ގާޒާގެ ރަފަހުގައި އިޒްރޭލުގެ އެއްގަމު ވެހިކަލެއް ގޮއްވާލައި އިޒްރޭލުގެ އަށް ސިފައިން މަރާލައިފި އެވެ.
އިޒްރޭލުގެ އަސްކަރިއްޔާއިން އެ ގައުމުގެ އަށް ސިފައިން ހަމަލާގައި މަރުވިކަން ކަށަވަރުކޮށްދީ ބުނެފައި ވަނީ އެ ސިފައިންގެ މީހުންގެ އާއިލާތަކަށް އެކަން އަންގާފައިވާ ކަމަށެވެ.
މިއީ ގާޒާގައި އޮކްޓޯބަރު 7، އިން ފެށިގެން އިޒްރޭލުން ހިންގަމުންދާ ހަމަލާގައި އިޒްރޭލުގެ ސިފައިންނަށް އަމާޒުކޮށް ޖެނުއަރީގެ ފަހުން ދިން އެންމެ ވަރުގަދަ ހަމަލާ އެވެ.
ރިޕޯޓްތައް ބުނާގޮތުން އިޒްރޭލުގެ ވެހިކަލް ގޮއްވާލާފައި ވަނީ ހަމަލާތައް ބަދަލު ކުރުމުގެ ތެރޭގަ އެވެ. އަދި ގޮއްވާލާފައި ވަނީ ކޮމްބެޓް އިންޖިނިއަރިން ވެހިކަލް (ސީއީވީ) އެއް ކަމަށް ވެސް ރިޕޯޓްތައް ބުނެ އެވެ.
ގަތުލްއާންމު ފެށުނު ފަހުން އިޒްރޭލުގެ އަސްކަރިއްޔާއަށް އަމާޒުކޮށް އެންމެ ވަރުގަދަ ހަމަލާއެއް ދީފައި ވަނީ ޖެނުއަރީގަ އެވެ. އެ ހަމަލާގައި އިޒްރޭލުގެ 21 ސިފައިން ވަނީ މަރުވެފަ އެވެ.
އިޒްރޭލުން ގާޒާގައި ހިންގަމުންދާ ގަތުލްއާންމުގައި މިހާތަނަށް 37,000 އަށްވުރެ ގިނަ މީހުން ވަނީ މަރުވެފަ އެވެ. އަދި މަރުވި މީހުންގެ ތެރޭގައި ގިނައީ ކަމާ ނުބެހޭ ކުޑަކުދިންނާއި އަންހެނުންނެވެ.
