މި ވަގުތު ދެ ވަނަ ޑިިވިޝަނުގައި އޮތް ރާއްޖޭގެ ނަން މަޝްހޫރު ކްލަބް، ނިއު ރޭޑިއަންޓް ސްޕޯޓްސް ކްލަބްގެ ކޯޗަަކަށް ތަޖުރިބާކާރު ކޯޗު އަހުމަދު ނިމާދު (ނިމާ) ހަަމަޖައްސައިފި އެވެ.
ނިމާގެ އެސިސްޓަންޓަކަށް މަސައްކަތް ކުރާނީ ކުރިން ނިއު އަށް ކުޅެ އެ ޓީމުގެ ކެޕްޓަންކަން ކުރުމުގެ އިތުރުން މިހާތަނަށް ކޯޗިންގައި ރަނގަޅު މަސައްކަތްތަކެއް ކޮށްފައިވާ ފަރުހާދު އިސްމާއިލް (ފަރޭ) އެވެ.
ކުރިން އީގަލްސްގެ އެސިސްޓަންޓް ކޯޗަކަށް ހުރި ނިމާ ވަނީ ގިނަ ފަހަރުތަކެއްގެ މަތިން އެ ޓީމުގެ ހެޑް ކޯޗެއްގެ ޒިންމާ ވެސް އުފުލައިފަ އެވެ. އީގަލްސްގެ އެސިސްޓަންޓް ކޯޗަކަށް ހުރެ އެކި ފަހަރު މަތިން ނިމާ ވަނީ ދެ ވަަނަ އާއި ތިން ވަނަ ޑިވިޝަން ޓީމުތަކަށް ކޯޗުކޮށްދީފަ އެވެ.
އެ ގޮތުން، މިދިޔަ ސީޒަނުގައި ނިމާ ހުރީ ދެ ވަނަ ޑިވިޝަނުގައި ޖޭޖޭ ސްޕޯޓްސް ކްލަބްގެ ކޯޗަކަށެވެ. އޭގެ ކުރިން އޭނާ ވަނީ ބުރު ސްޕޯޓްސް ކްލަބްގައި ވެސް ރަނގަޅު މަސައްކަތްތަކެއް ކޮށްފަ އެވެ. ބުރުން ތިން ވަނަ ޑިވިޝަން ޗެމްޕިއަންކަން ހޯދީ ނިމާގެ ކޯޗުކަމުގަ އެވެ.
މި ސީޒަނުގައި ނިއު އަށް ކޯޗުކޮށްދޭނީ ނިމާ (ކ) އާއި ފަރޭ:
ކުޅުމުގެ ކެރިއަރު ކުރިއަށް ގެންދަމުން ވެސް ފަރޭ ވަނީ ކޯޗިންގައި ފާހަގަކޮށްލެވޭ މަސައްކަތްތަކެއް ކޮށްފަ އެވެ.
އެ ގޮތުން، ގްރީން ސްޓްރީޓްސް އާއި ރޮކް ސްޓްރީޓްސް އަށް ތިން ވަނަ ޑިވިޝަންގެ ޗެމްޕިއަންކަން ހޯދައިދީ އެ ދެ ޓީމު ވެސް ދެ ވަނަ ޑިވިޝަނަށް ޕްރޮމޯޓް ކޮށްދިނީ ފަރޭގެ އިރުޝާދުގެ ދަށުންނެވެ. އޭގެ އިތުރުން، ޖޫނިއާ މުބާރާތްތަކުގައި ވެސް ފަރޭ އަންނަނީ ކޯޗިންގައި މުހިންމު ތަޖުރިބާތަކެއް ހާސިލްކުރަމުންނެވެ. ނިއުއާ އެކު ފަރޭ އަށް މިއީ ކޯޗިންގައި ރަނގަޅު ފުރުސަތެކެވެ.
ސަސްޕެންޝަނުން ސަލާމަތްވެ، ނިއު އިން މިދިޔަ ސީޒަނުގެ ދެ ވަނަ ޑިިވިޝަނުގައި ވާދަކުރިއިރު، ޓީމުގެ ކޯޗަކަށް ހުރީ ސޮބާހު މުހައްމަދު (ސޮބާ) އެވެ. ސޮބާ ވަނީ ކުރިއަށް އޮތް ސީޒަނަށް ވިކްޓަރީ ސްޕޯޓްސް ކްލަބްގެ ކޯޗުކަމާ ހަވާލުވެފަ އެވެ. ވިކްޓަރީ ވެސް އަންނަނީ މި އަހަރު ދެ ވަނަ ޑިވިޝަނަށް ވަރުގަދަ ޓީމެއް އެކުލަވާލަމުންނެވެ.
