އޮސްލޯ، ނޯވޭ (ސެޕްޓެމްބަރު 28) - ޔުއެފާ ނޭޝަންސް ލީގުގައި ރޭ ކުޅުނު މެޗުތަކުން، ޕޯޗުގަލް އާއި ނެދަލެންޑްސް މޮޅުވިއިރު، ގްރީސް އިން ޖަރުމަނު ބަލިކޮށްފި އެވެ.
ނޭޝަންސް ލީގުގެ އެންމެ ފަހުގެ ޗެމްޕިއަން، ޕޯޗުގަލް އިން ލީގު އޭގެ ގްރޫޕް ހަތަރެއްގައި ވާދަކުރާއިރު، ރޭ ކުޅުނު މެޗުން ނޯވޭ ދަނޑުގައި އެ ޓީމު އަތުން މޮޅުވީ 2-1 އިންނެވެ. އަދި، ލީގު އޭގެ ގްރޫޕް ދޭއްގައި ގްރީސް އަތުން 1-0 އިން ޖަރުމަނު ބަލިވިއިރު، ސާބިއާ އަތުން ނެދަލެންޑްސް ވަނީ 2-1 އިން މޮޅުވެފަ އެވެ.
ޕޯޗުގަލް އިން ރޭ ލީޑުނެގީ އޭރިއާބޭރުން ޖޮއާއޯ ފެލިކްސް ގޯލުގެ ތިރީ ކަނަށް ފޮނުވާލި ބޯޅައަކުން ކާމިޔާބުކުރި ލަނޑުންނެވެ. ދެ ވަނަ ހާފުގައި ނޯވޭ އިން އެއްވަރުކުރީ ހިލޭ ޖެހުމެއްގައި ތަނަަވަސްކުރި ފުރުސަތެއްގައި އާލިން ބްރައުޓް ހާލަންޑް ޖެހި ލަނޑުންނެވެ.
ކްރިސްޓިއާނޯ ރޮނާލްޑޯ ބެންޗުގައި އިން މި މެޗުގައި، ޕޯޗުގަލް މޮޅުކޮށްދިން ލަނޑު ޖެހީ ގޮންޒާލޯ ރާމޯސް އެވެ. އޭނާ މި މެޗުގައި އިތުރު ލަނޑެއް ވެސް ޖެހި އެވެ. އެކަމަކު، ވީޑިއޯ އެސިސްޓަންޓް ރެފްރީ (ވީއޭއާރް) އިން ނިންމީ އޮފްސައިޑް ކަމަށް ބަލައި، އެ ގޯލު ބަލައިނުގަންނާށެވެ.
ޕޯޗުގަލް ގްރޫޕްގެ އަނެއް މެޗުން ވޭލްސް އަތުން ޑެންމާކް ވަނީ 2-0 އިން މޮޅުވެފަ އެވެ. ޕޯޗުގަލް އިން ވަނީ މި ގްރޫޕްގެ ފުރަތަމަ މެޗުން ވޭލްސް އަތުން މޮޅުވެފަ އެވެ.
ޖަރުމަނުގެ ކޯޗުކަމާ ހަވާލުވެ، ޔާގަން ކްލޮޕް ފުރަތަމަ މެޗުގައި ނެދަލެންޑްސްއާ ވަނީ އެއްވަރުވެފަ އެވެ. ދެ ވަނަ މެޗުގައި ޖަރުމަނުން ރޭ އަމިއްލަ ދަނޑުގަައި ކުޅެގެން ގްރީސް އަތުން ވަނީ ބަލިވެފަ އެވެ. ޔޫރޯގެ ޗެމްޕިއަންކަން، 2004 ވަނަ އަހަރު ހޯދި ގްރީސް އިން ޖަރުމަނު ބަލިކުރި ލަނޑު ޖެހީ މެޗުގެ 74 ވަނަ މިނިޓްގަ އެވެ. މި ލަނޑު ޖެހީ ހުނަރުވެރި ފޯވާޑް، ޑިމިޓްރޯސް ކުބޭލިސް އެވެ.
ލަނޑު ޖަހާނެ ގިނަ ފުރުސަތުތަކެއް ޖަރުމަނުން މި މެޗުގައި ހޯދި ކަމުގައި ވިޔަސް، އޭގެއިން އެއްވެސް ބޯޅައެއް ގޯލަށް ފޮނުވާނުލެވި މެޗުން ބަލިވީ އެވެ. މިއީ، ހަތަރު އަހަރުގެ ކޮންޓްރެކްޓެއްގައި ޖަރުމަނާ ހަވާލުވި ކްލޮޕްގެ ކޯޗުކަމުގައި އެ ޓީމު ބަލިވި ފުރަތަމަ މެޗެވެ.
ނޭޝަންސް ލީގުގެ މި ފަހަރުގެ ސީޒަނުގައި، ފުރަތަމަ މެޗުގައި، ޖަރުމަނާ ފަހު ވަަގުުތު އެއްވަރުކުރި ނެދަލެންޑްސް އިން ރޭގެ މެޗުން މޮޅުވެ، ކޯޗު ޒަވީ ހެނާންޑޭޒްގެ އިރުޝާދުގެ ދަށުން ފުރަތަމަ މޮޅު ވަނީ ހޯދައިފަ އެވެ.
ރޭގެ މެޗުގައި ނެދަލެންޑްސްގެ ދެ ލަނޑު ވެސް ޖެހީ މެކްސް މީރްޑިންކް އެވެ. އޭނާ ފުރަތަމަ ހާފުގައި ނެދަލެންޑްސް އަށް ލީޑުނަގައިދީފައިވަނިކޮށް ލޫކަ ޖޯވިޗް ވަނީ ސާބިއާ އަށް އެއްވަރުކޮށްދީފަ އެވެ. އެކަމަކު، ދެ ވަނަ ހާފުގައި މީރްޑިންކް ލަނޑު ޖަހައި ނެދަލެންޑްސް މޮޅުކޮށްދިނީ އެވެ.
މި މެޗުގައި ނެދަލެންޑްސްގެ ކޯޑީ ގަކްޕޯ އަށް އަނިޔާވެގެން ފުރަތަމަ ހާފުގައި ވަނީ ބަދަލުކުރަން ޖެހިފަ އެވެ.
