ލ. ގަމުގައި ހުންނަ ގަމު ރީޖަނަލް ހޮސްޕިޓަލުގައި އެޑްމިޓްކުރި ބަންގްލަދޭޝް މީހަކު ނިޔާވީ އޭނާއާ ހަވާލުވާނެ މީހެއް އަދި ކާންދޭނެ މީހަކު ވެސް ނެތި ކަމަށާއި އޭނާ ނިޔާވުމުން ވަޅުލަން ހަވާލުވާނެ މީހަކު ވެސް ނުވި ކަަމަށް ރައްޔިތުންގެ މަޖިލީހުގެ ގަމު ދާއިރާގެ ޕީއެންސީ މެންބަރު ޔޫސުފު ނަޝީދު މިއަދު ވިދާޅުވެއްޖެ އެެވެ.
ސިއްހީ ހިދުމަތް ދިނުމުގެ ގާނޫނަށް ބަދަލުތަކެއް ގެންނަން ސަރުކާރުގެ ފަރާތުން ހެންވޭރު ދެކުނު ދާއިރާގެ ޕީއެންސީ މެންބަރު ހުސައިން އިމްރާން ލަތީފު ހުށަހެޅުއްވި ބިލަށް މަޖިލީހުގެ މިއަދުގެ ޖަލްސާގައި ކުރި ބަހުސްގައި މެންބަރު ނަޝީދު ވިދާޅުވީ ބެލެނިވެރިއަކު ނެތި ހޮސްޕިޓަލްތަކަށް ދާ މީހުންނާ ހަވާލުވާނެ ފަރާތެއް ގާނޫނުގައި ކަނޑައަަޅަން ޖެހޭ ކަަމަށެެވެ. ގަމު ރީޖަނަލް ހޮސްޕިޓަލްގައި މަރުވި މީހާގެ ވާހަކަ އޭނާ ގެންނެވީ ގާނޫނުގައި އެކަން ކަނޑައަޅާފައި ނެތުމުން ކުރިމަތިވާ ހާލަތްތަކުގެ މިސާލެއްގެ ގޮތުގަ އެވެ.
"އިއްޒަތްތެރި ރައީސް، މި ފަހުން ވެސް ގަމު ރީޖަނަލް ހޮސްޕިޓަލުގައި ބަންގްލަދޭޝް މީހަކު އޮވެ، ކާންދޭނެ މީހަކު ނެތި، ކައުންސިލުން ހަވާލުނުވެ، ޕޮލިހުން ހަވާލުނުވެ، ހަވާލުވާނެ ފަރާތެއް ނެތި އެންމެ ފަހުން ނިޔާވެގެން، ގެންގޮަސް ވަޅުލާނެ ފަރާތެއް ވެސް ނެތި ދިޔައީ،" މެންބަރު ވިދާޅުވި އެވެ.
އޭނާ ވިދާޅުވީ ގާނޫނީ ގޮތުން އެފަދަ މީހުންނާ ކޮންމެވެސް ބަޔަކު ހަވާލުވާނެ އުސޫލެއް އޮންނަން ޖެހޭ ކަމަށެވެ.
ގަމު ހޮސްޕިޓަލުގައި ނިޔާވި އެމީހާއަކީ ގަމުގައި ދިރިއުޅުނު މީހެއް ކަން ނުވަތަ އެހެން ރަށަކުން ގެނައި މީހެއްކަން އޭނާ ވިދާޅެއް ނުވެ އެވެ.
މީހުން ދިރިނޫޅޭ ބޮޑު ސަރަހައްދެއް އޮންނަ ލ. ގަމަކީ ގިނަ އަދަދެއްގެ ބިދޭސީން ދިރިއުޅޭ ރަށެކެވެ. އެރަށުގައި ދަނޑުވެރިކަމުގެ މަސައްކަތުގައި އުޅޭ ގިނަ އަދަދެއްގެ ބިދޭސީންގެ ތެރޭގައި، އެނގިފައިވާ ގޮތުގައި ސައްހަ ލިޔެކިއުން ނެތި އުޅޭ މީހުން ވެސް ގިނަ އެވެ.
