އިޒްރޭލުގެ ހަނގުރާމައާ ބެހޭ ކެބިނެޓުގެ ވަޒީރު ބެނީ ގަންޓްޒް އިއްޔެ މަގާމުން އިސްތިއުފާ ދެއްވައިފި އެވެ.
ގަންޓްޒް ވިދާޅުވީ ގާޒާގައި ހިންގަމުންދާ "ހަނގުރާމައި" ގައި ކުރި ހޯދުމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ހުރަސްއަޅަމުން އަންނަ ކަމަށެވެ.
ވަޒީރުކަމުން އިސްތިއުފާދޭން ފަސޭހަ ނޫންކަން ފާހަގަކުރައްވާ ގަންޓްޒް ވިދާޅުވީ އިސްތިއުފާ ދެއްވި މައިގަނޑު ސަބަބަކީ "ހަނގުރާމަ" ކުރިއަށް ގެންދާނެ އާ ޕްލޭނެއް ނުދިނުން ކަމަށެވެ.
ރިޕޯޓުތައް ބުނާ ގޮތުގައި ވަޒީރުކަމުން ގަންޓްޒް އިސްތިއުފާ ދެއްވަން ކުރިން ހަމަޖެހިފައި އޮތީ ޖޫން 8، ގަ އެވެ. ނަމަވެސް އޭނާ އިސްތިއުފާ ދެއްވީ އޭގެ އެއް ދުވަސް ފަހުންނެވެ.
ގަންޓްޒް ވަނީ އާ ޕްލޭނެއް ނުދީފިނަމަ، މަގާމުން އިސްތިއުފާ ދެއްވާނެ ކަމުގެ އިންޒާރު މީގެ ކުރިން ވެސް ދެއްވާފަ އެވެ. އަދި އެކަމާ ގުޅިގެން ނަތަންޔާހޫ ވަނީ އިސްތިއުފާ ނުދިނުމަށް ގަންޓްޒްއަށް ގޮވާލާފަ އެވެ.
އިޒްރޭލުގެ އަވަސް އިންތިހާބެއް ސެޕްޓެމްބަރުގައި ބޭއްވުމަށް ގަންޓްޒް ވަނީ އެޕްރިލް މަހު ގޮވާލައްވާފަ އެވެ. މަޝްހޫރުކަން ލިބިފައިވާ ގަންޓްޒް ކުރިއަށް އޮތް އިޒްރޭލުގެ އިންތިހާބުގައި ވާދަކުރައްވާނެ ކަމަށް ބެލެވެ އެވެ.
އިޒްރޭލުން ހަނގުރާމައެއްގައި ނިވަލުގައި ގާޒާގައި ހިންގަމުންދާ ނަސްލުހޭދު (ޖެނޮސައިޑު)ގައި މިހާތަނަށް 36،500 މީހުން ވަނީ މަރުވެފަ އެވެ. އަދި މަރުވި މީހުންގެ ތެރޭގައި ގިނައިން ހިމެނެނީ އަންހެނުންނާއި ކުޑަކުދިންނެވެ.
