މިއަހަރުގެ ބޮޑު އީދު ކުލަ ގަދަކޮށް ފާހަގަކުރުމުގެ ގޮތުން މާލެ ސިޓީގެ ތިން މައި ސަރަހައްދުގައި ވެސް ގިނަ ހަރަކާތްތަކެއް ކުރިއަށް ގެންދިއުމަށް މާލެ ސިޓީ ކައުންސިލުން ނިންމައިފި އެވެ.
މާލެ ސިޓީ ކައުންސިލުން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މާލެ ސިޓީގެ މޭޔަރު އާދަމް އާޒިމް ވިދާޅުވީ މާލެ ސަރަހައްދުގައި މިއަންނަ އީދު ފާހަގަކުރާނީ އެ ކައުންސިލާއި ގިނަ އިދާރާތަކެއް ގުޅިގެން ކަމަށެވެ.
އެގޮތުން, އީދުގެ ހަރަކާތްތައް ކުރިއަށްގެންދާނީ ސިޓީ ކައުންސިލު އަދި ޑަބްލިއުޑީސީގެ އިތުރުން ދިރާގު، އެންސީއޭ، އެޗްޑީސީ އަދި ވިލިމާލޭގެ ރައްޔިތުން ގުޅިގެން ކަމަށް މޭޔަރު ވިދާޅުވި އެވެ. އަދި މިރެއިން ފެށިގެން އީދުގެ ހަރަކާތްތަށް ކުރިއަށްދާނެ ކަން ފާހަގަކުރެއްވި އެވެ.
އީދުގެ ފުރަތަމަ ހަރަކާތުގެ ގޮތުގައި މިރޭ 8:30 ގައި ވިލިމާލެ އަޑިފަސްގަނޑުގައި އީދު މަޅި ރޯކުރުމާއި ބޮޑުބެރު ޝޯއެއް އޮންނާނެ އެވެ. އަދި ހުޅުމާލޭގައި މިރޭ ވެދުމާދިއުމުގެ ހަރަކާތެއް ކުރިއަށްދާނެ އެވެ.
އީދު ނަމާދަށް ފަހު ހުރިހާ އަވަށެއްގައި ވެސް އީދު ސައި އަދި ހަރަކާތްތައް ކުރިއަށްދާނެ އެވެ. އޭގެ ތެރޭގައި ސަގާފީ ކުޅިވަރާއި ކުޑަކުދިންގެ ހަވީރު، މާލި ޕެރޭޑް، ބޮޑުމަސް އަދި އީދު ޝޯގެ އިތުރުން ހަވާއެރުވުން ހިމެނެ އެވެ.
