ސައުދީ އެމްބަސީ އާއި ޓޭބަލް ޓެނިސް އެސޯސިއޭޝަން އޮފް މޯލްޑިވްސް (ޓީޓީއޭއެމް) ގުޅިގެން ރާއްޖޭގެ އެކި ހިސާބުތަކުގައި ޓީޓީގެ ޑިވެލޮޕްމަންޓް މަސައްކަތްތަކެއް ކުރަން ނިންމައިފި އެވެ.
ޓީޓީ އެސޯސިއޭޝަނުން ހާމަކުރި ގޮތުގައި، ޑިވެލޮޕްމަންޓް މަސައްކަތުގެ ފުރަތަމަ ޕްރޮޖެކްޓް/އިވެންޓްތައް ފެށިގެންދާނީ، ފުވައްމުލަކު ސިޓީ އާއި އައްޑޫ ސިޓީގައި ކަމަށެވެ.
މި ފެށޭ މަސައްކަތުގެ ތެރެއިން ކުރިއަށް އޮތްތަނުގައި، ރާއްޖޭގެ އެކި ކަންކޮޅުތަކުގައި ޓީޓީގެ ޑިވެލޮޕްމަންޓް ހަރަކާތްތައް ކުރިއަށްދާނެ ކަމަށާއި ބޭނުމަކީ، މުޅި ރާއްޖޭގެ ބައިވެރިވުން އޮންނަ ގޮތަށް ޓީޓީގެ މުސްތަގުބަލު ބައްޓަން ކުރުން ކަމަށް ޓީޓީ އެސޯސިއޭޝަނުން ވަނީ ބުނެފަ އެވެ.
ރާއްޖޭގައި ޓީޓީގެ ކަންކަން ފުޅާކުރަން އެންމެ ބޮޑު އެއްބާރުލުމެއް ދޭ އެއް ފަރާތަކީ ސައުދީ އެމްބަސީ ކަމަށް މީގެ ކުރިން، "އަދަދު" އަށް ދެއްވި އިންޓަވިއުއެއްގައި ޓީީޓީ އެސޯސިއޭޝަންގެ ރައީސް، އަލީ ރަޝީދު (އައްޔަ) ވަނީ ވިދާޅުވެފަ އެވެ.
ސައުދީ އެމްބަސަޑަރު، މަތުރެކް އަބްދުﷲ އަލް އަޖާލީން އަލްދުސާރީ ވަނީ ރާއްޖޭގެ އެއް ވަނަ އަންހެން ޓީޓީ ކުޅުންތެރިޔާ، ފާތިމަތު ދީމާ އަލީއާ ބައްދަލުކޮށް ހިތްވަރު ދެއްވައިފަ އެވެ. އެއީ، އަންނަ މަހު ފްރާންސްގެ ޕެރިހުގައި ފަށާ އޮލިމްޕިކްސް އަށް ދީމާ ކޮލިފައިވެފައިވާއިރު، އޭނާ އަކީ މިހާތަނަށް ކޮލިފިކޭޝަނެއް ފަހަނައަޅައި އޮލިމްޕިކްސްގައި ވާދަކުރާ ފުރަތަމަ ދިވެހި އެތުލީޓު ކަމަށްވާތީ އެވެ.
ޓީޓީ އެސޯސިއޭޝަނުން ބުނީ، ސައުދީ އެމްބަސީން ވަނީ ދީމާ އަށް ވެސް ކުރިއަށްދިއުމަށް އެހީތެރިވެދޭނެ ކަމުގެ ފެހި ސިގްނަލް ދީފައި ކަމަށެވެ. އެ ގޮތުން، ސައުދީގެ ކުޅިވަރު ސްކޮލަޝިޕްތަކުގެ ތެރެއިން ފުރުސަތެއް ދިނުމުގެ މަޝްވަރާތަކެއް ވެސް ދިޔަ ކަމަށް ޓީޓީ އެސޯސިއޭޝަންގެ ރައީސް، އައްޔައާ ހަވާލާދީ މީޑިއާގައި ރިޕޯޓްކޮށްފައިވެ އެވެ.
