ސަރުކާރުގެ ފަރާތުން ފުނަދޫ ދާއިރާގެ މެންބަރު މުހައްމަދު މަމްދޫހު ހުށަހަޅުއްވާފައިވާ "ދައުލަތުގެ ދަރަންޏާ ބެހޭ ބިލާ" އި ޔޫރަޕިއަން ޔޫނިއަނާ އެކު ސަރުކާރުން ސޮއިކުރަން އުޅޭ ސަމޮއާ އެގްރިމެންޓަށް ރުހުން ދިނުމާ މެދު ގޮތެއް ނިންމުން އެޖެންޑާކޮށް، ރައްުޔިތުންގެ މަޖިލީހުން އަވަސް ޖަލްސާއެއް ބާއްވަން ނިންމައިފި އެެވެ.
މަޖިލީހުގެ ޖަލްސާތައް އާއްމުކޮށް ބާއްވަނީ ހޯމަ، އަންގާރަ އަދި ބުދައިގައި ކަަމަށް ވިޔަސް މިހަފުތާގެ ފުރަތަަމަ ޖަލްސާ އެޖެންޑާކޮށްފައި އޮތީ އާދީއްތަ އަށެވެ.
މަޖިލީހުގެ ވެބްސައިޓްގައި އާއްމުކޮށްފައިވާ އެޖެންޑާގައިވާ ގޮތުން އާދީއްތަ ދުވަހުގެ ޖަލްސާގައި އޮންނާނީ މައިގަނޑު ދެކަމެކެވެ. އެއީ ދައުލަތުގެ ދަަރަންޏާ ބެހޭ ބިލުގެ އިބްތިދާއީ ބަހުސާއި ސަމޮއާ އެގްރިމެންޓަށް ރުހުން ދިނުމުގެ މައްސަލަ، މަޖިލީހުގެ ހާރިޖީ ގުޅުންތަކުގެ ކޮމިޓީން ދިރާސާކޮށް އެކުލަވައިލި ރިޕޯޓަށް ބަހުސްކޮށް ގޮތެއް ނިންމުމެވެ.
ސަމޮއާ އެގްރިމެންޓްގައި ސޮއިކުރުމާ މެދު މަޖިލީހުން ރުހުން ދިނުމުގެ މައްސަލަ ހާރިޖީ ގުޅުންތަކުގެ ކޮމިޓީން ނިންމި ގޮތުގެ ރިޕޯޓްގައިވާ ގޮތުން އެކޮމިޓީން ނިންމީ ސަރުކާރުން ކަނޑައަޅާފައިވާ ރިޒަވޭޝަނަކާ އެކު އެ އެގްރިމެންޓްގައި ސޮއިކުރަން ރުހުންދޭން ފެންނަ ކަމަށެެވެ.
ސަމޮއާ އެގްރިމެންޓްގައި ސޮއިކުރުމާ މެދު މަޖިލީހުގެ ރުހުން ދިނުމުގެ މައްސަލަ ދިރާސާކުރަން ހާރިޖީ ގުޅުންތަކުގެ ކޮމިޓީއަށް ފޮނުވީ މިދިޔަ ބުދަދުވަހު ބޭއްވި ޖަލްސާގަ އެވެ. އެ މައްސަލަ ހަމަ އެދުވަހު ކޮމިޓީން ނިންމިކަން ކޮމިޓީގެ ރިޕޯޓުން އެނގެ އެެވެ.
