިގެން، އެތަނުގެ ހިމާޔަތުގައި ބޮޑު މުޒާހަރާއެއް ކުރުމަށް ތައްޔާރުވާން ފަށައިފި އެވެ.
ވ. އަތޮޅު ތިނަދޫއާ އެއް ބިތެއްގައި، އެ ރަށާ 7.7 ކިލޯމީޓަރު ދުރުގައި އޮތް އެ ފިނޮޅު ވިއްކާލީ 729،000 ޑޮލަރަށް (11.2 މިލިއަން ރުފިޔާ) އަށް ރާއްޖޭގައި އެންމެ ފުޅާ ދާއިރާގެ ލޯކަލް ޓޫރިޒަމް ހިންގާ ކާނި ހޮޓެލްސްއަށެވެ.
"ބޮޑުފިނޮޅު މުޒާހަރާ" ނަމުގައި ކުރާ އެ މުޒާހަރާ ކުރުމަށް ހަމަޖެހިފައި ވަނީ ވ. ކޮޅުދިއްފުށި ފަޅުގައި ބުރާސްފަތި ދުވަހު މެންދުރު 2:00 ޖަހާއިރު އެވެ.
ބޮޑުފިނޮޅު ވިއްކާލުމާ ދެކޮޅަށް ވ. އަތޮޅުގެ ހުރިހާ ރަށެއްގައި ފަތުރުވެރިކަމުގެ ވިޔަފާރި ކުރަމުންދާ ފަރާތްތަކުން ރައީސް ޑރ. މުހައްމަދު މުއިއްޒުއަށް ޕެޓިޝަނެއް ހުށަހެޅުމަށް ދަނީ ސޮއި ކުރަމުންނެވެ.
ބޮޑުފިނޮޅު ވިއްކާލުމާ ގުޅިގެން ޓޫރިޒަމް މިނިސްޓަރު އިބްރާގިމް ފައިސަލްއަށް ސިޓީއެއް ފޮނުވައި ވ. އަތޮޅު ކައުންސިލުން ވަނީ ކަންބޮޑުވުން ވެސް ފާޅުކޮށްފަ އެވެ.
"އަތޮޅުގެ ފަޅު ރަށްތައް ރިސޯޓް ވިޔަފާރިއަށް ދޫކޮށްފައިވުމުން އެކްސްކާޝަން އަދި ޕިކްނިކް ދިޔުމަށް އެކަށޭނެ ތަނެއް އަތޮޅުގައި ނެތްހިނދު އަދި ތިޔަ މިނިސްޓްރީން ވިއްކާލި ކަމަށް މި ކައުންސިލަށް ނުރަސްމީކޮށް މައުލޫމާތު ލިބިފައިވާ ފިނޮޅަކީ މި ދެންނެވި ވިޔަފާރިތަކުން ކޮންމެ ދުވަހަކު އެކްސްކާޝަން ދިޔުމަށް ބޭނުންކުރަމުންދާ މަދު ތަންތަނުގެ ތެރެއިން އެންމެ ގިނައިން ބޭނުންކުރަމުންދާ ތަން،" އެ ކައުންސިލުން ބުންޏެވެ.
އެ ކައުންސިލުން ވަނީ އަތޮޅުން ފަޅުތައް ދޫކުރުމާއި އެކަމުގެ އެއްވެސް މައުލޫމާތެއް އަތޮޅު ކައުންސިލާއި، މިނިސްޓްރީން ހިއްސާކޮށްފައި ނުވާތީ ވެސް ކަންބޮޑުވުން ފާޅުކޮށްފަ އެވެ.
