އިޒްރޭލުން ގާޒާގައި ކުރަމުންދާ ހަނގުރާމަ އެއްކޮށް ހުއްޓާލެވޭ އެއްބަސްވުމަކަށް ނުދެވޭނެ ކަމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ބުނެފި އެވެ.
ނަތަންޔާހޫ ބުނީ ގާޒާގައި ރަހީނުކޮށްފައި ތިބި އިޒްރޭލު މީހުން އަނބުރާ ގެނެވޭނެ އެއްބަސްވުމެއް ހެދުމަށް ތައްޔާރު ކަމަށާއި ނަމަވެސް ހަނގުރާމަ އެއްކޮށް ހުއްޓާލެވޭ އެއްބަސްވުމަކަށް ނުދެވޭނެ ކަމަށެވެ.
މިދިޔަ އަހަރުގެ އޮކްޓޯބަރު 7، އިން ފެށިގެން ގާޒާގައި އިޒްރޭލުން ހިންގަމުން އަންނަ ގަތުލްއާންމު ހުއްޓާލަން ގިނަ އެއްބަސްވުންތައް އިޒްރޭލަށް ހުށަހަޅާފައިވާއިރު، މިހާތަނަށް ހަނގުރާމަ ހުއްޓާލެވޭ އެއްބަސްވުމަކަށް ނުދެވެ އެވެ.
"އަމާޒަކީ ގާޒާގައި ރަހީނުކޮށްފައިވާ އިޒްރޭލު މީހުން ސަލާމަތްކޮށް، ހަމާސް އެއްކޮށް ނައްތާލުން،" އިޒްރޭލުގެ ޗެނަލް 14 އަށް ދިން އިންޓަވިއުއެއްގައި ނަތަންޔާހޫ ބުންޏެވެ.
ނަތަންޔާހޫގެ ސަރުކާރާ ދެކޮޅަށް އިޒްރޭލުގައި އެތައް ހާސް ބަޔަކު އިހުތިޖާޖު ކުރަމުން އަންނައިރު، އިހުތިޖާޖުގެ ބައިވެރިން ގޮވާލަމުން އަންނަނީ ގާޒާގައި ތިބި އިޒްރޭލު މީހުން އަނބުރާ ގައުމަށް ގެނެވޭނެ އެއްބަސްވުމެއް ހެދުމަށެވެ.
އެމެރިކާއިން ވަނީ ހަމާސް އަދި އިޒްރޭލަށް ހަނގުރާމަ އެއްކޮށް ހުއްޓާލައި، ގާޒާ އާއި އިޒްރޭލުގައި ރަހީނުކޮށްފައި ތިބި މީހުންނަށް އަނބުރާ ގައުމަށް ދެވޭނެ އެއްބަސްވުމެއް ހުށަހަޅާފަ އެވެ.
އެ އެއްބަސްވުން ހަމާސްއިން ބަލައިގަތް ނަމަވެސް، އިޒްރޭލުން ވަނީ އެ އެއްބަސްވުން ބަލައިގަންނަން ދެކޮޅު ހަދާފަ އެވެ.
އިޒްރޭލުން ގާޒާގައި ހިންގަމުންދާ ގަތުލްއާންމުގައި މިހާތަނަށް 37,000 އަށްވުރެ ގިނަ މީހުން ވަނީ މަރުވެފަ އެވެ. އޭގެ ތެރޭގައި ގިނައީ ކަމާ ނުބެހޭ މައުސޫމް ކުޑަކުދިންނާއި އަންހެނުންނެވެ.
