ޑެބްރެޗެން، ހަންގޭރީ (ސެޕްޓެމްބަރު 28) - ޔުއެފާ ނޭޝަންސް ލީގުގައި ރޭ 3-0 އިން އިޒްރޭލް ބަލިކޮށް ރިޕަބްލިކް އޮފް އަޔަލެންޑުން ފަލަސްތީނުގެ ހަނދާން އާ ކޮށްފި އެވެ.
އިޒްރޭލާ ދެކޮޅަށް ކުޅޭ މެޗުގައި ނުކުޅެން އަޔަލެންޑުގެ ކުޅުންތެރިން ނިންމަން ފެށުމާ ގުޅިގެން، އެ މެޗު ކުޅުމާ ގުޅޭ ގޮތުން މުޅި ޓީމުގެ މެދުގައި ވޯޓެއް ނަގާފައިވާ ކަމަށް އަޔަލެންޑްގެ ފުޓްބޯލް އެސޯސިއޭޝަންގެ ޖެނެރަލް ސެކްރެޓަރީ ޑޭވިޑް ކޫރެލް ވިދާޅުވެއްޖެ އެވެ.
ހަންގޭރީގައި މިރޭ ކުޅޭ މެޗަށް، ވޯޓެއް ނެގުމަށް އަޔަލެންޑުން ނިންމިއިރު، ގިނަ ކުޅުންތެރިން ނިންމީ ޕްރޮފެޝަނަލް ނިންމުމެއް ނިންމަން ޖެހޭތީ މެޗު ކުޅޭ ގޮތަށް ކުރިއަށްދިއުމަށެވެ. އަޔަލެންޑްގެ ގިނަ ކުޅުންތެރިންތަކެއް މި މެޗުގައި ނުކުޅެން ނިންމި މައިގަނޑު ސަބަބަކީ، ފަލަސްތީނަށް އަރައި އިޒްރޭލުން ހިންގަމުން އަންނަ ލާއިންސާނީ އަމަލުތަކާ މެދު ނުރުހުން ފާޅުކޮށް، ފުޓްބޯޅައިގެ ރަސްމީ އިދާރާތަކުން އިޒްރޭލަށް ފިޔަވަޅު ނާޅާތީވެ، އެކަމާ ހިތްހަމަނުޖެހުމުގެ ޝުއޫރު ފާޅުކުރުމުގެ ގޮތުންނެވެ.
އަޔަލެންޑް އެފްއޭ އިން ވަނީ ކުޅުންތެރިންގެ އެދުމާ އެއްގޮތަށް، އިޒްރޭލާ ދެކޮޅަށް ރޭ ކުޅުނު މެޗުގައި ސަލާމްކުރުމާއި ޕެނަންޓް އެކްސްޗޭންޖް ވެސް ކުރިއަށް ނުގެންގޮސްފަ އެވެ އަދި، ރޭގެ މެޗުގައި، އަޔަލެންޑް ކުޅުންތެރިން ހާއްސަ ކަޅު ބޭންޑެއް ބޭނުންކުރި އެވެ. އެއީ، އިޒްރޭލުގެ ހަމަލާތަކުގައި މަރުވެފައިވާ ފަލަސްތީނުގެ މީހުންގެ ހައްގުގައި މެސެޖެއް ލިޔެފައިވާ ކަޅު ބޭންޑެކެވެ. މެޗުގައި ލަނޑު ޖެހުމަށް ފަހު އަޔަލެންޑް ކުޅުންތެރިން ވަނީ އެ ބޭންޑް އަތުން ނަގައި އެ އަށް ބޮސްދީފަ އެވެ.
"އަހަރެމެންގެ ކުޅުންތެރިންނަށް ވަރަށް އުނދަގޫ ދުވަސްތަކެއް އެކި ގޮތްގޮތުން މިދިޔައީ، އުންމީދަކީ ދެން އޮތް މެޗު އެހާ އުނދަގޫނުވުން. އަހަރެމެން މި މެޗުގަައި މި ކުރި ހުރިހާ ކަމަކީ ދުނިޔެ ކުރިމަތީގައި ފަލަސްތީނުގެ ހަނދާން އާ ކޮށްދީ، އެންމެންގެ ސަމާލުކަމާއި އެހީ އެ މީހުންނަށް ބޭނުންވާ ކަމުގެ އިހުސާސް އެންމެންގެ ހިތަށް ގެނުވައި، ހޭލުންތެރި ކުރުވަން ކުރި ކަންކަން،" ރޭގެ މެޗަށް ފަހު، އަޔަލެންޑްގެ ކޯޗު، ހެއިމިރް ހޯލްގްރިމްސަން ބުންޏެވެ.
އަޔަލެންޑަކީ ފަލަސްތީނުގެ ސަޕޯޓަރުން ނިސްބަތުން ވަރަށް ގިނަ ގައުމެކެވެ. އަދި، ފަލަސްތީނުގެ ހައްގުތައް ދިފާއުކުރުމަށް ގިނަ ކެމްޕެއިންތަކެއް ހިންގާ އަޔަލެންޑުގައި އިޒްރޭލުން މެޗު ކުޅުމަކީ އެންމެ ރައްކާތެރި ގޮތެއް ނޫން ކަމަށް ވެސް އިޒްރޭލުގެ ބައެއް ސަޕޯޓަރުން އަންނަނީ ބުނަމުންނެވެ.
ނޭޝަންސް ލީގުގައި އިޒްރޭލާއި އަޔަލެންޑް ދެ ފަހަރެއްގެ މަތިން ކުޅެން އެބައޮތެވެ. ރޭ އަޔަލެންޑުން މޮޅުވީ އިޒްރޭލުގެ ހޯމް މެޗުގެ ގޮތުގައި ހަންގޭރީގައި ކުޅުނު މެޗުންނެވެ. އަނެއް މެޗު ކުޅޭނީ އަންނަ މަހު ހަތަރު ވަނަ ދުވަހު، އަޔަލެންޑްގެ ޑަބްލިންގަ އެވެ. އެ މެޗަށް ސެކިއުރިޓީ ވަރުގަދަ ކުރަން އަޔަލެންޑް އެފްއޭ އިން ވަނީ ނިންމައިފަ އެވެ.
