ޔޫރަޕްގެ ސަރަހައްދީ ފުޓްބޯޅަ މުބާރާތް ކަމަށްވާ ޔޫރޯ އަކީ ފްރާންސްގެ ފުޓްބޯލް ފެޑަރޭޝަންގެ ކުރީގެ ސެކްރެޓަރީ އޮންރީ ޑެލައުނޭގެ ހިޔާލަކަށް އުފެދުނު މުބާރާތެވެ. ޔޫރަޕްގެ ގައުމުތަކުގެ މެދުގައި ސަރަހައްދީ މުބާރާތެއް ބޭއްވުމުގެ ހިޔާލު އޭނާ އެންމެ ފުރަތަމަ ހުށަހެޅީ 1927 ވަނަ އަހަރެވެ. އެކަމަކު، އޭރު އެ ހިޔާލަށް ލިބުނީ ފިނި ތަރުހީބެކެވެ.
ޑެލައުނޭގެ ހިޔާލާ އެއްގޮތަށް ޔޫރަޕްގެ ސަރަހައްދީ މުބާރާތެއް ފެށުނީ 1960 ވަނަ އަހަރެވެ. އެކަމަކު، އޭގެ ތިން އަހަރު ކުރިން ޑެލައުނޭ ވަނީ މަރުވެފަ އެވެ.
ފުޓްބޯޅަ ކުޅުމުގެ އިތުރުން ރެފްރީކަން ވެސް ކުރި ޑެލައުނޭ، ރެފްރީކަމުގެ ކެރިއަރު ހުއްޓުމަކަށް އައި ދަނޑުމަތީގައި ހިނގި ހާދިސާ އަކަށް ފަހު އެވެ. އެއީ މޫނުގައި ބޯޅަ ޖެހިގެން ލިބުނު އަނިޔާއަކާ ހެދި އެވެ. އެ ފަހުން، ފުޓްބޯޅައިގެ އެޑްމިނިސްޓްރޭޓަރެއްގެ ގޮތުގައި މަސައްކަތްކުރަން ފަށައި، ފްރާންސްގެ ފުޓްބޯޅަ ފެޑެރޭޝަނެއް ގެންނަން، އިސް މަސައްކަތްތަކެއް ކުރެއްވި އެއް ފަރާތަކީ، ޑެލައުނޭ އެވެ.
ޑެލައުނޭގެ މުއްސަނދި ހިޔާލާއި ޔޫރޯގެ އުފެއްދުމަށް ކުރި މަސައްކަތުގެ ހަނދާނުގައި ޔޫރޯގެ ޗެމްޕިއަނުންނަށް ދޭ ޓްރޮފީއަށް ދީފައިވަނީ އޭނާގެ ނަމެވެ.
ޔޫރޯ އެންމެ ފުރަތަމަ ބޭއްވީ ޔޫރަޕިއަން ނޭޝަންސް ކަޕްގެ ނަމުގަ އެވެ. އެ ނަން ބަދަލުކޮށް މިހާރު ބޭނުން ކުރަމުންދާ ޔޫރަޕިއަން ޗެމްޕިއަންޝިޕް (ނުރަސްމީކޮށް، ޔޫރޯ) އަށް ނަން ބަދަލުކުރީ 1968 ވަނަ އަހަރުގަ އެވެ.
ޔޫރޯގެ ފުރަތަމަ މުބާރާތް 1960 ވަނަ އަހަރު ބޭއްވީ ފްރާންްސްގަ އެވެ. އެ އަހަރުގެ މުބާރާތުގައި ހަތަރު ޓީމު ބައިވެރިވިއިރު، މުބާރާތް ކާމިޔާބުކުރީ ސޯވިއެޓް ޔޫނިއަން އިންނެވެ.
ޔޫރޯގެ މުބާރާޓް 1980 ވަނަ އަހަރާ ހަމައަށް ކުރިއަށް ގެންދިޔައީ ހަތަރު ޓީމާއެކު އެވެ. ފްރާންސްގައި 1984 ވަނަ އަހަރުގައި އޮތް މުބާރާތުގައި ޓީމުގެ އަދަދު 8 އަށް އިތުރުކުރި އެވެ. އަދި އެ ފޯމެޓްގައި 1992 ވަނަ އަހަރާ ހަމައަށް ޔޫރޯ ކުރިއަށް ގެންދިޔައެވެ.
ޔޫރަޕްގެ އިތުރު ގައުމުތަކަށް ޔޫރޯ އިން ފުރުސަތު ދިނުމުގެ ގޮތުން، 1996 ވަނަ އަހަރު އިންގްލެންޑްގައި އޮތް މުބާރާތުން ފެށިގެން މުބާރާތުގައި ބައިވެރިވާ ޓީމުތަކުގެ އަދަދު 16 އަށް އިތުރުކުރި އެވެ. އަދި 2016 ވަނަ އަހަރު ފްރާންސްގައި އޮތް މުބާރާތުން ފެށިގެން ޓީމުގެ އަދަދު 24އަށް ބަދަލުކުރި އެވެ.
ކޮންމެ ހަތަރު އަހަރުން އެއް އަހަރު ބާއްވާ ޔޫރޯ އެއް މުއްދަތުގެ ތެރޭގައި ނުބޭއްވުނީ އެންމެ ފަހަރެވެ. އެއީ ކޮވިޑް-19އާ ގުޅިގެން ފަސްކުރަންޖެހުނު 2020 ވަނަ އަަހަރުގެ ޔޫރޯއެވެ. އެ މުބަރާތް ބޭއްވީ 2021 ވަނަ އަހަރެެވެ.
މި އަަހަރު ޖަރުމަންގައި މި ކުރިއަށްދަނީ ޔޫރޯގެ 17 ވަނަ މުބާރާތެވެ. ޖަރުމަނަކީ ޔޫރޯގެ އެންމެ ކާމިޔާބު އެއް ގައުމެވެ. ޖަރުމަނުން ވަނީ ޖުމްލަ ތިން ފަހަރު ޔޫރޯ ކާމިޔާބުކޮށްފަ އެވެ. އެއީ 1972، 1980 އަދި 1996 ވަނަ އަހަރެވެ.
ޖަރުމަނާ އެއްވަރަށް ސްޕެއިން ވެސް ވަނީ ޔޫރޯގެ ތިން ތަށި ހޯދައިފަ އެވެ. އެއީ 1964، 2008 އަދި 2012 ގަ އެވެ. ސްޕެއިން އަކީ މުބާރާތުގެ ތާރީހުގައި ޖެހިޖެހިގެން ދެ ފަހަރު ޔޫރޯ ކާމިޔާބުކުރި ހަމައެކަނި ގައުމެވެ.
މި ދެ ޓީމުގެ ފަހަތުން، ދެ ތަށި ހޯދާފައިވަނީ އިޓަލީ އާއި ފްރާންސް އެވެ. ޔޫރޯގެ ތަށި އެއް ފަހަރު ކާމިޔާބުކޮށްފައިވާ ޤައުމުތަކުގެ ތެރޭގައި ހިމެނެނީ ރަޝިއާ، ޗެކް ރިޕަބްލިކް، ޕޯޗުގަލް، ސްލޮވާކިއާ، ނެދަލޭންޑްސް، ޑެންމާކް، އަދި ގްރީސް އެވެ.
