ޓްރިވެންޑްރަމް، އިންޑިއާ (ސެޕްޓެމްބަރު 28) - އަންނަ އަހަރު ބާއްވާ ވަންޑޭއިންޓަނޭޝަނަލް (އޯޑީއައި) ވޯލްޑް ކަޕަކީ އިންޑިއާ ގައުމީ ޓީމަށް ކުޅޭ ފަހު މުބާރާތް ކަމަށް ކްރިކެޓް ތަރި ވިރާތު ކޯލީ ބުނެފި އެވެ.
އުމުރުން 37 އަހަރުގެ ވިރާތު މި ވަގުތު ހަމައެކަނި އިންޑިއާ ގައުމީ ކްރިކެޓް ޓީމަށް ކުޅެނީ އޯޑީއައި ފޯމެޓްގަ އެވެ. އޭނާ ވަނީ ޓީ20 ކްރިކެޓާއި ޓެސްޓް ކްރިކެޓްގައި އިންޑިއާ ގައުމީ ޓީމަށް ކުޅުން ހުއްޓާލައިފަ އެވެ.
އަންނަ އަހަރުގެ އައިސީސީ އޯޑީއައި ވޯލްޑް ކަޕް އޮތީ ދެކުނު އެފްރިކާ، ޒިމްބާބްވޭ އަދި ނަމީބިއާގަ އެވެ. މުބާރާތް ކުރިއަށްދަނީ އޮކްޓޫބަރު/ނޮވެމްބަރުގަ އެވެ. އެ މުބާރާތަށް އިޝާރާތްކޮށް، ވިރާތު، ޖިއޯ ސްޓާ އަށް ދިން އިންޓަވިއެއްގައި ބުނެފައިވަނީ، އަންނަ އަހަރުގެ މުބާރާތަކީ އިންޑިއާ ޖޯޒީގައި އޭނާ ފެންނާނެ ފަހު މުބާރާތް ކަމަށެވެ.
"އޯޑީއައި ވޯލްޑް ކަަޕަކީ އިންޑިއާ އަށް އަހަރެން ކުޅެދޭނެ ފަހު ވޯލްޑް ކަޕް. އަހަރެންގެ މޯޓިވޭޝަނަކީ އެ މުބާރާތް ކާމިޔާބުކުރަން ކުރެވޭނެ ހުރިހާ މަސައްކަތެއް ކުރުން،" 2011 ވަނަ އަހަރު އޯޑީއައި ވޯލްޑް ކަޕްގެ ޗެމްޕިއަންކަން ހޯދި އިންޑިއާ ޓީމުގައި ހިމެނުނު ވިރާތު ބުންޏެވެ.
ވިރާތު ބުނީ 50 އޯވަރަށް ކުޅޭ އޯޑީއައި ފޯމެޓްގެ ކްރިކެޓް މިހާރު އަންނަނީ ވަރަށް ޗެލެންޖު ބޮޑުވަމުން ކަމަށާއި ގާތްގަނޑަކަށް ޓީ20 ކްރިކެޓްގެ 10 މެޗު ކުޅުމާ އެއްވަރު ކަމަށެވެ.
އިންޑިއާ އިން މިހާރު އަންނަނީ ވެސްޓް އިންޑީސްއާ ދެކޮޅަށް އޯޑީއައި ސީރީސްއެއް ކުރިއަށްގެންދަމުންނެވެ. އޭގެ ފުރަތަމަ މެޗުގައި އިންޑިއާ އިން އަށް ވިކެޓުން ވަނީ މޮޅުވެފަ އެވެ. މި މެޗުގައި، ވިރާތު ވަނީ، ނުބައިނުވެ، 139 ލަނޑު ހަދައިފަ އެވެ. މިއާ އެކު، އޯޑީއައި ކްރިކެޓްގައި ވިރާތު ވަނީ 55 ވަނަ ސެންޗަރީ ފުރިހަމަ ކުރުމުގެ އިތުރުން، އޯޑީއައި ކްރިކެޓްގައި، 15000 ލަނޑު ހަމަކޮށްފަ އެވެ. ވިރާތުގެ ޖުމްލަ، 15،080 ލަނޑަށް އެރިއިރު، އޭނާ އަކީ ސަޗިން ޓެންޑުލްކާ އަށް ފަހު، އޯޑީއައި ކްރިކެޓްގައި 15000 ލަނޑަށް ވުރެން އިތުރުވި ފުރަތަަަމަ އިންޑިއާ ކުޅުންތެރިޔާ އެވެ.
ސަޗިން އެ އަދަދަށް ލަނޑު ހަމަކުރީ، 377 އޯޑީއައި މެޗުންނެވެ. އެކަމަކު، ވިރާތަށް ބޭނުންވީ، 303 އޯޑީއައި މެޗެވެ.
އިއްޔެގެ މެޗަކީ، އިންޑިއާ ގައުމީ ޓީމުގެ މެޗުތަކުގައި ވިރާތުގެ ފަރާތުން ފެނިގެންދިޔަ 86 ވަނަ ސެންޗަރީ އެވެ. ވިރާތު ވަނީ، އޯޑީއައި ކްރިކެޓްގައި އިންޑިއާ ޓީމަށް 79 މެޗުގައި 50 ލަނޑު ވެސް ހަމަކޮށްފަ އެވެ.
