ލިޒްބަން، ޕޯޗުގަލް (ނޮވެމްބަރު 13) - ފުޓްބޯޅަ ކެރިއަރުގައި 1000 ގޯލު ހަމަކުރުމަކީ ޓާގެޓެއް ކަމަށް ކުރިން ބުނި ކަމުގައި ވިޔަސް އެކަން ހާސިލްކުރެވޭހާ ހަކަތަ އޭނާގެ ހަށިގަނޑުގައި ނުހުރެދާނެ ކަމަށް ޕޯޗުގީސް ތަރި، ކްރިސްޓިއާނޯ ރޮނާލްޑޯ ބުނެފި އެވެ.
ރޮނާލްޑޯ، 39، ޕްރޮފެޝަނަލް ކެރިއަރުގައި ޖެހި ގޯލުގެ އަދަދު މި ވަގުތަށް ބަލާއިރު ވަނީ 908 އަށް އަރައިފަ އެވެ. އެންމެ ފަހުން ރޮނާލްޑޯ ކުޅުނު ސީޒަންތަކުގައި ލަނޑު ޖަހާފައިވާ ރޭޓަށް ބަލާއިރު، އަދި ތިން ވަރަކަށް ސީޒަން ކުޅެގެން ނޫނީ ރޮނާލްޑޯ އަށް 1000 ގޯލު ހަމަކުރުމަކީ ފަސޭހަކަމެއް ނޫނެވެ.
"އަހަންނަށް މި ވަގުތު ޕްރޮފެޝަނަލީ ވިސްނެން އޮތީ އެކަން އެ ހިނގާ ވަގުތަކަށް އެކަނި، ލޯންގްޓާމް ޕްލޭންތަކެއް ހަދައިގެން ކުރިއަށްދެވޭނެ ހާލަތެއް ނޫން މި އޮތީ." ދާދި ފަހުން ޕޯޗުގަލްގެ ޝަރަފްވެރި އެވޯޑް ހަފްލާއެއްގައި ވާހަކަ ދައްކަމުން ރޮނާލްޑޯ ބުންޏެވެ.
"ޕަބްލިކްގައި ވާހަކަ ދައްކަމުން އަހަރެން ބުނެފައިވާނެ 1000 ގޯލު ހަމަކުރަން ބޭނުންވާ ވާހަކަ. ބައެއް ފަހަރު ހީވޭ ފަސޭހަކަމެކޭ ވެސް، އެއީ މިދިޔަ މަހު ކަހަލަ ގޮތަކަށް އަހަރެން 900 ގޯލު ހަމަވީ، އެކަމަކު، ކުރިން ވެސް ބުނިހެން އަހަރެން މި ވިސްނަނީ މި ވަގުތަށް، ހިނގާ ބަލަމާ ކުރިއަށް އޮތް ދެތިން އަހަރު އަހަރެންގެ ފައި ހުންނާނެ ހާލަތެއް. އަހަންނަށް 1000 ގޯލު ޖެހިއްޖިއްޔާ ވަރަށް ރަނގަޅު، އެކަމަކު، އެކަން ނުވިޔަސް އަހަންނަކީ ފުޓްބޯޅަ ތާރީހުގައި އެންމެ ގިނަ ގޯލު ޖެހި ކުޅުންތެރިޔާ،"
ސައުދީ އަރަބިއްޔާގެ އަލް ނަސްރަށް ކުޅެމުން އަންނަ ރޮނާލްޑޯ ބުނީ، ފުޓްބޯޅަ ކެރިއަރު ނިންމާލާނެ ދުވަހެއް ބުނަން އޭނާ އަށް ވެސް ނޭނގޭ ކަމަށާއި އަދިވެސް ކުޅެން ބޭނުންވާ ކަމަށެވެ.
