ފްލޮރިޑާ، ޔުނައިޓެޑް ސްޓޭޓްސް (ޖޫން 13) - ކޮޕަ އެމެރިކާ އަށް ތައްޔާރުވުމުގެ ގޮތުން ކުޅުނު އެކުވެރިކަމުގެ މެޗެއްގައި ބްރެޒިލާއި އެމެރިކާ 1-1 އިން އެއްވަރުވެއްޖެ އެވެ.
މީގެ ދެތިން ދުވަސް ކުރިން އެމެރިކާ ވަނީ އެކުވެރިކަމުގެ މެޗެއްގައި، 5-1 އިން ކޮލަމްބިއާ އަތުން ބަލިވެފަ އެެވެ. އެހެންވެ، އެ ނަތީޖާގެ ސަބަބުން މި މެޗަށް އެމެރިކާ އިން ނުކުތްއިރު، އަމިއްލަ ގައުމުގައި، މި މަހު 20 ގައި ފަށާ ކޮޕަ އެމެރިކާގެ ކުރިން އެމެރިކާ އަށް އޮތީ ނަތީޖާގެ ޕްރެޝަރު ބޮޑުވެފަ އެވެ.
ކޭމްޕިން ވޯލްޑް ސްޓޭޑިއަމްގައި ރޭ ކުޅުނު މެޗުގައި އެމެރިކާ އިން ވަނީ ފުރަތަމަ ނުރައްކާތެރި ހަމަލާ ފޮނުވާލައިފަ އެެވެ. އެ ގޮތުން، މެޗުގެ ފަސް ވަނަ މިނިޓްގައި އެމެރިކާގެ މިޑްފީލްޑަރު ޔޫނުސް މޫސާ ޖެހި ބޯޅަ އަމާޒުވީ ގޯލުގެ ހުރަސްދަނޑިއަށެވެ.
އޭގެ އިރުކޮޅެއް ފަހުން، އެމެރިކާގެ ކެޕްޓަން ކްރިސްޓިއަން ޕުލިސިޗް ޖެހި ޝޮޓް ބްރެޒިލްގެ ކީޕަރު އެލިސަން ބެކާ ވަނީ މަތަކޮށްފަ އެވެ.
ބްރެޒިލުން ލީޑުނެގީ މެޗުގެ 18 ވަނަ މިނިޓްގައި ރޮޑްރީގޯ ޖެހި ގޯލުންނެވެ. ބްރެޒިލްގެ 10 ނަމްބަރު ޖޯޒީގައި ކުޅެން ފުރުސަތު ލިބުނު ރޮޑްރީގޯ މި ލަނޑު ޖެހީ ރަފީނިއާ ދިން ބޯޅައަކުންނެވެ. ރޮޑްރީގޯ ވަނީ ބޯޅަ ކޮންޓްރޯލް ކޮށްލުމަށް ފަހު ދުރު ކަނަށް ފޮނުވާލައިފަ އެވެ.
ލީޑުގައި ބްރެޒިލަށް އޮވެވުނީ އަށް މިނިޓެވެ. މެޗުގެ 26 ވަނަ މިނިޓްގައި އެމެރިކާ އިން ވަނީ އެއްވަރުކޮށްފަ އެވެ. އެ ޓީމަށް ލަނޑު ޖަހައިދިނީ ހިލޭ ޖެހުމަކުން ޕުލިސިޗް އެެވެ. ޕުލިސިޗް ޖެހި ބޯޅަ ތިރިތިރިން ގޮސް އަމާޒުވީ ގޯލުގެ ކަނަށެވެ.
މެޗުގެ ދެ ވަނަ ހާފުގައި ބްރެޒިލްގެ ގިނަ އެޓޭކްތަކެއް ފެނިގެންދިޔަ އެވެ. އެކަމަކު، އެމެރިކާ ބަލިވިޔަނުދިނުމުގައި އެ ޓީމުގެ ކީޕަރު މެޓް ޓާނާ ވަނީ މޮޅު ކުޅުމެއް ދައްކައިފަ އެވެ. އެ ގޮތުން، ރޮޑްރީގޯ ޖެހި ދެ ބޯޅައެއް ކީޕަރު ޓާނާ ވަނީ ހުއްޓުވައިފަ އެވެ.
އެެމެރިކާ އަށް މެޗުން މޮޅުވާން ލިބުނު ފުރުސަތެއްގައި އޭރިއާތެރޭގައި ހުސްކޮށް ހުރެފައި، ޕުލިސިޗް ޖެހި ޝޮޓް ބްރެޒިލްގެ ކީޕަރު އެލިސަން ވަނީ މަތަކޮށްފަ އެވެ.
