ރިޔާދު، ސައުދީ އަރަބިއްޔާ (އޮކްޓޫބަރު 2) - ދުނިޔޭގައި އުފެދުނު އެންމެ ކާމިޔާބު އެއް ފުޓްބޯޅަ ކުޅުންތެރިޔާ، ޕޯޗުގަލްގެ ތަރި، ކްރިސްޓިއާނޯ ރޮނާލްޑޯ އަށް މިހާރު އިންޑިވިޖުއަލް ރެކޯޑްތައް މުހިންމެއް ނޫން ކަމަށް ބުނެފި އެވެ.
ރޮނާލްޑޯ، 39، މިދިޔަ އަހަރުގެ ޖެނުއަރީ މަހު މެންޗެސްޓާ ޔުނައިޓެޑް ދޫކޮށް ސައުދީ އަރަބިއްޔާގެ އަލް ނަސްރު އެފްސީ އަށް ވަނީ ބަދަލުވެފަ އެވެ.
މިދިޔަ ހޯމަ ދުވަހު، އޭއެފްސީ ޗެމްޕިއަންސް ލީގުގައި ގަތަރުގެ އަލް ރައްޔާން އަތުން އަލް ނަސްރު 2-1 އިން މޮޅުވި މެޗަށް ފަހު ރޮނާލްޑޯ ބުނީ، މިހާރު އޭނާގެ ފޯކަސް އަކީ ދަނޑުމަތީގައި ކުޅެލަން ލިބޭ ކޮންމެ މެޗެއްގައި ހިތްހަމަޖެހިލައިގެން ކުޅުން ކަަމަށެވެ.
"މިހާރު އަހަންނަށް އެހާ މުހިންމެއް ނޫން އަހަންނަކީ އެންމެ މޮޅު މީހާ އަށް ވުމުގެ މި ވާހަކަތައް ދައްކަން. އަހަރެން އެއްވެސް ވަރަކަށް ފިކުރެއް ކުރާ ކަމެއް ނޫން. ކުޅުންތެރިއަކަށް މުހިންމު ވާނެ ގޯލެއް ޖެހުން، އަހަންނަށް މިހާރު އެންމެ މުހިންމީ ޓީމު މޮޅުވުން،" ރޮނާލްޑޯ ބުންޏެވެ.
"އަހަރެން އަބަދުވެސް ވެފައި އޮންނަނީ ރެކޯޑްތަކެއް ހާސިލްކުރާ ކުޅުންތެރިއެއްގެ ގޮތުގައި، އެކަމަކު މިހާރު އަހަރެން އެ އަށް ވެސް ނުވިސްނަން،"
ޕްރޮފެޝަނަލް ކެރިއަރުގައި 904 ގޯލު ޖަހާފައިވާ ރޮނާލްޑޯ، ފަސް ފަހަރު ބެލޮންޑިއޯ އެވޯޑް ހޯދާފައިވާއިރު، މި އަހަރުގެ އެ އެވޯޑްގެ ގަދަ 30 ނޮމިނީސް ތެރޭގައި އޭނާ ނެތެވެ.
މިދިޔަ އޮގަސްޓް މަހު، ރޮނާލްޑޯ ދިން އިންޓަވިއުއެއްގައި ވަނީ އަލް ނަސްރުގައި ހުރެ އޭނާ ރިޓަޔާކުރުމުގެ ފުރުސަތު އެބައޮތް ކަމަށް ބުނެފަ އެވެ.
އަލް ނަސްރާ އެކު، ރޮނާލްޑޯ ވަނީ މިދިޔަ އަހަރު އަރަބް ކްލަބް ޗެމްޕިއަންސް ކަޕް ކާމިޔާބުކޮށްފަ އެެވެ. އެކަމަކު، މިހާތަނަށް ރޮނާލްޑޯ އަށް އަލް ނަސްރާ އެކު، ޑޮމެސްޓިކް ނޫނީ ރީޖަނަލް ލެވަލްގެ ރަސްމީ މުބާރާތެއް ކާމިޔާބު ކުރެވިފައިނުވެ އެވެ.
