މިއުނިކް (ޖޫން 17) - ދާދި ފަހުން ރެއާލް މެޑްރިޑަށް ބަދަލުވި ފްރާންސްގެ ތަރި ކީލިއަން އެމްބާޕޭ, އަންނަ މަހު ފްރާންސްގައި ފަށާ އޮލިމްޕިކްސްގައި ކުޅުމަށް އޭނާގެ ކުލަބުން ފުރުސަތު ނުދޭނެކަން އެނގޭ ކަމަށް ބުނެފި އެވެ.
އެމްބާޕޭ ވަނީ މީގެ ކުރިން އޮލިމްޕިކްސްގައި ކުޅެން ބޭނުންވާ ކަމަށް ބުނެފަ އެވެ. އެކަމަކު ރެއާލުން ވަނީ އެ ޓީމުގެ ކުޅުންތެރިންނަށް އޮލިމްޕިކްސްގައި ނުކުޅެވޭނެ ކަމަށް ބުނެފަ އެވެ. އަދި މި ގޮތައް ރެއާލުން ނިންމީ ޔޫރޯ ފުޓުބޯޅަ މުބާރާތާއި ކޮޕަ އެމެރިކާ މުބާރާތައް ފަހު އަންނަ ސީޒަން ފެށުމާއި ހަމައަށް ކުޅުންތެރިންނަށް އަރާމު ކުރުމަށް އެކަށޭނެ ވަގުތު ނުލިބޭނެ ކަމަށް ބުނެ އެވެ.
"އަހަރެންގެ ކުލަބްގެ ސްޓޭންޑް ވަރަށް ސާފު. އަހަރެން އެ އަށް އަމަލު ކުރަން ޖެހޭނެ. އެހެންވެ, އަހަރެންއަށް ހިޔެއް ނުވޭ އަހަރެން މި ފަހަރުގެ އޮލިމްޕިކްސް މުބާރާތުގައި ކުޅެވޭނެ ހެން." އެމްބާޕޭ ބުންޏެވެ.
އެމްބާޕޭ ބުނީ ކުލަބުގެ ބަސް އަހަން ޖެހޭނެ ކަމަށާއި, އެހެންވެ، މި ފަހަރުގެ އޮލިމްޕިކްސްގައި އޭނާ ސަޕޯޓަރެއްގެ ގޮތުގައި ޒުވާން ޓީމަށް ސަޕޯޓުކުރާނެ ކަމަށެވެ. އަދި އެ ޓީމަށް ކާމިޔާބީ އަށް އެދޭ ކަމަށްވެސް އެމްބާޕޭ ބުންޏެވެ.
ޔޫރޯ ފުޓްބޯޅަ މުބާރާތް އޮތީ މި މަހު 14 އިން އަންނަ މަހުގެ 14 އަށެވެ.
ފްރާންސްގައި ކުރިއަށްދާ އޮލިމްޕިކްސް މުބާރާތް ފެށޭނީ އަންނަ ޖުލައި މަހުގެ 24 ވަނަ ދުވަހު އެވެ. އަދި މުބާރާތް ނިމޭނީ 9 އޮގަސްޓްގަ އެވެ. އަދި އޭގެ ހަފުތާ އެއް ފަހުން ސްޕެނިޝް ލީގު ފަށާނެ އެވެ.
އެމްބާޕޭގެ ކެޕްޓަންކަމުގައި ފްރާންސުން މި ފަހަރުގެ ޔޫރޯ އަށް ނުކުންނައިރު، އެ ޓީމު ކުޅޭ ފުރަތަމަ މެޗުގައި މިރޭ އޮސްޓްރިއާއާ ބައްދަލުކުރާނެ އެވެ. އެމްބާޕޭ ބުނީ، ކެޕްޓަނެއްގެ ގޮތުގައި ޔޫރޯ އަށް ނުކުންނައިރު، ކުރެވެނީ ތަފާތު އިހުސާސެއް ކަމަށާއި މި މުބާރާތް ކާމިޔާބު ކުރަން ބޭނުންވާ ކަމަށެވެ.
