ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސަކަށް ހުންނެވި ބައްސާމް އަދީލް ޖަލީލްގެ ލީޑަޝިޕްގެ އިންތިހާބީ ދައުރުގެ މުއްދަތު މިއަދަށް ހަަމަވެއްޖެ އެވެ.
ބައްސާމް، ދެ ވަނަ ދައުރަކަށް އެފްއޭއެމްގެ ރައީސްކަމަށް އިންތިހާބުވީ، 2020 ވަނަ އަހަރުގެ ޖުލައި ދެ ވަނަ ދުވަހު ބޭއްވި އިންތިހާބު ކާމިޔާބު ކުރައްވައިގެންނެވެ. އެއީ، ފީފާ އާއި އޭއެފްސީން އޮބްޒާވްކުރި އިންތިހާބީ ކޮންގްރެސްއެކެވެ.
އެކަމަކު، އެ އިންތިހާބު ބަލައިގަންނަން، ކޮމިޝަނާ އޮފް ސްޕޯޓްސް އިން ނިންމީ، 2020 ވަނަ އަހަރުގެ ސެޕްޓެމްބަރު ތިން ވަނަ ދުވަހު އެވެ.
އެފްއޭއެމްގެ އިންތިހާބު، 2020 ވަނަ އަހަރު، އެފްއޭއެމް ހައުސްގެ ޓެރަސްގައި ބޭއްވިއިރު، އެކަން ކުރީ ކުޅިވަރު ގާނޫނާއި އެފްއޭއެމްގެ އަސާސީ ގަވާއިދުގެ ވެސް ވަކި މާއްދާތަކަކާ ހިލާފަށް ކަމަށް ބުނެ، ރައްޔިތުންގެ މަޖިލީހުގެ ބައެއް މެމްބަރުން ވެސް ވަނީ އެ އިންތިހާބުގެ ސައްހަކަމާ މެދު އޭރު ސުވާލު އުފައްދައިފަ އެވެ.
ރައްޔިތުންގެ މަޖިލީހުގެ އިޖުތިމާއީ ކޮމިޓީން އެފްއޭއެމާ ގުޅޭ މައްސަލައެއް އޭރު ބަލަމުންދާތީ އެ އެސޯސިއޭޝަނުގެ އިންތިހާބު ފަސްކުރަން ސްޕޯޓްސް މިނިސްޓްރީ މެދުވެރިކޮށް އެދުނު ނަމަވެސް އެފްއޭއެމުން ވަނީ ފީފާ އާއި އޭއެފްސީގެ އެންގުމާ އެއްގޮތަށް ކަމަށް ބުނެ، ބާއްވަން ކަނޑައެޅި ތާރީހު، 2020 ވަނަ އަހަރުގެ ޖުލައި ދެ ވަނަ ދުވަހުގައި އިންތިހާބު ބާއްވައިފަ އެވެ.
އޭގެ ފަހުން، ކުރީ ސަރުކާރުގެ ކުޅިވަރާ ބެހޭ ވަޒީރު، އަހުމަދު މަހުލޫފް، 2020 ވަނަ އަހަރުގެ އޮގަސްޓް މަހުގެ ތެރޭގައި މަޖިލީހަށް ހާޒިރުވެ މެމްބަރުންގެ ސުވާލުތަކަށް ޖަވާބުދެއްވިއިރު، ވަނީ އެފްއޭއެމްގެ އިންތިހާބު އަމިއްލަ ހައިސިއްޔަތުން ބަލައިގަންނަ ކަމަށް ވިދާޅުވެފަ އެވެ. އޭގެ ފަހުން، ކޮމިޝަނާ އޮފް ސްޕޯޓްސް އިން ވެސް އެ އިންތިހާބު ބަލައިގަންނަން ނިންމީ އެވެ.
އެފްއޭއެމް އިން އާ ހިންގާ ބޯޑެއް އިންތިހާބުކުރަން، އިންތިހާބެއް ބާއްވަން މި އަހަރުގެ ޖެނުއަރީ މަހުން ފެށިގެން މަަސައްކަތްކުރަމުން އައި ނަމަވެސް ބޭއްވިފައިނުވަނީ އޭއެފްސީ/ފީފާގެ އެންގުންތަކާ ހެދި އެވެ.
އެއީ، ބައްސާމް އާއި އޭނާގެ ގާތް ފަރާތްތަކާ ގުޅޭ އެފްއޭއެމްގެ ހިޔާނާތާއި މަނީ ލޯންޑަރިންގެ މައްސަލަތަކެއްގެ ތަހުގީގާއި އެފްއޭއެމްގެ އަސާސީ ގަވާއިދުގައި ހުރި މައްސަލަތަކެއްގެ ސަބަބުން، އޭއެފްސީ/ފީފާ އިން އައި އެންގުމެކެވެ.
މިދިޔަ މަހުގެ 20 ވަނަ ދުވަހު، ފީފާ އިން ވަނީ ބައްސާމް، ނުވަ މަސް ދުވަހަށް ސަސްޕެންޑްކޮށްފަ އެވެ.
ފީފާ އިން މިރޭ ނެރުނު ބަޔާނެއްގައި ބުނެފައިވަނީ މިއީ ރާއްޖޭގެ ޕްރޮސެކިއުޓާ ޖެނެރަލް އޮފީސް (ޕީޖީ އޮފީސް) އިން ކުރަމުން އަންނަ ތަހުގީގުގެ ކަންކަމަށް ބަލައި، ފީފާގެ އިންވެސްޓިގޭޓަރީ ޗެމްބަރުން ނިންމާފައިވާ ނިންމުމެއް ކަމަށެވެ. އެ ގޮތުން، ޕީޖީ އޮފީހުގެ މި ތަހުގީގުގެ ތެރެއިން، 22 އޮކްޓޫބަރު 2023 ގައި އެފްއޭއެމް ހައުސް ބަލައި ފާސްކޮށްފައިވާއިރު، މަނީ ލޯންޑަރިންނާއި ކޮރަޕްޝަންގެ އިތުރުން އެފްއޭއެމަށް ލިބޭ ފައިސާގެ ބޭނުން ނަހަމަ ގޮތުގައި ކޮށްފައިވާ ކަމުގެ ހެކި ފެނިފައިވާ ކަމަށެވެ.
ފީފާގެ އިންވެސްޓިގޭޓަރީ ޗެމްބަރުން ހޯދި ހޯދުމުން، ބައްސާމް ވަނީ އެފްއޭއެމްގެ އެންމެ އިސްވެރިއެއްގެ މަގާމުގެ ނުފޫޒު ބޭނުންކޮށްގެން، ހަދިޔާ ހޯދުމާއި ރާއްޖެ އަށް ލިބޭ ފަންޑް/ފައިސާ ނަަހަަމަ ގޮތުގައި ބޭނުންކުރުމުގެ ކަންތައްތަކެއް ކޮށްފައިވާ ކަމުގެ މައުލޫމާތު ވެސް ލިބިފައިވެ އެވެ. އަދި މި ކަންކަމުގެ ތަހުގީގު އިތުރަށް ކުރިއަށްގެންދަން ފީފާ އިން ވަނީ ނިންމައިފަ އެވެ.
އެފްއޭއެމްގެ ހުރި މައްސަލަތައް ބަލަން، އޭއެފްސީ އާއި ފީފާގެ ޓީމެއް ވަނީ ރާއްޖެ އައިސް ފުޓްބޯޅައާ ގުޅޭ އެންމެހާ ސްޓޭކްހޯލްޑަރުންނާ މަޝްވަރާކޮށްފަ އެވެ. އެ ގޮތުން، ކޮމިޝަނާ އޮފް ސްޕޯޓްސް، މުހައްމަދު ތޮލާލް ވަނީ ބައްދަލުވުމަކަށް އިޝާރާތްކުރައްވައި، އެފްއޭއެމާ ގުޅޭގޮތުން، ފީފާ/އޭއެފްސީގެ ނިންމުމެއް އަންނާނެ ކަމަށް ވިދާޅުވެފަ އެވެ.
މައުލޫމާތު ލިބިފައިވާ ގޮތުގައި، ފީފާ އިން މި މަހު އެފްއޭއެމް އިންޓަރިމް ހާލަތަކަށް ގެންނަން ވަނީ ނިންމައިފަ އެވެ. އެއީ އަސާސީ ގަވާއިދުގައި ހުރި މައްސަލަތައް ހައްލުކޮށް، އިންތިހާބަކާ ހަމައަށް ގެންދިއުމަށެވެ.
