އިންޑިއާއިން ގާޒާގައި ގަތުލްއާންމު ހިންގަމުންދާ އިޒްރޭލަށް ހަތިޔާރު ފޮނުވިކަން ހާމަވެއްޖެ އެވެ.
"އަލްޖަޒީރާ" އިން ބުނީ އެ ނޫހަށް އިންޑިއާއިން އިޒްރޭލަށް ހަތިޔާރު ފޯރުކޮށްދީފައިވާ ލިޔެކިޔުންތައް ލިބިފައިވާ ކަމަށާއި އެ ލިޔުންތަކުން އެނގޭ ގޮތުގައި އެޕްރިލް 2، ގައި އިންޑިއާއިން ވަނީ ބޯޓެއްގައި ފޮނުވާފައި ކަމަށެވެ.
އެ ބޯޓު އިންޑިއާގެ ޗެންނާއިން ފުރައިގެން ދިޔައީ ރެޑްސީ މަގުން ނުދިޔުމަށް އެފްރިކާ ރޫޓުން ކަމަށް އަލްޖަޒީރާއިން ބުނެ އެވެ.
އަލްޖަޒީރާއިން ބުނީ އިންޑިއާއިން އިޒްރޭލަށް ފޯރުކޮށްދިން ހަތިޔާރުގެ ތެރޭގައި ހިމެނެނީ ގިނަ އަދަދެއްގެ ރޮކެޓުގެ އިތުރުން ގޮވާތަކެތި ކަމަށާއި އެއާއެކު ބައެއް އާލާތްތައް ވެސް ފޮނުވި ކަމަށެވެ.
އޭގެއިތުރުން މެއި 21، ގައި އިތުރު ބޯޓެއް ހަތިޔާރު ބަރުކޮށްގެން އިންޑިއާއިން ފުރި ކަމަށާއި އެ ބޯޓުން 27 ޓަނުގެ ގޮވާތަކެތި އިޒްރޭލަށް ފޯރުކޮށްދިން ކަމަށްވެ އެވެ.
އިންޑިއާއިން އިޒްރޭލަށް ހަތިޔާރު ފޯރުކޮށްދިން ކަމަށް ބާރު ދެނީ ޖޫން 6، ގައި ނުސައިރަތު ކޭމްޕަށް އިޒްރޭލުން ދިން ހަމަލާގައި ބޭނުންކޮށްފައިވާ ބައެއް ހަތިޔާރުތަކުގައި އިންޑިއާގެ އުފެއްދުންތައް ކަމަށް ޖަހާފައިވުން ކަމަށް އަލްޖަޒީރާއިން ބުނެ އެވެ.
އިންޑިއާއިން ބައެއް ހަތިޔާރުތައް އަމިއްލައަށް އުފައްދަ އެވެ. އަދި އެ ހަތިޔާރުތައް އެހެން ގައުމުތަކަށް ވެސް އެ ގައުމުން ފޯރުކޮށްދެ އެވެ.
އިންޑިއާ އާއި އިޒްރޭލާ ދެމެދު ގުޅުން ރަނގަޅުއިރު، އިންޑިއާއިން އަންނަނީ އިޒްރޭލަށް އެކި ގޮތްގޮތުން އެހީތެރިވަމުންނެވެ. އަދި ގާޒާއަށް އިޒްރޭލުން ދޭ ހަމަލާތަކާ ގުޅިގެން ވެސް އިންޑިއާއިން އެކަމާ ދެކޮޅަށް އެއްޗެއް ނުބުނެ އެވެ.
