އެފްއޭއެމް 19 އަހަރުން ދަށުގެ ޔޫތު ޗެމްޕިއަންޝިޕުން ފެނިގެންދިޔައީ އަތޮޅު ތެރޭ ފުޓުބޯޅަ ޓީމުތަކުގެ ކުޅުންތެރިންގެ ހުނަރާ ފެންވަރު ހުރިކަން ކަމަށް، މުބާރާތުގެ އެންމެ މޮޅު ކޯޗު އަހުމަދު ނިމާދު (ނިމާ) ބުނެފި އެވެ.
މީގެ ކުރިން މެޗަކުން ބަލިނުވެ ކުލަބް އީގަލްސްއާ އެކު ވެސް ނިމާ ވަނީ ޔޫތު ޗެމްޕިއަންޝިޕް ކާމިޔާބު ކޮށްފަ އެވެ. އެ ކާމިޔާބީ މި ފަހަރު ޓީސީ ސްޕޯޓްސް ކުލަބާ އެކު ނިމާ ވަނީ ތަކުރާރުކޮށްފަ އެވެ.
މުބާރާތް ކާމިޔާބު ކުރުމަށްފަހު "އަދަދު" އާ ވާހަކަ ދައްކަމުން ނިމާ ބުނީ، މި ފަހަރުގެ މުބާރާތުން ފެނިގެންދިޔައީ އަތޮޅު ތެރޭން މުބާރާތް ކުޅެން އައި ކުޅުންތެރިންގެ ފެންވަރު ކަމަށެވެ.
"މިކަން ޑިވޮލޮޕްކުރަން ޔަންގް ބެޗުގެ ޓީމުތައް ހަދާ މިކޮޅަށް ގެނެސް މިކަން ކުރަން ބަޔަކު ތިބިއްޔާ މި ރާއްޖޭގައި މި އަށް ވުރެ ބޮޑަށް މި އަށް ވުރެ ރަނގަޅު ޓީމުތައް ފެނިގެންދާނެ." ނިމާ ބުންޏެވެ.
އިންޓަނޭޝަނަލް ލެވަލްގައި ރާއްޖޭގެ އުމުރުފުރާ ގްރޫޕްތަކުގެ ޓީމުތައް ކާމިޔާބު ހޯދަން ބޭނުންވަނީނަމަ އެ ކުޅުންތެރިންނަށް ޑިވެލޮޕްމަންޓް ޕްރޮގްރާމްތައް ހިންގައި ޓްރެއިންކޮށްފި ނަމަ ކާމިޔާބު ހޯދުން އެއީ ދުރުގައިވާ ކަމެއް ނޫން ކަމަށް ނިމާ ދެކެ އެވެ.
ނިމާ ބުނީ ރާއްޖޭގެ ކަންކޮޅުތަކުގައި ފެންވަރު ރަނގަޅު ތަފާތު ކުޅުންތެރިން އެބަތިބި ކަމަށެވެ. އަދި މިހާރު ކުރިއަރަމުން އަންނަ، ފުޓްސަލް އެކޭ އެއްގޮތަށް ފުޓުބޯޅަ ވެސް ރާއްޖޭގައި ކުރިއަރާނެ ކަމަށް ނިމާ ގަބޫލުކުރެ އެވެ.
"ރާއްޖޭގައި ކުޅޭ ޔޫތު ބެޗު ވަރަށް ބައިވަރު ކުޅުންތެރިން އެބަތިބި. އަދި ފުޓްސަލް އެކަންޏެއް ނޫން. ބޮޑު ފުޓުބޯޅަ ކުޅޭނެ ބައިވަރު ކުޅުންތެރިން ވެސް އެބަތިބި ރާއްޖޭގައި. އެ ކުޅުންތެރިންނަށް ފުރުސަތު ހޯދައިދެވެން އެބަޖެހޭ" ނިމާ ފާހަގަކުރި އެވެ.
ޔޫތު ޗެމްޕިއަންޝިޕްގެ 19 އަހަރުން ދަށުގެ މުބާރާތުގެ ތަށި ހޯދި ޓީސީ ޓީމަކީ، މޯލްޑިވްސް ސޮކަ މޭޓްސްއާ ގުޅިގެން ހިންގާ ޓީމެކެވެ. ޓީސީގެ އެކެޑަމީގެ ކަންކަން ކުރަނީ ސޮކަ މޭޓްސްއާ ގުޅިގެންނެވެ.
