އއ. ތޮއްޑޫ އަށް އުފަން އުންމީދީ ބެޑްމިންޓަން ކުޅުންތެރިޔާ، އާދަމް މަހީން މުހައްމަދު، ހަތަރު އަހަރުގެ ކޮންޓްރެކްޓެއްގައި ރިވައިވަލް ސްޕޯޓްސް ކްލަބާ ގުޅިއްޖެ އެވެ.
އެ ގޮތުން، 16 އަހަރުގެ މަހީން އަށް ރިވައިވަލް އިން ދިނީ ޑިވެލޮޕްމަންޓް ސްކޮލަޝިޕްގެ ފުރުސަތެކެވެ.
މީގެ ކުރިން ވެސް ރިވައިވަލް އިން ވަނީ ޑިވެލޮޕްމަންޓް ސްކޮލަޝިޕެއްގެ ފުރުސަތު، ވ. ކެޔޮދޫ ހައިޝަމް އިބްރާހިމް އަލީ އަށް ދީފަ އެވެ. އޭނާ ވަނީ، އެ ފުރުސަތުގައި ބޭރުން ތަމްރީން ހަދައި، މުބާރާތްތަކުގައި ވެސް ވާދަކޮށްފަ އެެވެ. އަދި 2022 ވަނަ އަހަރުގެ އަތޮޅު ލީގުގެ ޗެމްޕިއަންކަން ވެސް ހޯދި އެވެ.
މަހީން އަށް ރިވައިވަލް އިން މި ދިން ޑިވެލޮޕްމަންޓް ސްކޮލަޝިޕްގެ މުއްދަތަކީ ހަތަރު އަހަރެވެ. އޭނާ އަށް މި ފުރުސަތު ދޭން ރިވައިވަލް އިން ނިންމި އެންމެ ބޮޑު ސަބަބަކީ، ރާއްޖޭގެ ލެވަލުން އެންމެ މައްޗަށް ތަމްރީންވެ، އިންޓަނޭޝަނަލީ ވާދަކުރެވޭ ލެވަލަށް މަހީން ގައިގައި ހުނަރު ހުރުމާ އެކު އޭނާ ރަނގަޅަށް ޑިވެލޮޕް ކުރުމަށެވެ.
ރިވައިވަލް އިން ބުނީ ރާއްޖޭގެ އެކި ކަންކޮޅުތަކުން ހުނަރުވެރި ކުޅުންތެރިން ހޯދައި، ޑިވެލޮޕްކުރުމަކީ އެ ކްލަބްގެ އެއް އަމާޒު ކަމަށެވެ. ރިވައިވަލް ސްޕޯޓްސް ކްލަބުން ވަނީ ޑިވެލޮޕްމަންޓް މަސައްކަތުގެ ތެރެއިން، ބ. އަތޮޅު އޭދަފުށީގައި އެކެޑަމީއެއް ވެސް ފަށައިފަ އެވެ. އަދި ޒުވާން ކުޅުންތެރިންނަށް ފުރުސަތު އިތުރުކޮށްދިނުމުުގެ ގޮތުން، ދެ މުބާރާތް ވެސް މި އަހަރު ވަނީ ބާއްވައިފަ އެވެ.
ދާދި ފަހުން، ގައުމީ ބެޑްމިންޓަން ޓީމުގެ ނިބާލް އަހުމަދު އާއި ހަސަން ޒަޔާން ވަނީ ރިވައިވަލް ސްޕޯޓްސް ކްލަބާ ގުޅިފަ އެވެ. އަދި ރިވައިވަލް އިން ވަނީ އެ ދެ ކުޅުންތެރންނަށް މެލޭޝިއާ ޓްރެއިނިން ކޭމްޕެއް ވެސް ހަމަޖައްސައިދީފަ އެވެ.
