ފްރޭންކްފާޓް (ޖުލައި 1) - ޔޫރޯ ފުޓްބޯޅަ މުބާރާތުގެ ގަދަ 16ގެ ބުރުގައި ސްލޮވީނިއާއާ ދެކޮޅަށް ޕޯޗުގަލް މިރޭ ނުކުންނައިރު، ޕޯޗުގަލް އޮތީ މުބާރާތުގެ ނޮކްއައުޓް މެޗުތަކަށް ވަރަށް ރަނގަޅަށް ތައްޔާރުވެފައި ކަމަށް އެ ޓީމުގެ ކޯޗު ރޮބާޓޯ މާޓިނޭޒް ބުނެފި އެވެ.
ގުރޫޕް ސްޓޭޖުގައި ކުޅުނު ފުރަތަމަ ދެ މެޗުން ވެސް މޮޅުވެ، ގުރޫޕްގައި ބާކީ އެއް މެޗު އޮއްވައި ޕޯޗުގަލް ވަނީ ގުރޫޕްގެ އެއް ވަނަ ޓީމުގެ ގޮތުގައި ގަދަ 16ގެ ޖާގައެއް ކަށަވަރުކޮށްފަ އެވެ.
އެކަމަކު، ގުރޫޕްގައި ކުޅުނު ފަހު މެޗުގައި ޖޯޖިއާ އަތުން ޕޯޗުގަލް ވަނީ ބަލިވެފައެވެ. އެ މެޗުގައި ޕޯޗުގަލްގެ ފުރަތަމަ 11 އަށް މާޓިނޭޒް ގިނަ ބަދަލުތަކެއް ކުރި އެވެ.
މާޓިނޭޒް ބުނީ ގުރޫޕްގެ ފަހު މެޗުން ބަލިވުމަށް ފަހު، ޕޯޗުގަލްގެ ޓީމުން ނޮކްއައުޓް ބުރަށް ތައްޔާރުވާން ގިނަ މަސައްކަތްތަކެއް ކުރި ކަމަށާއި މިހާރު އޮތީ ނޮކްއައުޓް ބުރަށް ތައްޔާރުވެފައި ކަމަށެވެ.
"އަހަރެން ބުނާނީ (ގުރޫޕް ސްޓޭޖުގެ) ތިން މެޗަށް ފަހު ޓީމު އޮތީ (ނޮކްއައުޓް) ބުރަށް ތައްޔާރުވެފައޭ. މި ހިސާބުން މި ފެށެނީ މުޅިން އާ މުބާރާތެއް. މޮޅުވުން ނޫނީ ކެޓުން އޮތީ،" މާޓިނޭޒް ބުންޏެވެ.
"ޔޫރޯގައި ކުޅުމަކީ ފަސޭހަކަމެއް ނޫން. އެކަމަކު، ޓީމެއްގެ ގޮތުގައި އަހަރަމެން މިތިބީ ނޮކްއައުޓް ބުރަށް ތައްޔާރުވެގެން."
މާޓިނޭޒް ބުނީ ސްލޮވީނިއާ އަތުން މޮޅުވެވޭނީ "ޕޯޗުގަލްގެ އެންމެ ރަނގަޅު ކުޅުން ދައްކައިގެން" ކަމަށެވެ.
"ސްލޮވީނިއާ އަކީ އަކީ ވަރަށް އޯގަނައިޒް، އަދި ވަރަށް މަސައްކަތްކުރާ ޓީމެއް. ޕޯޗުގަލް ޖެހޭނީ އެންމެ ރަނގަޅު ކުޅުން ދައްކަން،" މާޓިނޭޒް ބުންޏެވެ.
"މިއީ، ސްލޮވީނިއާގެ ފުޓްބޯޅަައިގައި ތާރީހީ މެޗެއް. އެ ޓީމުން ކުރަމުންދާ މަސައްކަތަށް ތައުރީފް ހައްގު."
ޕޯޗުގަލާއި ސްލޮވީނިއާ ބައްދަލުކުރާ މެޗު ފަށާނީ މިރޭ 12 ޖަހާއިރު އެވެ.
