ރައީސް ޑރ. މުހައްމަދު މުއިއްޒަށް ސިހުރު ހެދިކަމުގެ ތުހުމަތުކޮށް ހައްޔަރުކޮށްފައި ހުރި އެންވަޔަރަމެންޓު މިނިސްޓްރީގެ ކުރީގެ ސްޓޭޓް މިނިސްޓަރު، ފާތިމަތު ޝަމްނާޒް އަލީ ސަލީމް އަދި އޭނާގެ ކޮއްކޮގެ ބަންދަށް އިތުރު ހަތް ދުވަސް އިއްޔެ ޖެހި އެވެ.
އެ ދެ ބެއިންގެ ބަންދުގެ މުއްދަތު އިތުރުކުރިއިރު، ސިހުރު ހެދި ކަމަށް ތުހުމަތު ކުރާ ތ. ކިނބިދޫ ހުސައިން ސަމީރު ވަނީ ބަންދުން ދޫކޮށްލައިފަ އެވެ.
ޝަމްނާޒު އާއި ސަނާގެ ބަންދާ މެދު ގޮތެއް ނިންމުމަށް ކްރިމިނަލް ކޯޓުގައި ބޭއްވި އަޑުއެހުން ކުރިއަށްގެން ދިޔައީ ސިއްރުކޮށްގެންނެވެ.
ހަމައެކަނި އިންޓެލިޖެންސް ރިޕޯޓެއްގެ މައްޗަށް ބިނާކޮށް، ޝަމްނާޒު އާއި އޭނާގެ ކޮއްކޮ ހައްޔަރު ކުރީ ޖޫން 23 ވަނަ ދުވަހު އެވެ. އެ ދެ މީހުންގެ ބަންދަށް ޖަހާފައިވާ ހަތް ދުވަހުގެ މުއްދަތު ހަމަވީ އިއްޔެ އަށެވެ.
މި މައްސަލައަކީ ޒާތީ މައްސަލައެއް ކަމަށް ބައެއް މީހުން ބުނަމުން ދަނިކޮށް، ރައީސް އޮފީހުގެ ތަރުޖަމާނު ހީނާ ވަލީދު އިއްޔެ ވިދާޅުވީ ޝަމްނާޒާ ދެކޮޅަށް ރައީސް މުއިއްޒު އަދި އެ މަނިކުފާނުގެ އަނބިކަނބަލުން ސާޖިދާ މުހައްމަދު ޕޮލިހަށް މައްސަލައެއް ހުށަހަޅާފައި ނުވާ ކަމަށެވެ.
މި މައްސަލައާ ގުޅޭ މައުލޫމާތު ފުލުހުން ހާމައެއް ނުކުރެއެވެ.
ޝަމްނާޒުގެ ބަންދުކުރިއިރު، ގާތުންދޭ އެއް އަހަރާއި ފަސް މަހުގެ އަންހެން ކުއްޖެއް ހުރެ އެވެ. އެ ކުއްޖާއަށް މަންމަ ގާތުން ދިނުމުގެ ހައްގުން ވަނީ މަހުރޫމުވެފަ އެވެ.
